شركة موبينيل ردت على مقالى عن شركات المحمول

>> 13 January 2009


فى أول رد فعل من شركات المحمول على مقالى " و ماذا أيضا تعرف شركات المحمول عنا ؟ " المشور على مدونتى الشخصية بتاريخ 9 يناير 2009 ، وصلنى النهارد الصبح أيميل من مسئولة بشركة موبينيل ... مرفق صورة من الأيميل ، و نصة ، و ترجمة عربية له ، و بعد كدة تعليقى على الرسالة

Tuesday, January 13, 2009 9:47 AM

From: "Marian Fangary Agban"

To: maikel_nabil@yahoo.com

الثلاثاء ، 13 يناير 2009 .. 9.47 صباحا

من : ماريان فنجرى عجبان

إلى : مايكل نبيل


hi mikel .

i read all wt u said about sharekat el mobiles and i dont agree at all

i ll not talk from political point of view but i ll talk from the background of my work

i work for one of the 3 companies of mobiles ( mobinil) and i dont think its logical not to have data for customers because of many reasons

hakalemak 3araby ba2a awalan e7na msh ben3raf abadan mokalamat el 3amil wala kan be2ol eh fel telephone e7na elly beban 3andena hwa kalm rakam kam and modet el mokalma kam dekika 3asahn lama yegy y2ol ento 7aramia we beta7`do felos we ana msh etkalmt aslan ( they say that all the time ) and we prove for them bel wa2t el sania wel rakam 3asahn yb2a sure enna sa7 we fe3lan daiman bekon mafish rasid da3 we lo 7asal e7na benedeholo tany mn 3`er ma hwa y2ol

ana bakalemak honestly gedan

أهلا مايكل

لقد قرات كل ما قلتة أنت عن شركات الموبايلات ، و أنا مختلفة جدا مع ما قلتة

أنا لن أتحدث من وجهة نظر سياسية ، و لكنى سأتكلم من خلفية عملى

أنا أعمل لواحدة من الثلاث شركات محمول ( موبينيل ) ، و لا أرى انة منطقيا ألا يكون لدينا بيانات عن الزبائن ، و ذلك لأسباب عديدة

هكلمك عربى بأة ، أولا أحنا مش بنعرف أبدا مكالمات العميل ولا كان بيقول أية فى التليفون ، أحنا اللى بيبان عندنا هو كلم رقم كام و مدة المكالمة كام دقيقة ، علشان لما ييجى يقول " انتوا حرامية و بتاخدوا فلوس ، و انا مش اتكلمت أصلا " ، هما بيقولوا كدة علطول ، أحنا بنثبتلهم بالوقت و الثانية و الرقم ، عشان يبقى متأكد أننا صح ، و فعلا دايما بيكون مفيش رصيد ضاع ، و لو حصل أحنا بنديهولة تانى من غير ما هو يقول

أنا بكلمك بأمانة جدا


tany 7aga enta 2olt enna bena7`od bianat lel 3amil akid lazm omal hadiflo 7`edma ezay we at2aked eno hwa elly talebha msh 7ad tany?

kaman ezay lo 7`ato da3 wala etsarak ha2dar awa2afo we at2aked eno sa7eb el line . efred wa7ed tany msh sa7eb el khat dah we 2aly awa2afo fen seriet we 7emait 7`at el 3amil hena

da e7na lo 3amalna 7`at mn 3`er baianat feh geha betshof el kalam da msh e7na we betwkef el 7`at we da 3asahn el sherka we 3asahn el 3amil kaman

تانى حاجة ، أنت قلت أننا بناخد بيانات للعميل ، أكيد لازم أمال هضيفلة خدمة أزاى و أتأكد أنة هو اللى طلبها مش حد تانى ؟

كمان أزاى لو خطة ضاع ولا أتسرق هقدر أوقفة و أتأكد أنة صاحب الخط . أفرض واحد تانى مش صاحب الخط و قاللى أوقفة ، فين سرية و حماية خط العميل هنا ؟

دة أحنا لو عملنا خط من غير بيانات ، فية جهة بتشوف الكلام دة ، مش أحنا ، و بتوقف الخط ، و دة عشان الشركة و عشان العميل كمان


kaman el usb modem ezay hadiholo mn 3`er baianat , ana ba3raf hwa da7`el 3ala eh we msh ay 7ad fel sherka be3raf keda lakn da kesm mo3aian 3asahn y2dar y2olo bet7aseb ezay

omal ezay ha3raf eza kan leh felos wala 3alih

e7na ben3raf 3an el 3amil fe 7edod elly y7`osena elly hwa 7ak el sherka fe felosha we bas

7aiato el sha7`sia ana malish da3wa beha wala ay sherka mn el talata yhema ay 7aga mn de

kaman e7na take baianat lel 3amil we rakam ardy or fixed 3ashan at2aked enna hanla2y 7a2na

enta 3aref kam wa7ed bea7`od rakam we ba3d ma ysta7`demo shewaia ysebo we ykon 3alih felos

lakn lo 3aref eno leh rakam ardy we rakam sa7 hadman bas eno sha7`s hala2y 7a2y ma3ah

da kol ely yhemna

el sharekat de msh merakeza awy ma3a haiatna zay manto fakrine

we ba3dine ay sherkt dsl lo enta 3aml eshterak ma3aha akid haiban 3andaha enta da7`alt 3ala sites eh we kol 7aga msh 3ashan te3raf 7aga 3anak lakn 3ashan te3raf enta betet7aseb ezay

zay el bakal aw el supermarket lazm y3raf enta eshtaret mn 3ando eh 3asahn y7asbak 3alih

wala 3aizo ma ya7`odsh 7ako ???

كمان ال يو اس بى مودم ، أزاى هديهولة من غير بيانات ، أنا بعرف هو دخل على أية ، و مش أى حد فى الشركة بيعرف كدة ، لكن دة قسم معين عشان يقدر يقولوا بيتحاسب أزاى

أمال أزاى هعرف أذا كان لية فلوس ولا علية ؟

أحنا بنعرف عن العميل فى حدود اللى يخصنا اللى هو حق الشركة فى فلوسها و بس

حياتة الشخصية أنا مليش دعوة بيها ، ولا أى شركة من التلاتة يهمها أى حاجة من دى

كمان أحنا بناخد بيانات للعميل و رقم أرضى أو ثابت عشان أتأكد اننا هنلاقى حقنا

أنت عارف كام واحد بياخد رقم و بعد ما يستخدمة شوية يسيبة و يكون علية فلوس ؟

لكن لو عارف أنة لية رقم ارضى و رقم صح ، هضمن بس أنة شخص هلاقى حقى معاة

دة كل اللى يهمنا

الشركات دى مش مركزة أوى مع حياتنا زى ما انتوا فاكرين

و بعدين أى شركة دى أس أل لو أنت عامل أشتراك معاها ، أكيد هيبان عندها أنت دخلت على مواقع أية و كل حاجة ، مش علشان تعرف حاجة عنك لكن علشان تعرف انت بتتحاسب أزاى

زى البقال أو السوبر ماركت ، لازم يعرف انت أشتريت من عندة اية عشان يحاسبك علية

ولا عايزة ماياخدش حقة ؟؟؟


plz think it over

thanx alot

and i am so proud to work for this company

من فضلك ، فكر فى كل دة

و شكرا جزيلا

و أنا فخورة جدا أنى بشتغل فى الشركة دى


Best Regards

Marian Fangary Agban

The Egyptian Company for Mobile Services (Mobinil(

مع تقديرى

مريان فنجرى عجبان

الشركة المصرية لخدمات المحمول ( موبينيل )


--------------------------------------------------------------


مبدئيا ، انا بشكر شركة موبينيل على أهتمامها بالتعليق ، و على تفاعلها معانا كمدونين ... أشكرها على أيجابيتها و على عدم تعاملها معانا بمدأ " القافلة تسير و الكلام تعوى " اللى للأسف بتنتهجة مؤسسات و شركات كتير فى مصر و على رأسهم النظام الحاكم اللى عامل ودن من طين و ودن من عجين


ثانيا : الصراع القائم حاليا بالطبع مش صراع شخصى ، و بالطبع مالهوش دعوة بحقك الطبيعى فى أنك تفخرى بأنتمائك لشركة بحجم موبينيل .... Nothing personal in this .... الصراع قائم ضد نظام عام و حالة عامة بتجبر الأفراد و المؤسسات على أرتكاب أخطاء مش هايعملوها لو كانت الظروف مختلفة ... أنا مقدر أن شركات المحمول هى ضحية زينا ، و انها كتير بتبقى مجبرة أنها تعمل حاجات ماتحبهاش ، لكن سكوتها أو أستغلالها للوضع دة بينقلها من خانة الضحية لخانة الجناة ... مفهوم أن شركات المحمول شركات أستثمارية بتتعامل بمهنية و يهمها أرباحها بغض النظر عن ان الربح دة جاى من شخص ينتمى للحزب الحاكم أو المعارضة ، مفهوم أنها مايهمهاش أى حاجة عن حياتنا الشخصية طالما هيا بتاخد فلوسها ، لكن لما تحط قواعد بياناتها و أمكانياتها تحت خدمة الحزب الحاكم ( برضاها أو غصب عنها ) تبقى خرجت عن حياديتها الأقتصادية و أصبحت اداة سياسية موجهة فى يد فصيل سياسى معين ضد أعداؤة السياسيين


ثالثا : الرسالة للأسف ماردتش على النقط المهمة فى مقالى .... اللى أحنا عايزينة ببساطة

1- الشركة مفيش مانع أنها يكون عندها قاعدة بيانات ، لكن ممنوع أن البيانات دى تخرج لأى فرد أو شخص برا أو جوا الشركة يستخدمها لغير الأهداف اللى أتجمعت البيانات علشانة ... يعنى من الآخر مش أى ظابط أمن دولة يتصل بشركة محمول و يطلب بيانات تدوهالة ... أنتم بطبيعة شغلكم بيبقى عندكم بيانات شخصية جدا ، و ماينفعش بيانات بالخطورة دى تكون متاحة لأى حد ... ببساطة عايزين تعهدات واضحة و صريحة من شركات المحمول بعدم تقديم أى معلومة للجهاز الأمنى بدون أذن قضائى ، و فى نفس الوقت عايزين قوانين مشددة تعاقب أى شركة محمول تخالف النقطة دى

2- من حق شركة المحمول أنها يكون عندها بيانات للمشتركين عندها ، لكن مش من حقها أنها تستخدم وسيلة غير مشروعة للوصول للبيانات دى ... يعنى لو الخط ماعليهوش بيانات ، ألغوة ، لكن ماحدش يتصنت على المكالمات علشان يجمع معلومات عن صاحب الخط ... و فى نفس الوقت مش من حقكم أنكم تسمحوا لأى جهة تانى أنها تعمل الشئ بدالكم ، و كون أن فية جهة تانية بتتصنت على الخطوط علشان تجمع معلومات عن الخطوط اللى بدون بيانات ما يبرأكمش من الغلط ، لأن أنتم اللى بتسمحوا للجهة التانية انها تستخدم الشبكة بتاعتكم و تراقب خط مشترك عندكم و مش حاطط خوانة ولا عارف أن مكالماتة الشخصية بتتسمع

3- من حق الشركة أنها يبقى عندها قاعدة بيانات ، لكن مش من حقها تستغل الوضع شبة الأحتكارى القائم علشان تفرض عليا تقديم بيانات مالهاش علاقة بنوع الخدمة ... أنا لحد دلوقتى مش فاهم أية علاقة كونى متزوج أو عازب بأنى واخد خط من شركة محمول ؟؟ .... و فى نفس الوقت ، مش من حق الدولة أو الامن أنهم يفرضوا على شركات المحمول تجميع أو طلب بيانات من الأعضاء ، و أذا حصل من النظام الحاكم حاجة بالشكل دة مطلوب من شركات المحمول رفض الوضع دة و فضح النظام مش مجاراة النظام علشان خاطر الأرباح


رابعا : الرسالة بتقول " دة أحنا لو عملنا خط من غير بيانات ، فية جهة بتشوف الكلام دة ، مش أحنا ، و بتوقف الخط ، و دة عشان الشركة و عشان العميل كمان " .... أفهم من الجملة دى أن دة أعتراف أن فية جهة أمنية بتتصنت على مكالماتنا رسميا ؟؟؟ ... دة مصيبة بكل المقاييس !!!

أحنا من حقنا نعرف مين الجهة دى ؟ و مين عطاها الحق دة ؟ و فين القانون اللى أذنلها أنها تعمل كدة ؟ و أية الضمانات اللى تضمنلنا ان الجهة دى مش هاتسئ أستغلال الأمكانية المهولة دى ؟؟ ... أسئلة كتيرة محتاجة للتوضيح من شركات المحمول و من النظام المصرى


خامسا : بالتأكيد أحنا مش ضد أن الشركة تحصل على حقوقها ، و انا شخصيا عمرى ما حسبت سعر الدقيقة بكام ولا رصيدى كام ولا صرفت كام ولا بتفرق معايا عشرة ولا عشرين جنية لأن وقتى أهم من دة كلة ... بس المهم ، زى ما الشركة ليها حقوق أحنا لينا حقوق ، و أحنا عايزين كل واحد ياخد حقة من غير ما التانى يخسر حقوقة ، أنتم تاخدوا فلوسكم و أحنا خصوصيتنا و حياتنا الشخصية لا يمسوا

و شركات المحمول فى معظم خدماتها عملت حل عملى يحل النقطة دى ، و هو الدفع المقدم ... يعنى أنا بشحن رصيد مقدم و بتكلم بية ، و بالتالى الشركة مش محتاجة تعرف مين اللى بيتكلم لأنة مستحيل هايتكلم بفلوس زيادة عن اللى دفعها مقدما ... نفس الشئ ممكن يتعمل فى اليو أس بى مودم ، خدوا الفلوس مقدما ، و بكدة أنتم تضمنوا أن مفيش حد يسرقكم و أحنا محدش يطلب مننا بيانات شخصية أحنا مانحبش حد يعرفها

خدوا فلوسكم مقدما ، و أدونا خصوصيتنا


سادسا : بالنسبة لل USB-Modem ... أنا هتكلم عن حالتى الشخصية ، أنا بدفع أشتراك شهرى ثابت مابيتغيرش ، و مليش دعوة بأى حسابات لأنى فى النهاية بدفع رقم ثابت منصوص علية فى التعاقد ... يعنى الشركة مش محتاجة تحسب اى حاجة ، و بالتالى مستحيل انا هآخد منهم فلوس زيادة ... لية ماياخدوش المبلغ الثابت دة أول الشهر بدل ما يداينونى و يستغلوا مداينتهم ليا بأنهم يطلبوا معلومات شخصية ؟ ... حتى التعاقدات المفتوحة ، أية اللى يمنع أنها تبقى برصيد يتشحن مقدما زى ما كان موجود فى النت القديم قبل ما يبقى مجانى و زى ما هو موجود حاليا فى المكالمات ؟ ... بكدة أنتم ضمنتم حقكم مقدما ، و فى نفس الوقت مابقاش عندكم مبرر حتى تعرفوا أسم صاحب الخط

بالنسبة بقى لتتبع المواقع اللى بيدخلها الشخص اللى بيستخدم ال USB ... حضرتك بتقولى أن كل شركات ال DSL بتعرف كدة ، و دة صحيح ، بس يمكن ال DSL علشان فية وصلات فبيستخدمة فى الأغلب كذا شخص ، يعنى بيبقى مثلا 3 أشخاص مشتركين فى خط واحد ، و بالتالى الشركة بيوصلها بيانات التلاتة مع بعض و مش بتعرف مين فيهم عمل اية بالظبط ... لكن ال USB بيستخدمة شخص واحد ، يعنى معروف ان كل البيانات اللى جاية من الخط دة هى بالضرورة جاية من الفرد دة ، دة بجانب أن خط ال DSL بييجى على تليفون البيت بعكس ال USB اللى بييجى على البطاقة الشخصية ... أنا فاهم أن البيانات دى بتوصل الشركة بالضرورة ، و أن الشركة ماتقدرش تمنع وصول البيانات دى ليها ، علشان كدة أحنا كل اللى بنطلبة أن البيانات دى تفضل سرية و لا يسمح لأى أحد بالأطلاع عليها ألا بأذن قضائى


سابعا : فى شهر سبتمبر الماضى ، دخلت فى صراع مع شركة الفيسبوك بسبب أغلاقهم لحسابى دون وجة حق .... ناس كتير فى البداية مكانوش متخيلين أن حد ممكن ياخد حقة من شركة ضخمة بحجم الفيسبوك ، و خصوصا أن حسابات ناس كتير على الفيسبوك أتقفلت و مارجعتش تانى ... لكنى فضلت شغال فى حملتى الألكترونية على الفيسبوك لحد ما رجعولى حسابى ، و مش بس كدة ، لأ دة من ساعتها و قل جدا عدد حسابات السياسيين اللى بتتقفل ، و كتير منهم كان حسابة أتقفل قبل حسابى فرجعلة تانى ... الأزمة دى علمتنى و علمت ناس كتير ، أنة مش معنى أنى صغير و واقف قدام حد كبير أنى مش هعرف آخد حقى ... و دة نفس اللى يتقال هنا ، حقنا فى الخصوصية حق أنسانى معترف بية فى كتير من المواثيق الدولية ، و أحنا مش هانتنازل عن الحق دة لحد ما ناخدة .. بعد يوم ، بعد شهر ، بعد سنة ، مش مهم ، المهم أننا مش متنازلين عن حقنا فى الخصوصية


أخيرا : المدون الزميل أسماعيل النجار صاحب مدونة " ليبرالية يعنى حرية " ، تضامن معايا فى موقفى و عمل جروب على الفيسبوك بأسم " ضد تلصص شركات المحمول على البيانات الشخصية " ... أرجو أن الكل ينضم لية ، و أننا نفتح فية نقاشات اكتر حوالين الحق فى الخصوصية الشخصية ، و نحاول نوصل وجهة نظرنا لعدد أكبر من الناس و الأعلاميين .... كل دة و أحنا بنأكد أن الموضوع مش شخصى ، و اننا مش بنعادى شركة محمول بعينها ، لكن قضيتنا قضية حقوقية من الدرجة الأولى ، ليها جوانب كتيرة سياسية و تشريعية و أقتصادية


موضوعات ذات صلة

8 comments:

FOO bar zot 13/01/2009, 20:44  

This is not official response taba3an, dah wa7eda sha3'ala fee el sherka wee enta labesataha fee el heet. she send you the email keda ya 3aney as communication wee 7'las.

This is not formal writing lewa7da sha3'ala fee el PR.

You are overrated begad.

Anonymous,  13/01/2009, 21:53  

I'll answer in facebook ya Maikel

Manal Fahmy

ألِف 13/01/2009, 23:48  

مايكل،

دا مش رد من الشركة، دا رد شخصي من واحدة بتشتغل في الشركة..تفرق كثير جدا جدا، و ماكنش يصح أنك تعنون التدوينة على أن "الشركة ردت عليك".

كمان أتمنى أنك تكون استأذنت ماريان قبل ما تنشر الرسالة، لأنه طالما هو رد شخصي فممكن يحرجها في العمل لو كانت غير مخولة بالحديث باسم الشركة. أنا شخصيا غير معني بال الشركة تفرضه على موظفيها و مش متعاطف معها طبعا، لكن طالما أنت مهتم بالحريات و الخصوصية، يبقى الأولى أنك تحترم خصوصية الست.

عن موضوع الخصوصية بقى، لي شوية تعليقات على التدوينة الأصلية.

Anonymous,  14/01/2009, 10:58  

ابن رع

لي بعض التعليقات علي موضوعك :
- لم تعجبني طريقتك في اقتناص بعض التقاط لاثبات وجهة نظرك ، و الطريقة التي استخدمتها هي اقرب الي ثني عنق الكلام لتوجيهة الي ما يؤيدك. الايميل الذي وصلك كرد فر رايي يريد ان يوضح ان البياتات التي تجمع عي الحد الادني الذي يسمح بحماية حقك كمشترك ( ك الاسم و العنوان .....) و الذي يضمن حق الشركة كعدد الصفحات التي حملتها ....

- هل رجعت الي صاحبة السالة قبل ان تنشر اسم كاتبة الايميل . لان هذا قد يضرها خصوصا ان هذا الرد هو رد شخصر و ليس رسمي . قصدت بة صاحبة الرسالة ان يكون عفوي فكتبتة بالغة العربية مستخدمة الاحرف الانجليزية.



- Friendly reply rather than an official reply

ا اتمني ان تقوم بعمل تعديل للموضوع و تقوم اذالة اسم صاحبة الرسالة و اسم شركتها

انا شخصيا لا اعرفك و لا اعرفها و لا اعرف من اين اتيت انت بعنوان بريدي و بدات ترسل لي روابط مدونتك و مع ان هذا و انتهاك لحقوقي الشخصية حيث اني لم اقوم بتسجيل نفسي في نيوزجروب مدونتك المحترمة الا اني سوف اطلب منك ان لا ترسل اي بريد ترويجي لاي شخص لم يطلب منك ذلك.

اين موضوعيتك ؟

ـJoenash

Maikel Nabil Sanad مايكل نبيل سند 14/01/2009, 14:13  

مبدئيا أنا شايف أن الرد دة لية صفة الرسمية لأسباب كتيرة ، أهمها
1
الرسالة مبعوتة مش من أيميل شخصى ، لكن من أيميل من أيميلات الشركة
****@mobinil.com
2
التوقيع كان بصفتها مسئولة بالشركة
3
الرسالة بتتكلم بأسم الشركة ، لاحظوا أنها بتقول : أحنا مش بنعرف ، ناخد حقنا ... بتتكلم بأسم الشركة
4
قارنوا بين الرسالة دى و بين الرسايل اللى كان بيبعتهالى الفيسبوك ، هتلاقوا أن مفيش فرق بين الأتنين
طبيعى أن اللى يرد على الناس شخص طبيعى ، لكنة طالما بيستخدم أيميل الشركة و بيتكلم بصفتة ، بقى ممثل للشركة
5
لو حد فيكم كلم خدمة العملاء ، و قالولة حاجة ، مش هايعتبر دة رأى الشركة ؟
لما مسئول فى الشركة يقول حاجة بصفتة ، بيبقى طبيعى أننا نفهمة على أنة صادر عن الشكة

أنا بالتأكيد بحترم الخصوصية الشخصية
لكن انا مش شايف أنها رسالة شخصية

Maikel Nabil Sanad مايكل نبيل سند 14/01/2009, 14:23  

@Joenash
أنا مش ببعت أى راسيل دعائية على أيميلات شخصية لحد
و بالتالى مستحيل أكون ببعتلك رسايل أنت شخصيا

أنا عضو فى مجموعة من الجروبات ، و ببعتلها رسايلى
أذا كنت عضو فى جروب ، ناقش الموضوع دة مع مدير الجروب مش معابا
لأنى مش هقدر أبطل أبعت رسايلى لجروب كامل علشان خاطر عضو وحيد فية مش عاجبة كلامى

تحياتى

hasona 25/01/2009, 20:31  

فيه كثير من المسئولين اعترفو بعملية التصنت علي المكالمات لبعض الخطوط
وخصوصا بعد اضراب ابريل 2008 الماضي
وتم التشديد علي شركات المحمول في جمع الكثير من البيانات عن المستخدمين
،،،
وفيه تجاوزات كثيرة في أكثر من مجال وليس فقط مجال الاتصالات

7oksha 26/01/2009, 03:35  

أردت أن أعلق على هذا الموضوع منذ زمن و لكنني آثرت الصمت. و الآن أرى أنه من العبث - بل هو أقرب الى الجنون ! - أن نعتبر أن أي نوع من وسائل الاتصال في هذا الوقت لاتقوم - بطبيعة كينونتها - بتجميع المعلومات الشخصية و غير الشخصية .

أما فيما يتعلق بالخصوصية .... أظنكم تمزحون جميعاً !! عن أي خصوصية تظنون أنفسكم متحاورين؟ الشركات لا تحترم التعاقدات بمنطق الأمر الواقع لأن الأمن لا يحترم القانون - أيضاً بطبيعة الأمر الواقع - و النظام الحاكم عبثي أن يُكتب عنه. فتكون النتيجة أننا حفاة عراة ان اخترنا أن نضايق هذه السلسلة. هذا ما أرى

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP