أجل تجنيدك مع الحزب الوطنى الديموقراطى

يافطة كبيرة متعلقة على مقر الحزب الوطنى فى أسيوط ... عن المعهد الوحيد فى الجمهورية ، اللى بيأجل الخدمة العسكرية ، طبقا لقرار من وزير الدفاع

يعنى ، الصور مش محتاجة تعليقات كتير

حتى الحزب الوطنى بقى معترف أن الناس مش عايزة تدخل الجيش ، و بقى بيستخدم النقطة دى فى الدعاية لنفسة و لمشروعات رجال الأعمال اللى فى الحزب

و الموضوع بقى لعبة ماسخة ... يجبروك أنك تدخل الجيش ، و بعدين يقولك أنة يقدر يأجلك جيشك لو هتنضم للحزب الوطنى و تدفع فلوس فى المعهد الخاص بتاع فلان الفلانى عضو الحزب

دة غير بقى عدم حيادية مؤسسات الدولة ، يعنى يا وزير الدفاع اللى مدافعتش عن مصر ولا مرة فى ال 19 سنة اللى انت فيهم فى منصبك ... فية فى مصر 20 جامعة حكومية ، و زييهم حوالى 20 جامعة خاصة ، فيهم ما لا يقل عن 300 كلية و معهد ... أشمعنى المعهد دة اللى يأجل التجنيد ؟ ماهو يا الكل يتأجل ، يا الكل ميتأجلش ... أنا شخصيا معرفتش أقدم على دراسات عليا علشان معيش ورق الجيش ... هو أنت وزير دفاع مصر ولا وزير دفاع الحزب الوطنى ؟

دة غير بقى الكلام التقليدى بتاع تخريب التعليم الحكومى لصالح التعليم الخاص ... الدولة بقيت بتخلق كل الأسباب اللى تميز التعليم الخاص ، و دة ميضايقنيش كشخص ليبرالى ، لكن دة لو خساير التعليم الحكومى مش بتتدفع من ضرايبنا ، و لو مش هنتعرض لضرر من تخريب التعليم الحكومى ... يعنى التعليم الحكومى من ضرايبنا ، و بتعاقبونا علشان دخلناه ؟ ... أحنا قدام حالة من التمييز الطبقى بين المواطنين ، و اللى بتتشرع علشان تعفى أبناء الجامعات الخاصة من الخدمة العسكرية ، فى الوقت اللى فية أبناء الجامعات الحكومية بيتم أستخدامهم كعبيد فى الجيش

ولا عزاء للمصريين

موضوعات ذات صلة

أنضم معانا لجروب : لا للتجنيد الأجبارى
حركة لا للتجنيد الإجبارى - فكرة عامة
عشرة أسباب تجعل السجن أفضل من الجيش

فيديو

حلقة البى بى سى عن التجنيد الإجبارى

ندوة : التجنيد الإجبارى بين الرفض و القبول