قصة يومان قضيتهم لدى المخابرات المصرية

>> 08 February 2011



يوم الجمعة اللى فات 4 فبراير بالليل ، كان مقبوض عليا فى أحد مقرات المخابرات المصرية ، و كانوا مغميين عنيا ، و كان مجموعة من ظباط المخابرات بيتناقشوا مع كتير من النشطاء المصريين المقبوض عليهم زيى ( كان منهم 9 نشطاء قبضوا عليهم و هما خارجين من عند البرادعى ) ... واحد من ظباط المخابرات قالى قدامهم " لو جمعنا اللى عملوة ال 20 ناشط دول ، ميجيش 10 % من اللى عملته أنت " ... رديت عليه و قلتله " أنا حد متواضع ، و شايف أن كلهم أحسن منى "
قبل كدة ، لما كنت بكتب عن القبض عليا أو أى أنتهاك صدر فى حقى ، كنت بعتبر دة نوع من الحرب الغير عنيفة بينى و بين النظام ، بمعنى أنهم بينتهكوا حقوقى ، و أنا برد عليهم بفضحهم قدام العالم ، و الفضح فى المعتاد بيجيب تأثير كويس ... لكن المرادى أنا بكتب بشكل مختلف ، لأن دى أول مرة أحس أنى ضحية ، و أول مرة أهان لهذة الدرجة ... و بكتب المرادى مش علشان أنتقم ، لكن علشان الناس تعرف هيحصل فيها أية لو الثورة دى فشلت .... ثورتنا هيا اللى هتحمينا من تكرار التصرفات دى معايا و معاكم

يوم الجمعة 4 فبراير 2011 - عند دار القضاء العالى
- نزلت الضهر على وسط البلد علشان أشارك فى المظاهرة الكبيرة اللى كانت هتتعمل هناك ... نزلت حوالى الساعة 2 من محطة مترو " جمال عبد الناصر " ، و دخلت من الشارع بتاع دار القضاء ... العسكرى اللى جنب الدبابة وقفنى ، و فتشنى 3 مرات ، و مسك الشعارات اللى فى الورق معايا ، و قراهم ... فأخد بطاقتى و موبايلى ، و طلب منى أنى أستنى جنبه
- الشعارات اللى كانت معايا " دولة مدنية ، لا دينية ولا عسكرية " و " لا سليمان ولا شفيق ، كفاياكم حكم 59 سنة يا عسكر " و " أسمى مايكل و متظاهر رغم أنف البابا شنودة " ... لاحظت برضة أنهم بيمنعوا أى حد داخل بأكياس ، و قدام عينى منعوا ناس داخلين بأمدادات طبية من الدخول
- طلبت أتكلم مع حد أكبر ، فشاورلى على حد لابس مدنى ، و قالى أن دة ظابط مخابرات ... قلتلة أن عمر سليمان و أحمد شفيق تعهدوا بعدم منع التظاهر ، فأزاى مانعينى أدخل ؟ ... فقاللى أنهم عندهم أوامر مباشرة بمنع دخول الناس ، علشان الموضوع ينتهى على كدة ... لما لقانى بقاوح معاه ، راح جاب حبل و ربطنى من ورا ضهرى ، و ربط الحبل فى الدبابة ... الناس اللى موجودة أبتدوا يسألوا لية أنا مربوط كدة ؟ ، فأبتديت أنا أتكلم معاهم ، راح بتاع المخابرات أخدنى و ربطنى فى السور الحديد اللى جنب سينما ريفولى ، علشان أكون بعيد عن الناس اللى موجودة ... أنا مسكتش و قعدت أهتف ضد حسنى مبارك ، و أقول للمتظاهرين يبلغوا الإعلام بالقبض عليا ... فجه ظابط المخابرات و ضربنى بالقلم على وشى ... و اللى ضايقنى بجد ، أن الناس بتوع اللجان الشعبية كانوا بيساعدوا الجيش فى القبض عليا ، و هما بطيبتهم متخيلين أن الجيش واقف معانا

الطريق إلى الوحدة 9770 ج 7
- بعد كدة جت عربية جيب شرطة عسكرية رقم 440700 ، أستلمتنى ... كان فيها نقيب شرطة عسكرية أسمه مختار ( النقيب مختار ) ... النقيب دة هو اللى دخل بعربيتة الجيب يوم 28 يناير وسط المتظاهرين ، و دخل ذخيرة للشرطة كذا مرة ، فالمتظاهرين ولعوله فى العربية بتاعته ... طول الطريق كان عمال يشتم فى المتظاهرين ، و ضربنى على راسى بالبونية كذا مرة ... و فوجئت أنة بيعدى على الكماين بتاعت اللجان الشعبية ، و أن معظم الكماين فى وسط البلد موقفين فيها مخابرات بلبس مدنى مع بلطجية حزب وطنى ، و متفقين معاهم يقبضوا على المتظاهرين اللى رايحين التحرير
- العربية فضلت ماشية بينا ، و عدت على الشرابية ، و دخلت لسرية تبع الجيش ، مكتوب عليها من برا " الوحدة 9770 ج 7 " ... هناك لقيت ناس كتير مقبوض عليهم ... و كان فية أجانب كتير قابضين عليهم ، و قالولهم يمشوا من غير ما يدوهم الباسبورات بتاعتهم ، لأنهم حرقوا الباسبورات
- على الساعة 3 و نص ، ربطونى من ورا ضهرى كويس ، و غمولى عينى بقماشة ، و ركبونى ميكروباس مع باقى المقبوض عليهم ، و أتحركت العربية لمكان محدش يعرفة


- فى مبنى المخابرات
- العربية مشيت حوالى نص ساعة بس ، و بعديت وقفت فى مكان كان واضح انه مفتوح ، و مفهوش صوت ... و فضلت واقفة بينا حوالى 4 ساعات ، و أحنا مش عارفين أحنا فين ، ولا حد قالنا أى حاجة ... كان فيه جامع قريب بيأدن العصر و العشا ... ظباط الجيش كانوا مركزين عليا اوى ، لأنى الوحيد فى المجموعة دى اللى كنت سياسى و ممسوك بشعارات سياسية ، و النقيب مختار كان عمال يسخن اللى حواليه ضدى ... و كان فية صوت ناس بتتعذب و بتصرخ ، و كان العساكر بيحكوا عن واحد حاول يجرى فضربوة بالرصاص فى رجله ، و سايبينة قاعد ينزف من غير ما يجيبوله دكتور
- بعد كدة نادموا و جابونى انا لوحدى من وسط الناس كلها ، و أبتدت الزفة ( الزفة مصطلح يعرفوة المعتقلين القدام ، و هو عبارة عن أقوى جرعة من الضرب و الرعب بتتعطى للمعتقل أول دخولة السجن ) ... حد كان ماسكنى من رقبتى و مخلينى موطى للأرض ، و حواليا أصوات ضرب و كرابيج كهربا ، و ظابط مخابرات كبير فى السن عمال يقول كلام شماته فيا " أيوة كدة ، هاتوه ، أخيرا ... " ... كان فية حوالينا اصوات مرعبة معرفش اية ( أكتشفت بعدين أن صوت تكات أسنان الكلابش الجديد بيبقى مخيف لو الواحد مش عارف دة أية )
- ظابط جيش مسكنى ، و قالى أن دة المقر الرئيسى لمباحث أمن الدولة ( علشان يرمى التهمة على الداخلية ) ... و هددنى انهم يعذبونى لو مسمعتش كلامهم ، و قاللى أقعد ساكت و متكلمش ، و كل شوية ييجى ظابط يسألنى سؤال ( أسمى - عنوانى - أتمسكت فين ) ، فلو رديت عليه يروح الظابط اللى ماسكنى يضربنى و يقولى " مش قلتلك متتكلمش ؟ " ، و لو مرديتش يضربنى و يقولى " رد " فأرد و بعد ما الظابط يمشى يروح يضربنى تانى و يقولى " أنت رديت لية ؟ مش قلتلك متتكلمش " ... و فضل شغال معايا بالإرهاب دة بتاع نص ساعة
- بعد كدة أبتدوا يحركونى كل شوية يقعدونى فى حتة ، و كل شوية ييجى ظابط مخابرات يتكلم معايا ... أتكلمت ليلتها مع حوالى 10 ظباط مخابرات مختلفين ( أعتقد أنهم كانوا بيسجلوا بكاميرا فيديو ) لحد الساعة 2 و نص بعد نص الليل ( يعنى أكتر من 6 ساعات تحقيقات ) ... أتكلموا معايا كتير عن السلامية و رفض الخدمة العسكرية ، و عن أن الثورة دى ضرورى تنتهى ، و أن الريس حققلنا مطالبنا كلها
- سألونى عن صديقاتى البنات ، و عن المصروف اللى بيبعتهولى والدى ... و انا رفضت أجاوب على أى أسئلة شخصية ، و قلتلهم أنى ممكن أجاوب على أى أسئلة تخص السياسة أو التجنيد ، لكن مش هتكلم فى موضوعات شخصية
- كانوا بيتعمدوا أن التحقيقات يسمعها زمايلنا المعتقلين من غير ما نكون عارفين بوجودهم ... يعنى أنا سمعت تحقيقات غيرى من غير ما يكونوا عارفين انى موجود ، و نفس الشئ حصل معايا ... هدفهم من كدة أننا علشان أتعاملنا بعنف و اتذلينا ، فبقينا بنقول كلام يرضيهم ، و لما باقى النشطاء يسمعوا الكلام دة هيفقدوا أحترامهم لبعضيهم ... علشان كدة لما قعدونى مع الشباب بتوع البرادعى ، قلتلهم قدام ظباط الجيش أن الشباب دة كلهم أحسن منى ، و أنهم أبطال ... عملت دة علشان أثبتلهم أننا لازلنا بنحترم بعض مهما عملوا
- كان واضح جدا فى التحقيقات أن كل ظباط الجيش عندهم ولاء شخصى لمبارك ... كنت حزين جدا على الجيش المصرى اللى ولاءة لمستبد ، و ملهوش ولاء لمصر ... يا بختك يا تونس بجيشك الوطنى
- فية ظابط مخابرات من اللى حققوا معايا كان وسخ جدا ( تقريبا كان هو نفس الشخص اللى كان بيشجع أستقبالى بعنف فى الزفة ) ، و قاللى أنة عنده 50 سنة ( و صوته فى السن دة فعلا ) و دة معناه أنه قيادى فى المخابرات المصرية ... قاللى " تدخل الجيش يا مايكل ؟ " ... فقلتلة " لأ " ... قعد يناقشنى فى معتقدى السلامى ، و مكنش عندهم أى أحترام لفكرة حرية الأعتقاد ... و قاللى أنة هيدخلنى الجيش ، فقلتلة " مش هيحصل " ... قاللى أن دى قرصه ودن علشان أعرف أنهم لما بيحبوا يجيبونى هيجيبونى ( طبعا دة كذب ، لأنى لو مكنتش نزلت المظاهرة يومها مكنش أتقبض عليا ) ... قاللى أنى هتحول لمحاكمة عسكرية ، فقلتلة أنى أخترت بنفسى أنى أتحاكم عسكريا لما رفضت التجنيد ، فمش مشكلة أن المحاكمة أتأخرت شهرين ... برضة كان متعفرت جدا من الناس اللى براسلهم على الأيميل ، واضح أن الشغل بتاع المنظمات السلامية فى أوربا وجعهم اوى
- كانوا بيلعبوا معانا اللعبة القديمة بتاعت الشرطى الطيب و الشرطى الشرير ... يعنى يودونى عند حد يزعق و يهدد ، و بعدين يودونى عند حد طيب ، و بعدين يودونى عند حد شرير ، و هكذا ... أفلام قديمة و بايجة جدا
- طول الوقت كانوا عمالين يتتريقوا على المسيحية ، و كانوا مهتمين أنهم يعرفوا أنا أرثوذكس ولا كاثوليك ولا برتستانت ، و خلونى أسمع الصلاة الربانية
- كانوا بيأكدوا بأستمرار أن هنا مفيش قانون يحمينا ، و أنهم يقدروا يعملوا فينا اللى هما عايزينة من غير عقاب ... و بصراحة ، دة حقيقى  ... أحنا كنا بنتعامل كأننا أسرى حرب ، طول الوقت مربوطين من ضهرنا ، مغميين عنينا ، راكعين على الأرض ، و مش عارفين أحنا فين ، و مش مسموحلنا نتكلم مع بعض ... مستحيل دى تكون معاملة مواطنين شرفاء فى بلدهم
- الساعة 2 و نص خلونى أنام لوحدى على الرصيف فى الهوا الطلق ... مخلونيش أنام مع الباقيين ( كأنة حبس أنفرادى ) ... و معطونيش بطانية زى باقى الناس ، لكنهم عطونى سجادة لفيت نفسى بيها ، و السجادة كانت خشنة اوى جرحتلى كل أيديا
- أنا طبعا قعدت يوم و نص مش بشوف النور ، لحد ما أفرجوا عنى تانى يوم ، لكنهم كانوا بيفتحولى عينى فى الحمام ، و دة الوقت اللى كنت بشوف فية الساعة

- التحرش الجنسى
- أول تحرش جنسى بيا كان من عسكرى الجيش اللى قبض عليا عند دار القضاء ، لما فتشنى عند أعضائى ... أنا أعتبرت دة جزء من التفتيش و عديت الموقف وقتها
- فى الزفة ، كانوا بيمسكونى من رقبتى و يخلونى أوطى ، و ييجى حد من ورا يرفع الجاكيت و ينزل البنطلون شوية ، علشان يدينى أيحاء أنهم هيغتصبونى
- كمان كان العساكر اللى بينقلونى من تحقيق لتحقيق ، واحد منهم دخل أيدة جوا البنطلون من ورا ، و كان بيشدنى من البوكسر بتاعى
- العساكر بقى طول الوقت كانوا بيتكلموا عليا على أنى " بنت " أو " واحدة " ... يعنى واحد فيهم يقول لزميله عليا " معايا واحدة هنا ، هخلصها و أجيلك "
و أنا واجهت ظباط المخابرات بالكلام دة ، فعملوا نفسهم ميعرفوش و رفضوه ... لكن مواجهتى ليهم خلت التصرفات دى تقف تانى يوم

الحرية من جديد - السبت 5 فبراير 2011
- تانى يوم الصبح قعدت لحد الساعة 2 و نص من غير أى حد يكلمنى أو يقولى أى حاجة ... كنا نايميين فى الهوا الطلق على الأرض ، و كانت الدنيا بتمطر فوقينا ، و مع ذلك مأهتموش أنهم ينقلونا لمكان ضل
- الساعة 2 و نص ، نقلونى لمنطقة الزنازين ... كانوا بيفرجوا عن ناس كتير ... كان فية حوالى 8 زنازين فى كل دور ، و المبنى من دورين ( يعنى 16 زنزانة تقريبا ) ، يعنى 300 معتقل على الأقل ... كان فيهم زنزانة واحدة فيها البنات اللى مقبوض عليهم ( مكانوش راضيين يدخلوهم الحمام ، و البنات كانوا عمالين يخبطوا على الباب علشان يدخلوهم الحمام ، لكنهم مسألوش فيهم )
- قعدوا يفرجوا على الناس اللى كانت موجودة ( كان فيهم ناس مقبوض عليهم من يوم التلات 1 فبراير ) ... و انا كانوا مقعدينى فى كورنر طول الوقت لوحدى مش عارف مصيرى ... كانوا برضوا بيدخلوا ناس جديدة قابضين عليهم ( و دة يثبت كذب تصريحات شفيق و سليمان أنهم مش هيقبضوا على نشطاء تانى )
- الساعة 6 و نص ، جابونى و ربطونى بكلابشات حديد جديدة ( ساعتها فهمت أن الصوت المرعب دة صوت الكلابشات الحديد ) ... بس أنا أتخضيت ، لأنى طول اليومين محطوش كلبشات فى إيدى ... اليوم اللى قبله قالولى أنهم واخدينى علشان يفرجوا عنى ، و قعدونى فى الحتة اللى نمت فيها ، و قالولى أنهم هيمشونى دلوقتى ، و طبعا قعدت للصبح من غير ما يمشونى ... فلما تانى يوم قالولى أنى همشى النهاردة مصدقتهمش ... غمولى عينى كويس جدا ، و دة خوفنى أكتر ... مشيوا بيا فى رمل كتير ، بصراحة حسيت أنهم واخدينى على حفرة يعدمونى بالرصاص ( كانوا مجرمين لأقصى درجة ) ... لكنهم ركبونى تاكسى ، و قالولى مفتحش عينى إلا بعد ما يمشى شوية
- ساعتها مكنش فية حاجة تهمنى غير أنى أخرج حى من المكان دة ... كانوا يومين مليانين بالرعب و القسوة و الألم ، متمناش أن أى حد فى الدنيا يشوفهم ... بعد ما التاكسى مشى شوية ، رفعت الغطا من على عينى ، فلقيت نفسى فى شارع الطيران ، فعرفت انى كنت فى المنطقة العسكرية اللى فى رابعة العدوية - مدينة نصر

تعليقى النهائى
- رغم أنى عشت أصعب يومين فى حياتى ... لكنى بعد ما خرجت أبتديت أفكر أزاى الناس دول جبناء ... هما كانوا خايفين اننا نشوف وجوههم ، او نعرف اماكنهم ... كنا مربوطين قدامهم من غير سلاح ، و مع ذلك هما اللى خايفين مننا ... معلش ، الحرية ليها تمن ، بس مهما حاولوا يوهمونا أننا ضعفاء لازم نعرف أننا أقوياء ... أحنا أقوياء ، لكن هما أعنف ، و فية فرق بين القوة و العنف ... و فى يوم من الأيام ، مصر هتاخد حق كل اللى أتعذبوا على إيد العسكر من 52 لحد النهاردة
- رسالتى للناس اللى فى التحرير ... لازم تكملوا ، لازم تفضلوا مسيطرين على الميدان ... الميدان دة هو ورقة الضغط الوحيدة اللى فى أيدينا ، و مينفعش نضيعها من أيدينا ... لازم الثورة دى تنجح ، لانها لو فشلت ، كل مصر هيحصل فيها اللى حصل معايا و اكتر كمان ... و انا هرجع أكون موجود معاكم فى التحرير من نهاية الأسبوع دة ( بعد ما الألم يروح من جسمى )
- حزنت من ان جيش مصر ميكونش ولاءة لمصر ، لكن ولاءة لزعيم العصابة حسنى مبارك ... أنا شايف ان الناس اللى فى التحرير عندهم وعى عالى جدا ، و انهم مسمحوش للدبابات انها تتقدم جوا التحرير ... خلوا بالكم ، الجيش مش معانا ، و بلاش نعمل تصرف ساذج يضيع الميدان من أيدينا
- رسالتى لظباط المخابرات اللى أنتهكوا حقوقى ... أنا عارف عنكم معلومات كتيرة دلوقتى ، و كل مرة بتغلطوا فيها بعرف معلومات أكتر ... و متقلقوش ، هييجى يوم و هتتحاكموا

عاشت الثورة المصرية
عاش الشعب المصرى
تحيا مصر


 
موضوعات ذات صلة

56 comments:

mera 09/02/2011, 00:53  

هو فعلاً مافيش فايده؟!

Anonymous,  09/02/2011, 13:03  

مايكل باشا
أنا حزين على اللي حصلك بس في نفس الوقت فرحان بيك موووت
وانك لسة في نفس موقفك بتاع زمان ايام اسيوط
انا يا باشا زميلك من ايام اسيوط
محمد
المهز لو فاكرني اتصل علية انت معاك رقمي ولو مش فاكر ابعتلي على الميل عشان عايز اكلملك ضروري
انا محمد جمال يا مايكل
اوك انا مستني تليفونك ضروري

بانوراما 09/02/2011, 16:29  

صور نجاة عبد الرحمن الصحفية بجريدة 24 ساعة
http://www.2u-i.net.ms/2011/02/24.html

Anonymous,  09/02/2011, 17:10  

قاطعوا امبراطورية العسكر الاقتصادية. قاطعوا منتجات القوات المسلحة ومنافذ بيعهم ومنجات المصانع الحربية

Anonymous,  13/02/2011, 22:17  

الكلام اللى مكتوب محسسنى اننا عايشين ايام الاحتلال
نفس التعذيب والوساخة اللى بيعملوها فى الناس
بجد اعمل لجوء سياسى وسيبك من البلد الزبالة دى

Anonymous,  07/03/2011, 22:26  

طيب وليه ماقلتش التاكسي ده معاهم والا لأ؟ غريبه انك ما اخدتش رقمه رغم انك اخدت رقم العربيه اللي اعتقلك

================
- تانى يوم الصبح قعدت لحد الساعة 2 و نص من غير أى حد يكلمنى أو يقولى أى حاجة ... كنا نايميين فى الهوا الطلق على الأرض ، و كانت الدنيا بتمطر فوقينا ، و مع ذلك مأهتموش أنهم ينقلونا لمكان ضل

مكان ضل ليه والدنيا بتمطر هي الدنيا كانت شمس

روح العب بعيد يلا قابض كام للتشكيك في الجيش؟؟؟؟؟؟؟؟؟؟؟
كفايه سموم بأه
وبعدين ما انت طلعت اهو يعني محدش وداك ورا الشمس

Anonymous,  08/03/2011, 20:08  

ارض مصر بتمثل اليك اية يا مايكل ؟؟؟؟؟؟؟؟؟؟

Anonymous,  17/03/2011, 23:08  

How were you able to determine the time that accurately 2:30 am, 6:30 am ... ?

Maikel Nabil Sanad مايكل نبيل سند 18/03/2011, 02:52  

@mera
لا طبعا ، فية فايدة ... بس نفتح دماغنا ، و نفهم مين معانا و مين علينا ، علشان نعرف نتصرف صح

@محمد جمال
موبايلى أخدته المخابرات ، و بالتالى فقدت كل الأرقام اللى كانت متسجلة عندى
كلمنى انت بقى ... أرقامى هى هى

@Anonymous 2
أحنا فعلا محتاجين حملات منظمة ضد المؤسسة العسكرية
بس التفاصيل محتاجة كلام

@Anonymous 3
للأسف ، متعودتش أهرب من حروبى
هنكمل الثورة لحد ما نفرض أرادتنا على اى حد فاسد

@Anonymous 5
بلدى ، و بحبها

@Anonymous 6
فى أيدى ساعة مثلا ؟ ... مش محتاجة ذكاء يعنى

Jean The Snow Siren 29/03/2011, 13:24  

احترامي لشجاعتك لأني للأسف معنديش كلام تاني اقوله

Anonymous,  29/03/2011, 21:56  

أعتقد انك لازم تأخد جايزه أوسكار فى التأليف
لما يكون الهروب من خدمه بلدك العسكريه شرف ليك يبقى طبيعى كلامك عن الجيش يكون كده
ولما تبقى اسرائيل من وجهه نظرك معنى الديموقراطيه يبقى هاجر وروح عيش هناك مصر مستغنيه عن أمثالك

بجد ربنا ياخد كل واحد شبهك كده فى الدنيا ويريحنا منكم ومن قرفكم يا خونه

Anonymous,  30/03/2011, 00:08  

كداب ومنافق وكلامك كله باين انه تأليف وكل هدفك افساد سمعة الجيش اللي عندهم مباديء امثالك ميعرفوش عنها حاجة

Anonymous,  31/03/2011, 06:51  

مع انى عارف ان اللى بتقولو ممكن يحصل لكن مش مصدقك ومش مقتنع بتعميمك على فساد كل منظومه الجيش بالصوره المؤامرتيه دى والا كانت الثوره فشلت وانت مقابل رب كريم اكيد فى جهات بتحارب الثوره وبعنف لكن اكيد مش كل الجيش موالى لحسنى مبارك والدليل الرائد شومان وقيادات وطنيه ومؤمنه انا اعرفها ودول مهما كان قوه الفاسدين هيحاربو بشرف لحد ما الحق ينتصر وزى ما ربنا سبحانه وتعالى استجاب لدعوات المصرين لما دعو على مبارك هيستجيب لدعواتهم يحمى مصر من اعدائها اللى بره قبل اللى جوه...تحيا مصر وعاشت الثوره وربنا هو اللى حامى البلد مش حد تانى

Anonymous,  31/03/2011, 15:05  

مش مصدقك انت سيناريست كبير اوى ومؤلف بارع لازم تعمل مسلسل فى رمضان
افراد القوات المسلحة كلهم اشرف منك ومن امثالك
ان شاء الله هتتحاكم محاكمة عسكرية ويتحكم عليك بالاعدام

Anonymous,  01/04/2011, 14:18  

سلام على من اتبع الهدي
السلام عليكم

الشباب اللى متعاطفين مع القصة ممكن وقفة صغيرة مع بعض ونشوف ده كلام صح ولا غلط؟؟؟؟؟؟؟؟ طيب بصو كده كلام مايكل هحطه بين قوسين وهعلق عليه ونحكم

ده كلامه وركزوا فى التواريخ اللى قالها(يوم الجمعة اللى فات 4 فبراير بالليل ، كان مقبوض عليا فى أحد مقرات المخابرات المصرية

يوم الجمعة 4 فبراير 2011 - عند دار القضاء العالى
- نزلت الضهر على وسط البلد علشان أشارك فى المظاهرة الكبيرة اللى كانت هتتعمل هناك ... نزلت حوالى الساعة 2 من محطة مترو " جمال عبد الناصر " ، و دخلت من الشارع بتاع دار القضاء ... العسكرى اللى جنب الدبابة وقفنى ، و فتشنى 3 مرات ، و مسك الشعارات اللى فى الورق معايا ، و قراهم ... فأخد بطاقتى و موبايلى ، و طلب منى أنى أستنى جنبه


الطريق إلى الوحدة 9770 ج 7
- بعد كدة جت عربية جيب شرطة عسكرية رقم 440700 ، أستلمتنى ... كان فيها نقيب شرطة عسكرية أسمه مختار ( النقيب مختار ) ... النقيب دة هو اللى دخل بعربيتة الجيب يوم 28 يناير وسط المتظاهرين ، و دخل ذخيرة للشرطة كذا مرة)تعليقي على الكلام جاى اهو


يعنى انته بتقول الحكاية انها حصلت يوم الجمعة اللى فات ساعة ما انته كنت بتكتب يعنى لو الحكاية دى فعلا حصلت 4 فبراير يبقى انته بتحكي وبتكتب الكلام ده يوم 11 فبراير
ومع ذلك بتتكلم وبتقول ان الظابط مختار هو اللى دخل يوم 28 فبراير بالعربية بتاعته ووزع اسلحة على الشرطة !!!!!!!!!!!!! طب اصدقك ازاى
يعنى انته بتكتب الكلام ده يوم 11 وبتحكي موقف بتدعي انه حصل يوم 28 ؟؟؟؟؟
انا اه ممكن يكون الجيش ليه مساوى ظهرت لكن ياريت بلاش افتراء على ظباط اشراف عمر ما كان الجيش زى الشرطة ولا هيكون لان الوضع مختلف تماما
وانا مش مصدقك وارجوك بلاش افتراء حرام عليك

Anonymous,  01/04/2011, 15:09  

عذرا عذرا اخ مايكل
لم الحظ الفرق فقد خانتني الملاحظة باعتبار يوم 28 هو يوم 28 فبراير ولكنك ذكرت انه 28 يناير ولكنى لم الحظ ذلك
اسف اسف جدا على كلامي وعذرا فلقد انفعلت لما رايت من حقائق ولم اريد تصديق عيني وربنا يخرجك على خير
اسف مرة تانية وارجو تقبل اعتذاري

Anonymous,  04/04/2011, 22:55  

نفسى اسعدك وكون جنبك باى طريقه

Anonymous,  05/04/2011, 17:35  

على فكرة يا مايكل كلامك صحيح 100% واسمح لي أضيف حاجة بسيطة جدًا أولا أنا طبيب بالقوات الزفت المسلحة واستلمنا في مستشفى البكر العسكري 186 جثة مجهولة من فرقة 777 بعد ما أعدموهم بالغاز
على فكرة أنا تركت الخدمة ومتغيف من يومها واللي يحصل يحصل الجيش مش بريء من دم الثوار والله العظيم أنا صادق جدًا وصعبان عليا الناس المخدوعة في الجيش

مصر 11/04/2011, 19:17  

أول مرة أزور مدونتك القيمة .. تهنئتي لك على المجهود المبذول والرائع..
ميدان التحرير الان
اخبار مصر
ثورة 25 يناير

Anonymous,  11/04/2011, 20:33  

احب اقولك كلمه واحدة حمرا

Anonymous,  11/04/2011, 20:55  

تم الحكم العميل الخائن كاتب هذه الرواية الكاذبة بالسجن 3 سنوات بسبب كتباته التاليه

Anonymous,  11/04/2011, 21:02  

ياريت لى يعرف البنى آدم ده و هايروح ل السجن يبقى يقول له فى السجن هايشوف التحرش الحقيقى مش انت قلت كانوا بيتحرشوا بيك هاتشوف بأه التحرش لى على أصوله يا ........

Anonymous,  11/04/2011, 22:17  

انت عيل سيس اساساً ياريت كانو اغتصبوك كان هيبقى احسن لك
و كنت هتطلع تقول " انا كمايكل انبسط يعنى "
ياللا يابن الهبلة مش كفاية عليك 3 سنين كانو ادوك اعدام و رحمونا
و ابقى خلى اسرائيل تنفعك يا عميل يابن الوس*ة

فاتن محمود 12/04/2011, 01:18  
This comment has been removed by the author.
Anonymous,  12/04/2011, 12:15  

بص يا مايكل
انا عارف انك مش هاتقرا الكلام ده دلوقتى
بس عارف ان فى كتير هايقروه
انت مع اسرائيل
مع امريكا
مع ابليس نفسه
لا يعنينى هذا بالمره

لكن الى انا متأكد منه
ان ده حصل معاك ومع غيرك
وطول ما احنا نايمين فى العسل
وبنشرب عصير الثورة بطعم البرتقال

هايحصل مع ناس كتير وها يتكرر كتير جدا
ربنا يكرمك

حامد فوزى
مصرى جدا

mohamed_salem 12/04/2011, 13:36  

انت قلت انهم كانو مغمين عنيك طول الوقت ازاى عرفت عدد الغرف حسب كلامك؟ (كان فية حوالى 8 زنازين فى كل دور ، و المبنى من دورين ( يعنى 16 زنزانة تقريبا )) انا مش فاهمها دى و ازى و بعدين دا مش اسلوب المخابرات يمكن يكون دول ظباط فى امن الدولة لان المخابرات مش ها تقبض على حد و تسيبة لانها بتكون جمعت الادلة كاملة قبل الاقبض علية

Anonymous,  12/04/2011, 23:50  

انت عيل ................ عاوز توصل ومش عارف ازاى
اديك خدت الخازوق الصح علشان توقع مابين الشعب والجيش البس بقى وشوف هيعلموك الادب ازاى فى السجن العسكرى
هيعرفوك يعنى ايه مصرى ويعنى ايه الجيش اللى فحت اسرائيل اللى انت بتقربلها
الثوره ثوره الشهداء بيحميهاالجيش
لاهى بتاعه خالد سعيد ولا 6 ابريل اه هما حركو الناس بس دى ثوره الناس مش الساسه والله
المؤسسه اللى انت بتشتم فيها دى اكبر واكتر المؤسسات انضباط فى الشرق الاوسط
انا طاااااااالب واتمنى الانضمام للجيش المصرى تعرف الوطنيه والرجوله على حق

saidshoo 13/04/2011, 10:44  

انت ميييييييييييين يا كلب يا عميل
علشان تتكلم عن أسيادك الشرفاء حماة الوطن
كنا نطلب من المؤسسة العسكرية تعاقبك بأكتر من ثلاث سنوات علشان تبقى عبره للخونه أمثالك

وغصب عنك الجيش والشعب إيد واحده

Anonymous,  14/04/2011, 02:58  

مصدقك يا مايكل فيما تنسبة من فساد للجيش المصرى للإسباب التالية 1-ولاد النس الى ليهم وسطة بيكشفو قبل ولاد النس الغلابة
2-ثمن استمارة الإعفاء الرسمى 5ج بيدفعونا 17ج

Anonymous,  14/04/2011, 03:02  

مصدقك يا مايكل فيما تنسبة من فساد للجيش المصرى للإسباب التالية 1-ولاد الناس اللى ليهم وسطة بيكشفو قبل ولاد الناس الغلابة
2-ثمن استمارة الإعفاء الرسمى 5ج بيدفعونا 17ج

alaa 03/05/2011, 12:06  

الحقيقة موقف الجيش باين من البدايه
وانا حضرت حوالي اربع مرات تم فض الاعتصام بالقوه و ربنا كان بينجيني باعجوبه
فى شخصية مجهولة بتشتم مايكل فى ردودها و بتتهجم عليه
وكالعادة امن الدولة و الجيش لما بيحقق مع معتقل سياسيي من خوفه و جبنه بيلف عينين المعتقل بقماشه
لأنه عارف انه لو شافه المعتقل هيحفظ شكله و هيجيبه هيجيبه
برضه في الردود متعود بتاع الامن الغبي انه يكتب تعليقه بصفه مجهولة
انا نفسي اعرف لما انتوا مرضى نفسيين و معاتيه ايه اللي بيشغلكم فى الداخلية و في الجيش
اهي البلد فعلا خربانه بسببكم و بسبب خنوعكم وخضوعكم للاعلي منكم رتبه
و خضوعكم لربكم الاعلي مبارك اللي ذلناه و خلعناه بمنتهي القسوه و رمينا حبيب العادلي فى السجن زي الكلب
و البقية تأتي
و خد بالك يا بتاع الامن عشرات الضباط تم تصفيتهم بعد تعذيبهم
فكر نفس لأن بكره انت موجود معانا
ومايكل هيخرج معزز مكرم و الظباط اللي عذبوه هيتحاسبوا بلدي او قانوني
لسه بدري و مش همهم الناس تعرف ان لسه فيه فساد
المهم ان بعض الناس عرفت ان النظام باقي بقذارته وهنتصرف معاكم لأن احنا اكتر منكم و عقلنا و وعينا افضل طبعا من اجهزة امنية متخلفة تعيش على عقلية الستينات و يتحكم فيها مسنين اصغرهم فوق السبعين سنه

Anonymous,  28/07/2011, 04:58  

غصب عنك وعن اسرائيل يا ميمى بلاش مايكل دى لانى اعرف كتير مايكل بس رجاله وولاد رجاله مش عيال وسخه زيك .. غصب وعن اسرائيل الجيش والشعب ايد واحده لانك لو تاخد بالك يا حمار يا ابن الحمار ان الجيس هما اخواتنا واهالينا والشعب هما برضوا اخواتنا واهالينا .. وعلى فكره ابقى خااللى اسرائيل تدفعلك اكتر علشان تعرف تألف اكتر واكتر يا غبى .. مؤلف حمار

Anonymous,  28/07/2011, 05:02  

انت عار على كل مسيحى شريف وعار على كل مصرى يحب يخدم فى جيش بلده
وانت اساسا عيل حَزَب خساره فيك الكلام
بص اختصار الكلام انت ( غزغز ) اساسا
تصدق سخنت عليك لما قولت ان العساكر حطت ايديها عليك وعلى البوكسر هههه
يا غزغز

Anonymous,  07/09/2011, 22:37  

ما طول ما انتوا عاملين نفسكم رجاله اوى وبتشتموا فى مايكل وانتوا مش اتحطيتوا فى الموقف ده هتفضلوا عيااااااااااااال مش رجاله يا شويه زباله. ما لو انتوا بتفكروا صح كنتوا عرفتوا ان الثورة قامت برضه علشان خالد سعيد واللى اتعمل فيه لكن كل واحد سافل لزم يقول الكلام بتاعكم ده. لكن انتوا لو بتفكروا صح هتعرفوا ان الجيش من اول يوم للريس المخلوع وهو مش معانا بدليل ان هما مش عايزين يحكموا لحد دلوقتى مع ان كل حاجه واضح مش محتاجه تاجل فى قضيه المخلوع .على العموم هى البلد دى هتفضل كدة طول عمرها وطول ما فيها ناس زيكم مش بتفكر .كل واحد عندكم يكون ليه تعامل مع اسرائيل او امريكا يبقى عميل وخنزير وكلامكم الفاضى ده . فعلا اوووووووووووووف عليكم شعب مش يستهل غير الاهانه والديكتاتوريا. اما مايكل ف هو فعلا رجل مش بالكلام لا بالفعل مش زيكم شويه عيال بتكلم ومش عارفه بتقول ايه اصلا كاتكم القرف شويه عيال مش رجاله

Anonymous,  12/09/2011, 19:53  

كداب وابن كداب

Anonymous,  14/09/2011, 06:00  

قيادات الجيش يلي دعمت مبارك لـ 30 سنة
ما رح توقف جنب الشعب لأنها هي اللي كانت حامية نظام مبارك
ومن أول الثورة ما كان لازم تقبلوا بحكم الطنطاوي الحامي ألأول لمبارك
وبالنسبة للتجنيد الإجباري في جميع دول العالم.. هاد استعباد لمصلحة الحاكم وليس لمصلحة الشعب .. يلي بدو يقاتل لشعبه ..لازم يكون بإرادته مو غصب عنه
نحنا في سوريا معك يا مايكل

Anonymous,  14/09/2011, 06:25  

نحنا بسوريا ... كان أسعد يوم عنا لما تنحى مبارك
وبكينا من الفرحة .. وما كنا مصدقين
وكنا مصدومين من شجاعة الشباب المصري
بس لما استلم الجيش ..عرفنا أنه الثورة ما انتهت
الجيوش العربية .. صراحة ضعيفة جداً.. لأنها لحماية الحاكم وليست لحماية الشعوب ... والوضع واحد في كل الدول العربية..عدا جيش حزب الله ..قوي جداً
لأنه كله متطوعين ..ومؤمن برسالته
وبالنسبة ليلي بتهجموا على مايكل.. بقلهم يروحوا يتثقفوا شوي ويعرفوا شو عم يصير ببلدهم
نتمنى للشعب المصري النجاح ونحنا عارفين أنه المصري
لن يعرف الصمت بعد اليوم .. أخوكم وائل

Anonymous,  20/09/2011, 18:03  

ملف فساد المخابرات العامة المصرية ومراد موافى والبحيرى
https://www.facebook.com/note.php?note_id=143817249046605

Anonymous,  04/10/2011, 00:47  

ده انت حتحفظ ازبار السجن الحربي زبر زبر انت قدها و قدود يا بطل

منتديات بنات مصر 06/10/2011, 17:43  

مدونة رائعة تسلم ايدك

Anonymous,  14/10/2011, 16:01  

hhhhhhhhhhhh ug yutg

Anonymous,  18/10/2011, 05:58  

صدق انت يا (انوني ماوس )انسان زبالة وابن زبالة
ومفيش حد خونة و ولاد كلب غيركم
مفيش حد خاين لمصر غير امثاللك وامثال اللي بتدافع عنهم
انت اظاهر منهم يا عميل
مشفناش حد عميل وجسوس مسيحي من 1967 لغاية النهاردة
كل الخونة منكم يا وطين
حتي الروساء العرب كلهم خاينين
بيبيعوا شعوبهم علشان مصالحهم الشخصية
ياواطي

Anonymous,  24/10/2011, 09:52  

بص انا مش هشكك فى كلامك ولا اللى ممكن تكون اتعرضتلوا بس انتا مزودها شويةفى
موضوع عشر ضباط مخابرات والعنوان بتاع القصة يومين قضيتهم لدى المخابرات
انا حسيت انك بتضيف كلمة المخابرات عشان تحسسنا بالاهمية بس حسيت كمان انك فيها حاجة ناقصة عندك وانتا بتعوضها وكل شوية مركزين معايا انا وانا قلتلتهم هما احسن منى عشان ميحسوش بالاحباط انا حاسس انك نسيت الثورة والهدف الرئيسى وبتتكلم عن انجازاتك وامجادك يعنى الولد اللى وقف قادم المدرعة فى شارع القصر العينى احد دلوقتى رافض يقول هوا مين عشان وانتا كل شوية انا قلت وعملت ورحت وسويت نسيت اصلا انتا نزلت ليه واهتميت بس بالشو بتاعك

Anonymous,  15/12/2011, 18:37  

انا شايف الحفظ القوي في ساعه حاسمه او وقت عصيب حيث وقد تم حفظ ارقام العربيات واسماء الضباط ورقم الوحده ايضا شايف كثر مصطلح الساعه 2 ونص- 2 ونص
مفهياش 2 وربع 10 الا ربع اي رقم ثاني ...... بصراحه يبدوا لي انك كاتب رواي يليق فيك التليف والابتكار مع العلم اني لست مصري ولكن افخر بالثوره المصريه وامقت الحكومه العربيه الحجريه المبنيه على التخلف والدكتاتوريه وتايدي التام والشام لنقل الامه العربيه لأحسن وارقى مما هي عليه الان تحياتي

Anonymous,  16/12/2011, 06:14  

أنا عارف إن جميع اللي بيشتموا بيكونوا عاوزين يقللوا من الحقيقة او عدم إظهارها والظاهر أن فيه ناس من الجيش او الشرطة بيشتغلوا بس للرد على مثل هذه المقالات وكل واحد قرأت تعليقه بطريقة سلبية فيها وقاحة تظهر أن الحصل لمايكل كان حقيقي هذه نقطه
أما النقطة الأخره لتأكيد أن مايكل صح اللي بيحصل الآن من الجيش في عدم إظهار أي حقيقة من الحقائق التي حدثت خلال وبعد الثورة فين الناس اللي بيحرقوا واللي بيقتلوا واللي بيضربوا وحتى الناس بتاعة الفلول لم نعرف عنهم أي شيء حتى الآن رغم أن الناس تعرف أسمائهم ولكن الخوف مازال يتملكنا من مثل ما لاقاه مايكل من فلول النظام الذي يظهر في مساعدة الجيش له ويجب أن يعلم المشرف على ردود الكتابات لمثل هذه المدونات أن يتكلم بطريقة غير الطريقة القذرة التي لم تتبدل منذ 60 سنه فالحقيقة تظهر من بين السطور التي تكتب من هؤلاء الأغبياء المسفهين لمثل هذه المدونات هذا ما يجعلني أو يجعل من يقرأ لمثل هذه المواضيع أن يشك في مصداقية حكامنا الذي يرأسهم المجلس العسكري

nadia 16/12/2011, 19:55  

أنا حزينة للي حصلك من مصري لمصري. لكن أحب أقول لك إن البابا شنودة لولا حكمته ماكنتش أنت تقدر تتكلم بحرية وبشجاعة. وأنا حصليلك إن ربنا ينصرك ويحقق أمانيك. وإذا كنت أرثوذكسي من فضلك لا تسئ إلي الكهنوت والي أبونا كلنا وربنا معاك

عمرو علوان 31/12/2011, 01:51  

عمرو علوان
اسكندرية
التيار الليبرالي الحر
--------------------
1- ربنا يكون ف عونك يا ميكل .. انتا بطل
2- نصدقك 100% عشان الكلام دا حصل معايا من رجالة مخابرات بردو بس الكلام دا قبل الثورة بكام سنة, انضربت و اتهنت .. و اوقفت من ممارسة عملي 6 سنوات بعدهم عندما حاولت اعادة مزاولة النشاط .. فوجئت بشطبي من نقابتي !
3- الجيش و الشعب نسيج واحد .. بس مجلس قيادة الجيش مش مع مصالح مصر .. دول عالم حوش .. اللي كان فيهم وزير دفاع بقى رئيس جمهورية .. و مش حيسيب السلطة بالساهل غير لما يكون فلوس تأمن عياله 10 سنين قدام خارج مصر لانهم مش حيقدروا يعيشوا فيها بعد اللي عمله ابوهم في أهلها و شبابها
4- الثورة محققتش حاجة حتى الآن .. و يجب ان يستمر كفاحنا عشان إخنا اللي حنبني مصر مش الحوش العسكر ولا الحوش الكنبوية غير الشرفاء .. الحوش الغوغاء اللي على شاكلة كائن العكاشة ... عشان فيه كنبوية شرفاء.
5- الثورة مستمرة .. البلد دي مش بلد الناس اللي في السبعين و الثمانين من أعمارهم دي بلد الشباب .. و لازم ترجع لينا عشان ولادنا ميدعوش علينا ..
6- يا عزيزي مايكل .. الناس اللي بتشتمك هنا دي مكتبتش أسماءهم عشان لم الثورة بتاعتنا دي حتنجح حتلاقيهم حنا واقفين جنبك و يعملوا انفسهم من الثوار ... و يألفا روايات عن بطولاتهم في مكافحة الظلم العسكري .. قبل و بعد الثورة المجيدة ..
7- سؤال أوجهه لكل من يقف مؤيدا لمبارك أو للمجلس العسكري اليوم :
بعد عشر نوات عندما تصبح ثورة الخامس و العشرون من يناير .. مقررا مدرسيا لطلبة المدارس في ماة التاريخ .. و يجيلك ابنك او بنتك .. يسألك يا بابا انتا كنت فين في الميدان .. أو كنت مع-من الثوار ولا من الفلول / المؤيدين للعسكر/مبارك ... خحترد عليه/ها بأنهي عين و حتقوله/ها ايه ؟

Anonymous,  18/01/2012, 08:00  

25 JANUARY IS THE END OF ALL THE TRADERs LIKE YOU .

ahmadhamad7676 21/01/2012, 21:28  

بكل صراحه اننا بعدنا عن الله ونسينا انفسنا فنسانا الله ولابد من الرجوع الي الله بقلوبنا وليس بامظاهر (نسوا الله فأنساهم انفسهم ) ولاتحسبن الله بغافلا عما تعملون

Anonymous,  25/01/2012, 09:40  

I'm so happy you are free now, I know you had a very tough time. take care of your selfe Micheal,not just because of you, but for sake of your parents and every one loves you. May our Lord bless you Micheal

Anonymous,  11/02/2012, 15:14  

يارتنا صدقنا كلامك من الاول قبل متحصل كل المجازدى ماسبيرو محمد محمود رئاسه الوزرا بورسعيد وحاجات تانيه بتحصل فى الخفا من العسكر الانجاس
بس بردو مكملين وعن شرف بلدنا مدافعين

يسقط يسقط حكم العسكر

Anonymous,  04/04/2012, 00:03  

كداب ووسعت منك اوي وراجع الكلام الي انت كتبته زي الظابط الي قلك اخيرا ده علي اساس ان انت مدوخهم يابابا الداخليه لما بتعوز تجيب حد بتجيبه فما بالك المخابرات تاني حاجه ظابط المخابرات مبيعرفش حد انه مخابرات زي مانت بتقول ان العسكري قلك كده وحاجه تاني الظابط الي قلك اخيرا معني كده انك مدوخهم ومش عارفين يجيبوك امال العسكري اخد الموبايل وبطاقتك ليه بالذات الا اذا كانو قصدينك وكمان انت بتقول المبني فيه 16 زنزانه عرفت ازاي وانت عينك مغمضه حتي لو عينك مفتحه مش معقول يكونو بيفرجوك علي ديكورات الزنازين الي عندهم او بيوروك مستوي المعيشه للمعتقلين وبعدين انا ملاحظ انك مش بتلبس ساعات يبقي عرفت الساعه من الموبايل في الحمام هو الموبايل مش كان متاخد منك وحلوه كلمه كان في ظابط وسخ فكرتني بكريم عبد العزيز في ولاد العم وبعدين ياحبيبي حكومتك تقطع باسبورات اجانب ليه ملهمش سفارات انت اكيد مكنتش متغطي كويس وبالنسبه لموضوع التاكس هما مخافوش تسال سواق التاكس هو اخدك منين وبعدين ياعم كتر خيرهم انهم ركبوك تاكس اهل كرم والله بس مالهومش حق كان واجب عليك يوصلوك بنفسهم وفي حاجات تاني كتير تبين انك بتحور في كلامك بس انا مش هكتب اكتر من كده والسوال الي محيرني مين الي حاسب سواق التاكس انت الي دفعت البونديره ولا المخابرات ولو المخابرات لازم ساعتها يبقي في رقابه علي ميزانيه وزاره الدفاع في مجلس الشعب علشان فلوس التاكس دي كده تبديد للمال العام واهداره وعيب علي ظابط المخابرات انه سابك تروح لغايه البيت لوحدك كان اصولا يوصلك لحضن ماما ونصيحه مني انت محتاج لعلاج نفسي في عياده في كوبري القبه باين

Anonymous,  15/04/2014, 20:26  

برغم اني أحمد الله على عدم تعرضي للمهانة القاسية التي تعرضت لها في مقرات جهاز المخابرات العامة، إلا إني مصدقك فعلاً لإني سمعت برضو حكايات مش نظيفة خالص عن دور المخابرات في الداخل والخارج وكذلك التدهور والانقسام الي البلد وصلتله، برغم محاولات غسيل الدماغ الي بيحاولوا يعملوه بأفلام كلمة وطن وغيرها من الي مذاعة على اليوتيوب والتطبيل الي متوليينه بعض الشخصيات الإعلامية ذات العقلية الأمنجية. ولا حل في رأيي سوى بأمرين: الأول الاستمرار بلا هوادة في فضح الجهاز وأعضاءه على أوسع نطاق شعبي وإعلامي ممكن من خلال تدشين حملة شايفنكم ورفع شعار "الشعب يريد تطهير الجهاز" لمطالب الثورة مستمرة، والثاني الضغط الشعبي نحو اخضاع الجهاز وكل هيئاته لرقابة البرلمان وتطبيق القانون عليه مثل أي مؤسسة في الدولة، فلا يمكن القول إنه هيئة مستقلة ويسمح لها بالتواجد في كل أجهزة الدولة، لابد من تحديد صلاحيات الجهاز وعدم توسيعها بشكل هلامي. وفي هذا، أعتقد ضرورة تجهيز ملف يتضمن كل ما يتعلق بانحرافات وتجاوزات المخابرات من مقالات وشكاوي وشهادات شخصيات ذات صلة بالموضوع وعرضه على النائب العام لاتخاذ اللازم في هذا الشأن. ربنا يحمي مصر وشعبها من شرور من يتولون أمرها .. آسف لاختياري عدم الافصاح عن شخصيتي وذلك لإني عارف ان في ناس قليلة الأدب هتحاول تجرح في شهادتي..

Arzu Cantürk 07/04/2016, 13:03  

This beautiful, and useful information for lessons that you taught us to thank you very much for.
You did such a beautiful paylasimlar. We know a very nice advantage of these shares.
Such Kuželka issues continued to expect every time.
Thank you so much.
You have a good thing.
Sesli Chat ne-nerede nenerede bonibon
speakychat sesliduy sesliduy sesliduy sesliduy seslichat seslichat seslichat sesli sohbet seslisohbet seslichat seslisayfam seslisayfam seslisayfam seslisayfam seslisayfam seslicevher seslisayfam seslicevher seslicevher sesli dunya seslidunya sesli dünya seslipop seslipop seslipop kral tv sesli 18 web tasarim video klip videoklip faceebook kürtce chatSchlüsselnotdienst Hamburg Schlüsseldienst Hamburg Schlüsseldienst Hamburg

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP