الأمن بيهددنى من خلال والدى

>> 23 February 2009



النهاردة الصبح ، راح واحد من حرس جامعة أسيوط لوالدى فى مقر عملة ... والدى بيشتغل مدير لأحد البنوك الحكومية ... بس مراحلهوش علشان يخلص معاملة بنكية تخصة ... راحلة مخصوص علشانى ... حركة وسخة جديدة من أمن دولة أسيوط ، و أية الجديد ؟
فى الأول ، لعب دور الخباص ، و حكالة عن اللى حصل فى الجامعة يوم الخميس اللى فات ، و قالة أنى كنت بوزع منشورات جوا الجامعة ، و أنهم مسكونى و أخدوا كارنيهى ... و بعد كدة ، هددة و قالة أنهم مش هيدونى كارنيهى تانى ، مع مجموعة من التهديدات التقليدية اللى حافظينهم و بيقولوهم فى كل مرة ، مع أخبار معرفش صحتها بتقول أنى مش هنجح الترم دة فى أى مادة
المهم ، أنا زى ما كل الناس عارفة ، قاطع العلاقات مع أسرتى و مش بكلمهم ، فمعرفتش تفاصيل أكتر من كدة ... حاولت أعرف أسم الكلب اللى عمل الحركة دى ، لكن معرفتش ، بس هيروح منى فين ؟ مصيرى هعرفة
والدى برضة لية دوافعة فى أنة يغطى عليهم ... الله يرحم أيامة ، أيام ما كان بيحلف عليا و يقول عنى : " أبقى مرة و أبن مرة ، أن مسلمتهوش لأمن الدولة " ... دى جملة للتاريخ بس

طبعا حركة عادية و متوقعة ، و مش أول مرة يعملوها معايا ... حصلت قبل كدة كذا مرة ، بس يمكن دى أول مرة تبقى زيارة رسمية لحد من قرايبى فى محل عملة ، لمجرد التهديد
و بما أنى مش برد على تليفونات قمل الدولة ، و معنديش أستعداد يبقى فية حوار بينى و بينهم ، فأنا هرد عليهم هنا

أولا : أنا منفصل عن أسرتى ، و أبويا مش بيدينى و لو حتى قرش صاغ ، و بالتالى محدش لية حكم عليا .... يعنى الضغط علية مش هيجيب فايدة ، أعلى ما فى خيلكم أركبوة .... الراجل مش عارف يحكم على أنى أبص فى خلقتة ، تفتكروا هايحكم عليا أنى أبطل سياسة ؟
الحاجة الوحيدة اللى ممكن تكسبوها من الضغط على والدى ، أنكم تجبروة أنة يشوف حجم جرايمكم و جرايمة ... لحد ما ييجى يوم يفوق ، و ينقلب عليكم

ثانيا : أذا كان توزيع المنشورات فى الجامعة بيضايقكم للدرجادى ، فكتر خيركم أنكم بتلفتوا نظرى ... أنا تحت أمركم .... السنادى هقضيها كلها توزيع ورق فى الجامعة ، و برضة أعلى ما فى خيركم أركبوة

ثالثا : أوعوا تفتكروا أنى فى يوم هبطل سياسة ... نجوم السما أقربلكم
فى بداية 2006 ، لما أبتديت أمارس سياسة فعليا ، مكنتش عايز من السياسة أكتر من أنها تكون هواية بعد الضهر أستغل فيها وقت فراغى ... لكن التلاعب المستمر فى نتيجتى ، و اللى خلانى متخرجش لحد دلوقتى رغم انى كان المفروض اتخرج من سنتين ، خلانى أنسى التلت أربع معلومات اللى أتعلمتهم فى سنين الكلية ، و بالتالى بقى أحسنلى أنى أحترف سياسة
أنا مدين لغباء و جبروت الأمن بكل حاجة سياسية أنا فيها دلوقتى ... لولاهم كان زمانى مندوب أدوية بلف على الدكاترة و محدش يعرف عنى حاجة ، أو كنت فتحت عيادة بيطرية بقضى يومى فى توليد البقر و خياطة جروح الحمير
خلاص ، أنا أحترفت السياسة ... السياسة بقيت شغلتى و أكل عيشى ، و مليش غيرها ... لو سبتها ، هموت من الجوع ... تفتكروا أنا كدة ينفع أسيب السياسة ؟

يمكن من طول فترة وجودى فى الكلية ، أتعلمت حاجات كتيرة من الحيوانات ... و يهمكم دلوقتى أنكم تعرفوا أنى أتعلمت من الجمل أنة مابينساش .... الجمل بياخد طارة و لو بعد عشرين سنة ، و دة وقت كبير بالمقارنة بفترة حياة الجمل اللى هى تقريبا مابيتزيدش عن العشرين سنة ... ملحوظة علمية محدش عرف يلاقيلها تفسير لحد دلوقتى ، أنك لو أذيت جمل حتى لو كان صغير ، و الجمل مشافكش لسنين طويلة ، فأول ميشوفك هيكون لسة فاكرك و ينتقم منك
ماتخافوش ، أنا بعرفكم واحد واحد ، و فاكركم بالأسم ... و المعارضة مصيرها فى يوم تحكم ... و أوعدكم فى يوم بالأنتقام ، و بمحاكمات عادلة ... نفذوا تعليماتكم يا عبيد العادلى ، و أطمئنوا ، دوام الحال من المحال

موضوعات ذات صلة

13 comments:

^ H@fSS@^ 24/02/2009, 09:49  

مايكل
مش عارفة اقولك لما عرفت من طارق يوسف انه فيه احتمالية انه يتقبض عليك انقبضت ازاي
و دلوقتي قريت الكلام ده عيطت
حاسة اني عاجزة و مالياش اي قيمة و مالياش اي لازمة في الحياة دي
بس اوعدك اني لو اعرف اعمل حاجة حعملها
و مؤكد كتير حيوقفوا معاك
عشان انت متستاهلش اي شئ من الحاجات دي
اما اهلك
فمعلش
اصعب شئ ان الاهل يكونوا متخلين عن ابنهم او حتى مش واثقين فيه
بتحرق
انا عارفة شعورك ازاي
تقبل مني كل احترام

Maikel Nabil Sanad مايكل نبيل سند 24/02/2009, 12:24  

@^ H@fSS@^
لا ، تعيطى لية بس ؟
أنا مايرضينيش أن حد يتألم بسببى

أنا مش خايف ولا زعلان
دى ضريبة الحرية ، و ضرورى ندفعها علشان ناخد حريتنا

أنا مش بكتب كدة علشان أصرخ ولا أعبر عن خوفى
أنا بكتب لأنى من حقى أنى أستخدم كل الطرق الممكنة علشان أدافع عن حقوقى و عن حريتى

خليكى قوية
السنتين الجايين ، الصراع بينا و بين النظام هايزيد ، و متوقع يبقى فية معتقلين كتير من حبايبنا
لكن مش هايقدروا يقعدونا علطول
مصيرنا هانطلع و نغنى أغانى الحرية
فوق قبر كل ظالم و دكتاتور

تحياتى

ج:محمد صبرى 24/02/2009, 15:29  

والله يبنى انتا محترم بس اتعلم ازاى تلاعبهم من غير متتعور لانهم اغبيه ومبيفهموش والناس الى عملالهم هاله وحجم اكبر من حجمهم بس مقلتليش كنت بتوزع ورق ايه وتبع اى فصيل سياسى اوع تكون سيبت الليبراليه ازعل منك انا مبسوط بيك قوى وديما بكلم اصحابى المسيحين عنك ياريت يبقا ربعهم زيك ويفهمو ان النظام والامن من مصلحتهم يعزلوهم جوة الكنيسه عشان يلعبو بورقتهم مع الغرب ضد الاخوان وربنا معانا جميعا اخوك محمدصبر الغد

Maikel Nabil Sanad مايكل نبيل سند 24/02/2009, 17:11  

@ج:محمد صبرى

شكرا على تضامنك يا عزيزى

موضوع الورق هتلاقى تفاصيل عنة هنا
http://ra-shere.blogspot.com/2009/02/blog-post_5919.html

طبعا ماسبتش الليبرالية يا باشا

و على فكرة ، هما أقلية مش أغلبية
المعارضة هى الأغلبية
هما أقلية ، بس متوحشة فى نفس الوقت ... و احنا دورنا نروضها

تحياتى

^ H@fSS@^ 25/02/2009, 11:20  

لا انت مش سبب الم اي حد
بالعكسانت سبب فخر لينا كلنا
بس عيطت من القهر
حاسة اننا كلن امخنوقين و ان كل مادا الخنقة بتزيد
و مؤكد انا عارفة انك لا خايف و لا حاجة
بس هي حاجة تحزن الحال اللي وصلنا ليه ده
انا من فترة كنت بقول اننا في اضيق منطقة في عنق الزجاجة و الخروج منها مش حيكون بالساهل
ربنا المستعان بقى على البلوة اللي احنا فيها

تحياتي يا مايكل

Anonymous,  26/02/2009, 01:40  

أخي مايكل،
مش عارف اقول ايه، بس انت فعلا يا على حق 100% في اللي بتعمله يا مجنون رسمي ومصاب بداء العظمة
مش عارف أحدد أنت مين فيهم
بس أكيد فيه حاجة غلط يا فيك يا فيا يا فينا إحنا الاتنين
ربنا معاك

Bastawisi 27/02/2009, 10:30  

معارضة ايه اللى تحكم؟
المعارضة لو حكمت هاتبقى حكومة مش معارضة و هاتعمل زى مالحكومة مابتعمل و اوسخ لانها هاتطلع كل كبت السنيين

احسبها صح
صدقني البلد دي عمرها ماهاتبقى احسن من كده
بلاش تضيع نفسك باوهام و حسابات خاطئة

انا مش بشتغل مع اى جهة امنية انا بس يصعب عليا انك تخش السجن

هدى,  01/03/2009, 19:55  

اؤيدك يا مايكل ان البلد بقت خراب
وياريت اقدر اعمل زيك

Anonymous,  02/03/2009, 03:11  

مايكل بجد انا كل يوم بندم ان انا سيبت النشاط اللى كنا بنعله مع بعض وكل يوم فى المكان اللى انا فيه بتأكد ان مصر بترجع لورا بأنحدار شديد جدا مش بالمقارنه بالدول الاوروبية لأ ده بالمقارنه حتى بالدول العربيه ما تتخيلش فى الدول العربيه قد ايه فى احترام للحريات وادمية الناس ما تتخيلش الشرطه بتتعامل ازاى مع الناس ولو طلبتها تجيلك فى 3 دقايق بالظبط حتى لو فى وقت الزروة والاسعاف هكذا والمطافى وكل الخدمات الاساسية كده
عايز اقولك ان انا بجد عنيا بتدمع دلوقت على حال مصر واللى ألت اليه فى الفتره الاخيرة احنا تقريبا مش عارف هانوصل لفين تانى انا متهيألى ان احنا وصلنا لقمة هرم الرجعية والتخلف والارهاب
اشتغل يا بنى زى ما انت وطظ والف طظ فى اللى قالوا طظ فى مصر وطظ فى امن الدولة الارهابيين وفاكرين انهم مجرد بينفذوا الأوامر
هاتلف تلف وهاتيجي عليهم
واحشنى جدا
مدحت نص

Maikel Nabil Sanad مايكل نبيل سند 02/03/2009, 16:04  

متشكر يا هدى على دعمك
بس أنتى تقدرى تعملى زيى ... أية اللى يمنعك ؟
أعملى مدونة ، و اكتبى اللى جواكى
لازم كلنا نتكلم و نصدعهم لحد ما يستسلموا لأرادة الشعب المصرى

مدحت بية نص
أية الشجاعة دى يا برنس ؟
أنا عكسك ، متفائل جدا
و الدليل أنهم كانوا هايتجننوا و يقبضوا عليا ، لكنهم كانوا مش قادرين لأنهم عارفين أنهم هايدفعوا التمن غالى

أقسم بعظمة رع ، أنى وراهم لحد ما يفكوا أسر مصر ، و ترجع مصر حرة ديموقراطية

تحياتى

Anonymous,  01/04/2009, 04:13  

انا احب اسجل اعجابي وتأييدي ليك يامايكل ولكل المدونين الاحرار, اللي ميعرفوش يعني ايه استسلام, وربنا معاكو.وأحب اقولك اني من اسيوط وان شاء الله نتقابل بعد الغمة دي ما تنزاح,
وانتظر مدونتي قريب جدا
والفضل يرجع للمدونين الرواد زيك وزي وائل عباس
(مدونة الوعي المصري), ومدونة ابن مصر
ربنا معاك وتحياتي
اخوك فريد

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP