عاجبنى أوى

>> 24 March 2009



- عاجبنى أوى نموذج الأب اللى جايب دش و بيحضر علية سكس ، و فى نفس الوقت مشفر القنوات علشان أولادة مايتفرجوش ... يعنى حلال لية ، حرام لغيرة !!

- عاجبنى أوى نموذج خادم الكنيسة ، اللى فى الكنيسة يكلم الأولاد عن خلاص المسيح ، و برا الكنيسة يشرب سجاير و يصاحب بنات !!

- عاجبنى أوى نموذج رجل الدين اللى بيستغل العمة وسيلة يدخل بيها بيوت الستات اللى بيعمل معاهم علاقات ... بالظبط زى بنات الدعارة اللى بيستخدموا النقاب جواز سفر يدخلوا بية أى مكان

- كان زمان الحرامى و هو بيسرق يقول يارب ... دلوقتى السرقة عن طريق الدين أتطورت !!
- عاجبنى أوى نموذج المعارض اللى طول النهار عمال ينتقد فى سلبيات النظام ، على الرغم من أنة فاسد اكتر من النظام ... بينتقد دكتاتورية الحكومة ، و هو جوا بيتة و حزبة و منظمتة دكتاتور أكتر من النظام بميت مرة ... بيتخانق كل يوم على الفلوس اللى بتتسرق من ميزانية الدولة ، و هو مش شاطر غير فى خداع منظمات التمويل الدولية و سرقة فلوسهم !!

- عاجبنى أوى أحزاب المعارضة اللى بتديرها مباحث أمن الدولة ... أول مرة فى التاريخ نشوف أحزاب معارضة وظيفتها الوحيدة أنها تعارض المعارضة !!

- عاجبنى أكتر الأسقف اللى عامل نفسة ملاك من السما ، و عمال يوعظ فينا ، و هو أساسا مش عارف عدد أسفار الكتاب المقدس كام !!

- عاجبنى جدا ال Feminist اللى طول النهار تقول أن الرجل الشرقى بيتصرف على أنة طفل كبير ، و أول ما تحب أو تتجوز ، تصر تعامل حبيبها على انها أمة !! ... تتكلم عن المساواة ، و بترفض المساواة فى التجنيد الاجبارى ... بتتكلم عن ضرورة احترام الراجل لمراتة ، و بعدين تختار أنها ترتبط برجل سادى يجيد أغتصابها كل ليلة !!

- عاجبنى جدا عمال المصانع اللى بيطلعوا فى مظاهرات ضد التوريث ، و تانى يوم بيعملوا أضراب يطالبوا فية بحقهم فى أولوية أولادهم فى التعيين فى مصانعهم !!


- عاجبنى جدا رجال الدين اللى بيحللوا زواج المتعة و بيحرموا الدعارة ... طيب مش يفهمونا الاول أية الفرق بين الأتنين ؟؟

- عاجبنى جدا جروب المدونين اللى كل أهتمامة أنة يفضح بشدة الشرطة المصرية كل لما تقبض على معارض سياسى ، و فى نفس الوقت بيطلب من مباحث أمن الدولة القبض على المبشرين و التطبيعيين ، و نزع الجنسية عن المصريين المتزوجين بأسرائيليات !!

- البعض يفهم الحرية على أنها : الحرية لى ، و القيود لكل من يختلف معى ... الحرية للشعب ، و لا حرية لأعداء الشعب ، ولا تستغرب حينما يقولون لك أن أعداء الشعب هم نفسهم الشعب

- عاجبنى جدا المؤمنين بنظرية و بيرفضوا تطبيقها ، و اللى مؤمنين بنظرية غير قابلة للتطبيق و مصرين ينفذوها طالما غيرهم هو اللى بيدفع فاتورة فشل النظرية !!

- عاجبنى جدا الحزب الوطنى اللى بيخصخص القطاع العام ، و هو فى نفس الوقت عضو فى المنظمة الأشتراكية الدولية ... و عاجبنى أكتر جمال مبارك اللى بيقول على نفسة ليبرالى و هو موافق على قانون الطوارئ و أضطهاد الأقليات و الرقابة على الصحف و على لجنة شئون الأحزاب ... ليبرالية أية دى يا أخواتى ؟؟؟

- عاجبنى جدا الناس الظريفة اللى بيقولولى أن أبويا من حقة أنة يشتمنى و يضربنى ، دة لمجرد أنة فى مرة مارس الجنس مع واحدة ، و كنت أنا النتيجة ... و فى نفس الوقت مش من حقى أنى أعملة نفس التصرفات دفاعا عن نفسى ، على الرغم من أن البادى أظلم ... الجريمة لما بتصدر من الشخص القوى بتبقى تأديب ، لكن لما بتصدر من الشخص الضغيف بتبقى أشر أنواع الجرايم على الأطلاق !!


- عاجبنى جدا الناس اللى بيقولوا أن ربنا عادل ، و فى نفس الوقت بيقولوا أن ربنا موجود ... أمال العدل مش موجود لية ؟

- عاجبنى جدا الناس اللى بيجرموا أزدراء الاديان ، و فى نفس الوقت بيقدسوا القرآن و التوراة و الأنجيل ، اللى كلهم ماليانين أزدراء للآديان الأخرى !! ... و عاجبنى أكتر رجال الدين اللى بيكلمونا كل يوم عن الأخلاق ، و هما بيقدسوا شوية مجرمين سافكى دماء و شتامين بيقولوا عليهم أنبياء

- عاجبنى جدا المسيحيين اللى بيتتريقوا على حادثة الأسراء و المعراج ، و بيقدسوا حادثة صعود أيليا للسماء ... بيهاجموا أغتيال فرج فودة و 11 سبتمبر ، و بيتناسوا هيباتيا و جاليليو و محرقة التلمود ، وبيعتبروا يشوع بن نون و يوشيا و أيليا قديسين رغم انهم كانوا مجرمين حرب

- عاجبنى برضة المسيحيين اللى مش عاجبهم كون الأسلام هو الدين الرسمى للدولة ، و فى كل قداس بيذكروا أسم الأمبراطور ثيئودوسيوس الكبير لأنة خلى المسيحية الدين الرسمى للدولة الرومانية زمان !!

- عاجبنى جدا الناس اللى بيقولوا أن الأنتحار حرام و جبن و هروب ، و فى نفس الوقت هما أكتر ناس بيحاولوا الأنتحار !!

- عاجبنى جدا الناس اللى بتتودد للرؤساء و العظماء ، حتى و هما عارفين أنهم مش هياخدوا منهم اى حاجة ... و فى نفس الوقت ، بيهينوا الناس البسيطة ، رغم أنهم عارفين أن الناس دى على أستعداد أنهم يضحوا بحياتهم علشانهم

- عاجبنى جدا القومجية و العروبجية اللى بيطالبوا بحق العودة للفلسطينيين ، و بيرفضوا يدوة للأرمن و الأسرائيليين و النوبيين و اليهود المصريين !!!

مجتمع غرقان لشوشتة فى الأزدواجية ، و مش عايز يبص فى المراية و يعرف حقيقتة

ما كفاية بقى نغطى تصرفاتنا !! ... أذا كانت صح بنخبيها لية ، و أذا كانت غلط بنعملها لية ؟؟ ... لية الحاجة لما تبقى لينا بتبقى حلال ، و لما تبقى لغيرنا تبقى حرام ؟



موضوعات ذات صلة


6 comments:

Anonymous,  03/04/2009, 20:45  

بنغطى تصرفتنا سواء صح ام خطا رغم اقتناعنا بيها لاننا تربينا على تقاليد وعرف ودين زرعت بداخلنا الخوف من التغيير والمواجهه ووضعت قيود على حريتنا مما جعلنا نلجا للخفاء ونتبنى نظرية الظاهر فالتدين اصبح ظاهريا تدين زائف وكل ما حولنا هكذا حتى سياستنا فالتغيير تغيير اشخاص وليس تغيير جوهرى ولا تغيير نظام فلا يكون لهذا التغيير اى تاثير يذكروكل ذللك سببه الجهل والقمع والاستبداد وعدم التمرس على ممارسة الحريه بشكل سليم

Anonymous,  07/04/2009, 14:22  

مرحبا اول مره اكتب فى مدونتك .. للاسف كلامك خطأ ..
يعجبنى تعبيرك عن الشئ الذى تراه من وجهة نظرك ..
لكن الا بحثت نظرة متواضعه و جربت تصحح خطأك و اتهاماتك ..

الحجاب عفة >> نعم عقة , لكن ان المحجبة تصاحب ولد و تخرج معاه مش عفة و مش دين ..
شئ جيد ان الانسان يصلى و يعرف ان ليه رب , يكفيك ان تنظر الى بياض وجه المؤمنين .. لتعرف ان فى طاعتهم هذه شئ غريب .. يكفى الراحة النفسية اللى ادمنا عليها بعد كل صلاة .. راحة نفسية و سلام مع كل شئ >> اليس هذا دليل على ان الاسلام دين صحيح ..
باين عليك ليبرالى لا دينى عموما .. لكن كلامك بيناقض نفسه ..
و للاسف فيه كثير من الاتهامات الباطلة

خادم الكنيسة و انا كمسلم اللى بيكلم الاولاد عن الايمان و بيصاحب بنات .. لازم ندخل جوه نفسه و نعرف ليه بيعمل كده اذا كان بيعمل كده تحدى لله يبقى ده فيه حاجة غلط و ده مش معناه ان كل خادم رجل سيئ .. بل ممكن يكون عند الله افضل ..
و فى الاخر ممكن يخطأ .. مش معناه انه سيئ من جواه انما معناه انه بيخطأ ..
ادم سجد له الملائكة و اخطأ .. هل ده معناه انه وحش ..

ممكن يكون طاهر جدا من جواه ..


و شكرا .. معك احمد
مسلم مؤمن و لله الحمد

Anonymous,  11/04/2009, 03:36  

الحجاب عفة غصبن عن عين امك
ولو كنت اعرف انك تريد النقاش بشكل موضوعي فهناك ما يرد به على كلامك الساذج المذكور
بالمناسبة انت فاضي؟ لو كنت مش شغال انصحك تضورلك على اي شغلانة تضيع فيها وقتك وترحم اهالينا شوية

ahmed shawky 18/05/2009, 09:44  

انا ما بقتش أفهمك زي الأول على فكره

Anonymous,  06/03/2012, 07:49  

الغريبة الناس الي خلقت من ماء مهين وبتتكبر على ربنا
الغريبة الناس الي بتتعره تحت مفهوم الحريه وتغاظت عن حرية الغير
الغريبه لمن حد بيشتم الدين السماوي وهو من ارذل الناس
الغريبة من استكبار البعض عن طاعت الخالق وعبوديته للشيطان
لان البني ادم في النهاية عبد اما ان تعبد الخالق او تكون عبد للمخلوقات
وفي عبادة الخالق رفعه وفي عبادة المخلوق مذله
عجبت للذي لا يتفكر ان السجود لله رفعه والسجود لغير الله مذله
فانت يامن كتبت في مدونتك العجيبة عاجبني اوي شئت ام ابيت عبد لكن للاسف اختارت ان تكون عبد للشيطان
ولو كان لك عقل سليم
انصحك بهذه التجربه قف امام منظر لشخصين احدهما ساجد لله والاخر ساجد لاي شيئ اخر ولاحظ الفرق بينهما
وصدقني ان لم تسجد لله وتستكبر شئت ام ابيت سيذلك الله ويجعلك تسجد لمن لا يرحمك
وستعيش المذله كل يوم
لاتتكبر وانت تدخل الحمام كل يوم
لاتتكبر وانت اعلم الناس برائحتك ان لم تغتسل
لاتتكبر وانت تدري من اين ولدتك امك
لا تتكبر

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP