حوار صحفى أجراة معى المدون أحمد منتصر

>> 04 April 2009




فى آخر الشهر اللى فات ( مارس ) ، وصلتنى دعوة من الزميل المدون الليبرالى أحمد منتصر ، بأجراء حوار معايا ، كبداية لسلسلة حوارات هايعملها مع نشطاء الفيسبوك
أحمد منتصر من المدونين اللى بحبهم جدا ، بيكتب بجراءة ، و أفكارة طالعة من عقل حر مالهوش سقف ، و عندة الشجاعة انة يدخل معارك فكرية مع الظلاميين و الرجعيين
بشكر أحمد منتصر على حوارة ، و على أختيارى أول واحد يعمل معاة الحوار ، و أسيبكم تقروا نص الحوار ، كما نشرة أحمد منتصر على الفيسبوك

حوار مع مايكل نبيل
دي سلسلة حوارات بدأت أعملها مع مجموعة من أشهر الناس ع الفيس بوك زي مايكل نبيل وباهر وأحمد بدوي وإسماعيل النجار ونيو إنسان وأحمد زيدان لأني شايف إننا كمجتمع فيس بوك لينا برضه نجوم زي نجوم السينما والفن والأدب وهما دول بعض من نجوم الفيس بوك.
مطولش عليكو مايكل نبيل فيسبوكاوي يعتبر قديم بقاله شهور كتيرة بيناقش ويتفاعل ويكتب ويخش ف معارك فكرية هنا وهناك. لذا كان معه هذا الحوار.

- مايكل باشا إنت اتنقلت ف كذا حزب ف فترة زمنية بسيطة جدا مقارنة بعمرك السياسي مش شايف إن ده شيء مربك ليك؟
أبدا ... أنا الأربع أحزاب اللى عديت عليهم كانوا كلهم ليبراليين ، نفس المبادئ تقريبا ، يعنى مفيش أى أرتباك فكرى من أى نوع ... و كمان انا لازلت محتفظ بعلاقاتى بالناس فى الأحزاب اللى سبتها ، و لازلت بتعاون معاهم فى أى فرصة تيجى
كمان أنا مش بشوف التغيير أنة حاجة وحشة أو أنة دليل على التذبذب ... لما الواحد يشوف نفسة ماشى فى حاجة فاشلة ، يبقى أحسنلة أنة يغير بسرعة ، أحسن ما يضيع وقتة فى تجارب فاشلة

- إنت من أسيوط طب بتفكر تستقر بعيدا عن الصعيد؟
بصراحة أنا أمنيتى أنى أستقر فى الصعيد ... هنا أقدر أنجح بسرعة جدا ... أنا فى خلال 3 سنين بس بقيت بتزعم تنظيم ناشئ فى حوالى 5 محافظات فى الصعيد ، تخيل بعد 10 سنين ممكن أبقى أية ؟ ... بس للأسف ، أعتقد أنى هضطر أسيب الصعيد قريب ، لأن مفيش شغل سياسى أحترافى فى الصعيد ، و أنا محتاج أشتغل علشان أعيش

- هل ليك علاقة بأمن الدولة يعني مثلا لما تحب تعمل نشاط بأسيوط بتعلمهم الأول؟
علاقتى بأمن الدولة لا تتعدى علاقة القط بالفار ... عمرى ما رحتلهم ، ولا عمرى ما رديت على تليفوناتهم ، ولا عمرى ما أستأذنت منهم فى حاجة ، ولا هستأذن ... أنا بعمل اللى يعجبنى ، و هما لو مش عاجبهم يقبضوا على ، و يورونى هايقبضوا على أزاى ؟
أنا بينى و بين أمن الدولة عداء شديد ، و السبب فى كدة تعديهم على حياتى الشخصية أكتر من مرة ... مرة بتعذيب أحد أقاربى فى قسم شرطة لمدة 3 أيام ، و مرة بالتهديدات الأرهابية اللى بتجيلى كل شوية تحت أشرافهم ، و مرة بمضايقتهم ليا فى الكلية بأستمرار ، و مرة بأفسادهم لعلاقتى بأسرتى ، و مرات بزرع مخبرين جوا أنشطتى الحزبية و تخريبها من الداخل ... الحرب بينى و بين مباحث أمن الدولة مش هاتنتهى ألا بحل جهاز مباحث أمن الدولة نهائيا

- إيه رأيك ف الجواز؟ وما مواصفات فتاة أحلامك؟
أنا شايف أن منظومة الزواج الأجتماعى القديمة مابقتش تنفع ، و انها هاتنهار قريب ... لكن دة مايمنعش من انى أحب أرتبط بواحدة أحبها ، و أعيش معاها عمرى كلة ، بس دة هايبقى بقواعد أحنا نحطها بإيدينا ، مش بالقواعد اللى حطتها التقاليد و الأديان و الموروثات
مواصفة فتاة أحلامى : أنها تكون مثقفة جدا ، و يفضل تكون بتكتب ، و تكون بتفهمنى إلى مدى كبير ... تتقبل طبيعة عملى كسياسى ، و اللى ممكن يفرض عليا حاجات مش كل البنات بتقبلها ... و تكون جميلة ( الجمال فى مفهومى فن ، مش جينات ، بمعنى ان كل البنات جميلات لكن مش كل البنات يعرفوا يظهروا جمالهم (

- إحنا عارفين إنك كاتب وكاتب جيد كمان لكن هل ليك هوايات تانية غير القراءة والكتابة؟
أنا بحب العمل الجماهيرى جدا ، أحب أتواجد وسط الناس و أنشط معاهم ... بحب العمل العام و تقديم المساعدات للغير ... بحب المناقشات الفلسفية و الفكرية ... بحب الكومبيوتر جدا ... بحب السفر و أستكشاف الثقافات المختلفة

- من صورك ف بروفايلك عرفنا إنك زرت أيمن نور ف بيته ومكتبه فما رأيك ف أيمن نور بصراحة؟
أنا شايف أيمن نور زعيم سياسى ليبرالى عالمانى ، لية دور مش قليل فى الحراك السياسى اللى أحنا بنعيشة حاليا ، و اتوقع لية دور أكبر فى المرحلة الجاية ... طبعا كل شخص لية أخطاؤة و عيوبة ، و مفيش على الأرض شخص مثالى ، و ضرورى نفهم انة عمرنا ما هيجيلنا المخلص المثالى ، لكننا بنختار من بين بدايل ، و أنا شايف أيمن نور أحسن بديل مطروح حاليا على الساحة السياسية ... لكن دة ماينفيش أنى ليا علية تعليقات و ملاحظات شايف أنة ضرورى يعملها علشان ينجح

- تعاونت فترة قبل استلام مقر حزب الجبهة بأسيوط مع أعضاء حزب التجمع فهل ترى إن اليساريين واليمينيين ممكن يتعاونوا أو يتلاقوا ف نقاط مشتركة؟ وهل ف ده فائدة؟
مفيش أى أتنين على الأرض مش هيلاقوا أرضية مشتركة يشتغلوا عليها لو حبوا يعملوا دة ... تشرشل لية مقولة مشهورة جدا بيقول فيها " أنا مستعد أنى أتعاون مع الشيطان من أجل مصلحة بريطانيا " ، و انا برضة مستعد أتعاون مع أى حد علشان مصلحة حزبى و بلدى ، و معنديش مانع من أنى أتعاون مع أى حد و لو حتى الأخوان المسلمين
اليمين و اليسار بيتلاقوا فى نقط كتير أوى ... أحنا تقريبا متفقين مع التجمع تماما فى الحريات السياسية و الدينية و الجنسية و الفردية ... بنختلف معاهم فى الأقتصاد و السياسة الخارجية ... و اليسار المعتدل ( اللى هوا ممثل فى التجمع ) مستنير و تقدمى ، و ممكن يتعمل معاة شغل ناجح جدا لو اليسار بطل يحشر تابوهاتة الأقتصادية فى كل جملة

- نفسك تطول شعرك هع هع؟
أنا أبتديت فعلا أطولة من كام شهر ... أصبر بس كام شهر كمان يكون طول أكتر ، و يكون شكلة أتظبط

- لو نزلنالك نحن معشر الفيس بوك ف أسيوط حتستقبلنا إزاي ونقدر نعمل إيه عندكم؟
هستقبلكم بعشر عربيات أمن مركزى ، و نص كتيبة دفاع جوى .... هع هع هع
الناس هنا فى الصعيد مش بيشوفوا رموز ثقافية أو سياسية ألا نادرا ... فكل لما حد بيجيلى من القاهرة ، بعملة حشد كبير ، ألم فية أكبر قدر من الناس ، و عندنا مقر حزب الجبهة مفتوح لكل الضيوف ... و دى بتبقى فرصة للناس هنا أنها تستفيد من خبرات ضيوفنا

- بمناسبة إنك ليبرالي ظهرت بعض التوليفات بين الليبرالية وحاجات تانية فلقينا ناس بتقول على نفسها ليبرو اشتراكي وناس بتقول على نفسه ليبرو إسلامي إنت إيه رأيك ف الكلام ده؟
الموضوع هايختلف لو هقول رأيى كمثقف ولا كسياسى
كمثقف ، التوليفات دى هرجلة ، لأن الليبرالية فلسفة ، ماينفعش تبنى عليها حاجة بتتناقض معاها
كسياسى ، عادى جدا و مقبول جدا ... لأن الليبرالية فيها جوانب كتير ، ممكن تقبل منها جوانب و ترفض جوانب تانية ... يعنى الليبراليين فى أمريكا ( الديموقراط ) بيقبلوا الجوانب الأجتماعية و السياسية من الليبرالية ، و بيرفضوا الجوانب الأقتصادية نسبيا ... المحافظين فى أمريكا ( ليبراليين برضة ) بيقبلوا الجوانب الأقتصادية و السياسية منها ، لكنهم بيرفضوا الجوانب الدينية و الأجتماعية و الفردية ... اليمين المسيحى فى أمريكا ( ليبرالى برضة ) بيقبل الجوانب الأقتصادية و السياسية و الفكرية ، لكنة بيرفض الجوانب الدينية و الجنسية ... أنا شخصيا لما قريت كتاب " عن الحرية " بتاع جون ستيوارت ميل ، اللى هو يعتبر أساس الفلسفة الليبرالية ، أختلفت معاة فى نقط كتير ... الفكرة فى الليبرالية مش التطابق التام فى الأفكار ، و لكن قبول الآخر المختلف ، و قبول الأختلاف كحقيقة لا يمكن الهرب منها

- بتحب تحتفل بعيد ميلادك ولا ملكش ف الحاجات دية ؟
صدقنى ، ساعات بيعدى من غير ما أحس بية ... رع يسامح أسرتى بقى على العزلة الانسانية اللى حطونى فيها

- بما إنك فيسبوكاوي آخر حاجة هل إنت شايف إن الواحد يعبر عما بنفسه كاملا قدام صحابه ع الفيس بوك ولا شايف ده عيب أو سذاجة؟
بص ، أنا شايف أن الأنسان طالما مش بيعمل حاجة غلط ، يبقى يخبيها لية ؟ ... اللى بيخبوا حياتهم الحقيقية عن الناس ، دول عندهم شيزوفرينيا و مش قادرين يتصالحوا مع نفسهم ولا مع رغباتهم الحقيقية ... لكن طبعا الأنسان بيحتاج لمساحة من الخصوصية يعيش فيها براحتة ، و مفيش مشكلة فى دة طالما هو مش بيعمل فى خصوصيتة حاجة و بيظهر للناس على أنة بيعمل عكسها

- ماذا يعني الفيس بوك ف حياة مايكل نبيل؟
بحبة و بكرهة ... بحبة علشان هو وسيلة ساعدتنى جدا أنى أتواصل مع ناس كتير جميلة ، بعضهم فى دول بعيدة مكنتش هعرف أتواصل معاهم من غير الفيسبوك ... أنا بقضى على الفيسبوك ساعات طويلة يوميا ، و من ساعة ما بفتحة الصبح بيفضل مفتوح عندى لحد آخر اليوم
لكنى فى نفس الوقت بكرهة ، لأنة قضى على المدونات و الجروبات اللى فى الأماكن التانية ( الياهوو و الجوجل ) ، فى نفس الوقت اللى مش بيدينا فية الأمكانيات اللى كنا بناخدها فى الأماكن التانية

- مين أقرب صحاب ليك ع الفيس بوك؟
أنا عندى قايمة مصغرة على الفيسبوك حاطط فيها أهم الأصدقاء عندى ... عددهم 8 ... أهمهم سيادتك و باهر و أحمد بدوى و أسماعيل النجار و ماجد ماهر و زيد طارق بن يوسف

- إيه أحب جروب ع الفيس بوك لقلبك؟
مفيش ... الفيسبوك علية جروبات كتيرة جدا ، و أنا مقدرش أبقى عضو فى كل الجروبات اللى بتجيلى دعوات ليها ... علشان كدة بنضم بس للجروبات بتاعة المؤسسات ( أحزاب و منظمات و جمعيات ) ، و دى بتبقى مهمة فى الأخبار و المعلومات ، لكنها فى نفس الوقت بتبقى ناشفة و مش ممتعة

- بتفكر تكتب كتاب ولو كده حيبقى عن إيه؟
أنا بفكر بقوة أنى أبتدى أطلع كتب ... لسة ماحددتش أية موضوع كتابى الأول ، بس هو أكيد هايبقى لية علاقة قوية بمقالاتى اللى بنشرها ... و أعتقد أنى هحاول أنشر حاجة ليها علاقة بالأنثروبولوجى أو بالدراسات المجتمعية ، بس لسة بفكر فى طريقة تبسط الحاجات دى للقراء

- بما إنك عضو هيئة عليا بحزب الجبهة الديمقراطية فهل شايف إن دور الحزب هو جذب الليبراليين أم صناعتهم؟
هو دور الاحزاب انها توصل للسلطة ، مش انها تصنع او تجذب ليبراليين ... بس لو مصر أنى أختار ، يبقى أنة يصنع ليبراليين ، لأن الليبراليين فى مصر ( اللى هما ليبراليين بجد ) قليلين و محتاجين يزيدوا ، دة غير أنى مش حابب نسحب الليبراليين اللى فى الأحزاب الليبرالية التانية ، لأننا كدة يبقى ماعملناش حاجة

- هل واجب على كل مواطن إنه يبقى عضو ف حزب ما؟
النسبة اللى بينصح بيها معظم أساتذة العلوم السياسية هى 30% من الشعب يكونوا أعضاء فى أحزاب ، و الباقيين يكونوا كتلة متحركة بيختاروا اللى يتوافق مع مصالحهم ، و أنا شايف أن النسبة دى ظريفة جدا

- لو أمكن إنشاء أحزاب غير سياسية ف مصر حتنضم لحزب موضوعه إيه؟
كل الأحزاب اللى بتصب فى مجال الحريات الفردية ، سواء كانت سلوكية او جنسية

- إنت طالب بطب بيطري هل فعلا متخيل نفسك ف المستقبل بتشتغل دكتور أم إنت حابب المادة العلمية وخلاص؟
ولا انا حابب المادة العلمية ، ولا هشتغل فى الطب البيطرى ... أنا مستنى اتخرج ، و هتفرغ للعمل السياسى

- إيه السيناريو إللي متخيل إنه حيحصل ف انتخابات مجلس الشعب 2010 وانتخابات الرئاسة 2011؟
فى 2010 ، المعارضة المدنية هتاخد مجموعة كويسة من المقاعد ، و الحزب الوطنى هايفضل محتفظ بالأغلبية ، لأنة هايعرف يزور ... فى 2010 ، هايبقى فية صراع قوى جدا مع المعارضة ، بس برضة ما أتوقعش أى فوز للمعارضة ، لأن برضة الحزب الوطنى هايعرف يزور ... بس انا برضة متفائل و مش شايف أننا المفروض نسكت ، لأن كل دى خطوات هاتقودنا لمرحلة التغيير الفعلى ، اللى هى هاتبقى فى أنتخابات البرلمان 2015 ، و أنتخابات الرئاسة 2017 ... لكن الأنتخابات اللى فى السنتين الجايين ، فدول بروفة بندرب فيهم نفسنا كأحزاب معارضة ، و بنحاول ناخد اكبر قدر ممكن من المقاعد فى البرلمان

- سياسة خارجية بقى هل شايف إن إيران ممكن تتوسع وتكبر وتبقى قوة عظمى قصاد أمريكا ف المستقبل زي الصين كده؟
أيران منهارة من الداخل ... الشعب الأيرانى مش متدين ، و بيكرة حكامة جدا ... أنا اتوقع ثورة ليبرالية فى أيران فى الفترة الجاية ، تطيح بالنظام الأسلامى فيها ... بس شوية صبر عليهم ، و هما هايبقوا كويسين

- بتحب تقرأ ف مجالات إيه؟
انا عموما بقرا فى كل حاجة ، بس أكتر حاجات بحبها : علم النفس ، الانثروبولوجى ، الفلسفة ، الأقتصاد ، علم الأجتماع ، التاريخ ، ثقافات الشعوب

- إيه رأيك ف فكرة الحوارات دية وإيه اقتراحاتك لإنجاح الفكرة؟
فكرة جميلة ، و أنا فكرت فيها قبل كدة ، بس مكنش عندى وقت ليها
أقتراحاتى تتخلص فى 3 نقط : أنك تعملها دعاية كويسة ، و أنها تعرف تستقطب شخصيات محبوبة و مشهورة ، و أنك تستمر فيها و ماتبطلش

- مين تحب يتعمل معاه حوار المرة الجاية؟
نيو أنسان - أيمن نور - أحمد زيدان - أحمد بدوى - زيد طارق بن يوسف - ماجد ماهر ... أختار منهم اللى يعجبك
و ألف شكر ليك على الحوار الجميل دة يا باشا

وبكده يكون أول حوار فيسبوكاوي خلص للأسف مع مايكل ماعنه ممتع جدا ليا شخصيا. بانتظار تعليقاتكم ولو تحبوا توجهوا أسئلة تانية لمايكل وجهوها استكمالا للحوار.

تم الحوار في مارس 2009.


2 comments:

^ H@fSS@^ 13/04/2009, 12:17  

"
تكون جميلة ( الجمال فى مفهومى فن ، مش جينات ، بمعنى ان كل البنات جميلات لكن مش كل البنات يعرفوا يظهروا جمالهم (
"
عجبتني اوي فلسفتك في موضوع الجمال ده
احييك بجد

Maikel Nabil Sanad مايكل نبيل سند 13/04/2009, 12:36  

@^ H@fSS@^

هى مش فلسفتى أوى
دة أصلا مثل فرنساوى ، جذورة فرعونية
و أنا بس مقتنع بالمثل دة

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP