تهديد ببلاغ ضدى للمخابرات العامة

>> 02 June 2010



مساء الخير على الأخوة السهرانين زى حالاتى ، و صباح الخير على الناس اللى هيقروا المقال دة لما يصحوا من النوم بكرة الصبح

مبدئيا ، أنا مش من النوع اللى بتفزع لما حد يهددنى ... عادى يعنى ، بتوصلنى تهديدات كل يوم ، و ساعات من ناس ليها وزنها ، و مش بعمل أكتر من أنى أضحك على العقليات اللى لسة بتتعامل بأسلوب العصور الوسطى لحد النهاردة

المهم ، من كام ساعة ، كانت الساعة 11 و تلت ، يوم 1 يونيو بالليل ( اللى هو بقى أمبارح يعنى ، علشان عدينا 12 بالليل ) ... لقيت الرسالة دى واصلانى على الفيس ، مش شخص اسمة : Asim Sabry عاصم صبرى



انت اسرائيلى حقير
لذللك تقدمنا لاداره الفيس بوك والمخابرات العامه بشكوى ضدك وبصوره مقدمه من صفحتك الللعينه لاتخاذ قرار الغاءك وغلق هذه الصفحه فورا وسوف تعلم من هم المسلمون


و دة بروفايله


عادى يعنى ، شخص حاسس أنة مقهور من كلامى ، و أنة مش عارف يرد على الرأى بالرأى ، فبيعبر عن قهرة و ضعفة برسالة التهديد الوضيعة دى

بس اللى لفت أنتباهى فى الموضوع ، التشابة الجميل بين الرسالة و بين التعليق اللى جة لأحمد مصطفى قبل ما يتحول للمحاكمة العسكرية
أحمد مدون مصرى ، و ناشط فى حركة 6 أبريل ، و كان كتب نوت قبل كدة عن الفساد فى المؤسسة العسكرية ... بعد سنة من كتابة النوت حد دخل على مدونتة ، و كتب تعليق شبية جدا بالرسالة اللى وصلتنى من ساعات ، و قالة أنة هيبلغ عنة ... و فى خلال أيام ، تم القبض على أحمد مصطفى و تحويلة لمحاكمة عسكرية أقل ما توصف بية أنها مش محاكمة أصلا ، يعنى شوية عساكر بيتفاهموا يحكموا علية بأية و خلاص ... لا محكمة ولا نيلة

المهم ، التشابة بين رسالة الأخ عاصم و بين التعليق اللى جة على مدونة أحمد مصطفى ، هو اللى خلانى اكتب النوت دة ... طبعا انا قفلت رسالتة و قعدت أكمل الفيلم اللى كنت بحضرة ، و مستمتع جدا بحياتى ... و جاى دلوقتى أفرجكم على العقليات الموجودة فى البلد

بس طالما أتكلمنا ، يبقى نرد شوية على الاخ عاصم

أولا يا حبيبى ، الفيسبوك دة تبلة و تشرب ميتة ... أنا أساسا عزلت من على الفيس من زمان ... دلوقتى بقى عندى دومين بأسمى ، و مش محتاج للفيس دة فى حاجة ... دة بغض النظر عن ان الفيس عارفنى كويس ، و معلم عليا ، و بطل يسمع لأمثالك ... بدليل أنة مرضيش يمسح جروب " لا للتجنيد الإجبارى " ، و فضل مخبية شهرين و بعدين رجعة تانى ... دة غير أنة مش بيرضى يمسح حسابى رغم ألوف الريبورتات اللى بتيجى من الأرهابيين أمثالك ... فأحب أطمنك أن الفيس أعقل من أنة يسمع لواحد زيك ، و أذا عمل ، فميفرقش معايا بنكلة

ثانيا : بلغت عنى المخابرات العامة ؟ ... طيب كتر ألف خيرك يا حبيبى ... أصل أنا بلغت عن نفسى للمخابرات 3 مرات فى خلال الشهر اللى فات ، و هما مش راضيين يبعتولى ... فياريت يا حبيبى يسمعوا منك و يهتموا و يبعتولى ... أصلى يا حبيبى داخل جيش ، و بملى أستمارات للمخابرات فيها نشاطى السياسى ، و نفسى يبعتولى المخابرات علشان أروح أتفرج عليهم ، بس هما عاملين تقال و مش راضيين يبعتولى ... فياريت بلاغك يجيب فايدة

ثالثا : أنت فاكر المخابرات مش عارفينى ؟ ... هيا المخابرات محتاجاك أنت علشان تعرفنى ؟ ... يابنى دى المخابرات بتسأل عليا الناس بالأسم ... دول يعرفونى من 2007 ، من ايام ما كانوا بيعملوا تحريات عنى فى تهمة تبشير بالمسيحية ، و اللى كان نفسى يعملوها قضية بجد ، علشان العالم كلة يتفرج على أجهزة المخابرات اللى عقلها صغير و بتعمل قضايا بالشكل دة

رابعا : ممكن تقولى هتتهمنى قدام المخابرات بأية ؟ ... هتقولهم أنى مع السلام مع أسرائيل ؟ طيب ما حسنى مبارك نفسة عامل سلام مع أسرائيل ... هتقولهم أنى مع حصار غزة ؟ طيب ما حسنى مبارك نفسة هو اللى محاصر غزة ... أنت يابنى متخيل أنهم هيتهمونى بحاجة بيعملها رئيس الدمهورية ذات نفسة ؟ ( مفيش خطأ أملائى فى الجملة دى )

ثم مخابرات عامة أية اللى أنت هتروحلها ؟ ... مش عمر سليمان رئيس جهاز المخابرات دة اللى كل يومين يروح أسرائيل يقعد مع ظباط الموساد علشان يرتب معاهم المفاوضات مع حماس ؟ ... مش المخابرات العامة دى هيا اللى بتاخد النشطاء بتوع حماس و تعذبهم ، علشان تعرف منهم معلومات عسكرية عن حماس ، تديها لأسرائيل ؟ و فى مرة موتوا واحد من التعذيب ، و طلعت حماس بعدها تشجب و تندد ؟ ... مش المخابرات العامة دى سيادتك هيا اللى عارفة أن فية مصريين مسجونين فى جوانتانمو ، قربوا يكملوا 10 سنين ، من غير ما يتحاكموا أصلا ، و المخابرات عاملة نفسها مش واخدة بالها ؟ ... مخابرات مين يا حج ؟ ... يا عزيزى ، المؤسسة العسكرية هى المؤسسة الوحيدة فى مصر اللى عندها علاقات قوية جدا ، و متينة جدا ، بأسرائيل و بأمريكا ... و سيادتك رايحلهم برجليك ، أدعى بس أنهم ميقبضوش عليك

رابعا بقى ولا خامسا ( اللى بيعد يشوف بقى ) ... أنت شايف أن رسالة زى دى هتخلى حد يحترم الإسلام ؟ ... هو فية حد هيحترم دين بيهدد أى حد مختلف معاه فى الرأى ؟ ... صورة المسلمين حوالين العالم هيبقى شكلها أية بعد مقال زى دة ، و المقالات اللى زية ؟ ... أنا بالتأكيد فاهم أنك لا تعبر عن الإسلام ، و أن المسلمين هيقولوا أنك غلطان ... بس سؤالى ليك انت : شوف أنت خليت شكل الإسلام أزاى بتصرفك المتهور دة ؟
و أحب أقولك حاجة يا حبيبى ... لو فى يوم من الأيام أتعملتلى قضية ، هتشوف بعينك أن فريق الدفاع بتاعى هيكون كلة مسلمين ، و مش هخلى فية حد مسيحى ... علشان أنت و أمثالك تفهموا أن الصراع مش صراع مسيحى و مسلم ، لكنة صراع بين قيم الديموقراطية و الدولة المدنية ، و بين قيم الرجعية و الفاشية العسكرية و الدينية

أخيرا يا عزيزى ، مفيش حاجة أقدر أقدمهالك غير الصورة دى ... هيا الرد المنطقى الوحيد على أمثالك



موضوعات ذات صلة

فضيحة الكلية الحربية - أحمد مصطفى .. المقال اللى ودا صاحبة ورا الشمس

احمد مصطفي .. التعليقات مبتكدبش

28 comments:

ahmed montaser 02/06/2010, 08:59  

الله عليك
اديهم ف سنانهم هع هع

Anonymous,  02/06/2010, 17:54  

معلش يا مايكل يا صديقى
انت عارف الدنيا حر ومتربة والناس مش عارفه تكتب ايه
بس انا مكنتش اعرف انك اسرائيلى مش كنت تقولى؟ اصلى عاوز الطاقية اللى بيلبسوها

Anonymous,  02/06/2010, 23:43  

والله أنت بنى آدم بضين فعلاً.. يعنى إيه إللى انت كاتبه ده ويفرق فى إيه؟؟ مهو الواحد كل يوم يجيله مليون تهديد سواء بسبب عقيدته أو أيديولوجيته الفكرية أو اتجاهه السياسى مش معقول كل شوية واحد هيجي يبضنا ويوافينا بكل كلب هدده زى ما يكون فرحان أوى بيه

Anonymous,  07/06/2010, 00:24  

انا متفق معاك في اغلب كلامك يا مايكل ماعدا انك تضم القيم الدينية في خانة الرجعية والفاشية
الدين ممكن يساعد جدا في الوحدة الوطنية واثراء الحياة الديموقراطية اذا كان اللي بيتكلمو بيه معتدلين وعاقلين ومنفتحين علي الاخر ومش بتكلم عن دين بذاته

Anonymous,  07/06/2010, 03:00  

ايه لازمته بس الصباع اللي في الاخر ده

اهو لو حد هايخدك علي امن الدولة مش هايخدك غير علشان الصباع ده :)

Ragab Kamal 22/12/2015, 10:05  



شركة الكمال لخدمات التنظيف فى االسعوديه فهي من الشركات المتميزه والرائدة فى مجال النظافة كما انها تتميز فى تنظيف فلل وتنظيف شقق حيث تتميز بسرعة كبيره فى تنفيذ

على مستوى من الجودة وبأقل الأسعار بالإضافة إلى إنها تصلك إينما كنت وفى أى وقت تريده وأهم ما يميز هذه الشركة عن الشركات الأخرى إنها تعطيك ضمان شامل

على جميع خدمتها وعلى كل الخدمات التى تقدمها شركة الكمال بالتنظيف بالمملكه العربيه السعوديه فإذا كنت فى حاجة إلى شركة مميزه ومتخصصة فى مجال النظافة فلا تتردد

من إختيار شركتنا شركة الكمال سوف يكون ذلك الإختيار مناسب لك،وسوف يسعدنا تقديم أعلى الخدمات لك فنحن نحرص دوما على راحة وساعدة العملاء لدينا والعمل على بقائهم فى حياة نظيفه ومريحه للعيل
شركة الكمال

شركة تنظيف بالرياض

شركة تنظيف بالدمام

شركة تنظيف بالطائف

شركة تنظيف

بجازان


شركة تنظيف بحائل

شركة تنظيف فلل بالرياض

شركة تنظيف فلل بالدمام

شركة تنظيف فلل بالطائف

شركة تنظيف فلل بجازان

شركة تنظيف فلل بحائل

شركة تنظيف شقق بالرياض

شركة تنظيف شقق بالدمام

شركة تنظيف شقق بالطائف

شركة تنظيف شقق بجازان

شركة تنظيف شقق بحائل


Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP