عنصرية و تفاهة فى معرض كتاب أسيوط

>> 30 December 2008





من يومين ، كنت معدى بالصدفة جنب دار صفاقة ( ثقافة ) أسيوط ، و كان معايا ساعتها أتنين من الزملاء المدونين الناشطين سياسيا .... و لقيتهم فى دار الثقافة عاملين معرض كتاب تبع مهرجان القاهرة الدولى للكتاب ، و بما أنى مدمن قراية فكان ضرورى أدخل و أتفرج

بصراحة ، مش قادر أوصفلكم مستوى تدنى الكتب الموجودة هناك ... ماتلاقيش هناك اى كتاب لأى حد من الفلاسفة المبدعين اللى بتفخر بيهم البشرية ... كتب تافهة و عقيمة لمجموعة من المجهولين .... المهم ، و أنا بتفرج صدمنى الكتاب دة
الكتاب زى ما أنتم شايفين فى الصورة أسمة " اليهود قافلة الشر فى التاريخ " لكاتب مجهول أسمة " محمد محمد ابراهيم مصطفى " ... عنوان فى قمة العنصرية ... هيا دى الثقافة اللى بتثقفوا الناس بيها ؟ ... طيب بتزعلوا لية لما حد برا مصر يقول كلام وحش على المسلمين ؟ ... طيب هو العبقرى اللى كاتب الكتاب عارف الفرق بين اليهود و الأسرائيليين و الصهاينة ؟ .... و أذا كنتم بتكرهوا اليهود للمدى دة ، لية بتزعلوا لما يبادلوكم نفس الحجم من الكراهية ؟ .... ثم مين الجاهل اللى مش عارف دور اليهود فى تقدم البشرية ؟ مين يقدر ينكر الفضل العلمى لعلماء كتير من أصول يهودية كان ليهم أنجازات علمية عظيمة زى سيجموند فرويد و كريستيان بوهر و البرت أينشتاين ؟ ... أول مرة أعرف أن العنصرية ممكن حد يعتبرها ثقافة !!!

المهم ، صورنا الكتاب دة ، و أبتدينا نتفرج على باقى الكتب ، و بس يا حلوين ، و أتصدمت فى الكتاب التانى دة


الكتاب زى ما أنتم شايفين أسمة " تحذير الحرة من كشف السرة " لكاتب مجهول أكتر من المجهول الاولانى أسمة " محى الدين الطعمى " ... بس ، و الكتاب من جوا عبارة عن بحث تفصيلى للأحاديث النبوية اللى أتكلمت عن السرة ، و الأعجاز العلمى فى السرة ، و تأثير السرة على الأمن القومى .... أحا ... سرة أية اللى بيتكلم عنها البتاع دة ؟؟ ... بقى التفاهة وصلت بينا للدرجادى ؟؟ ... سرة أية و عبط أية و غباء أية ؟ ... يا سيدى ، أتكلم عن الحجاب ، أتكلم عن النقاب ، أتكلم عن أى حاجة ليها معنى .... يعنى هيا الست أذا مشيت عريانة لكن مغطية سرتها ، أنت كدة أستريحت ؟؟ ... دة أية التفاهة دى ؟ ... برا بيتناقشوا فى البيج بانج و فى النانوتكنولوجى و الأركيولوجى و الإثنوجرافى ، و أحنا قصر ثقافتنا بيكلمنا عن خطورة كشف السرة !!!
بجد مش لاقى حاجة تعبر عن الموقف دة أصدق من شعر أبو العلاء المعرى :
أغاية الدين حف الشوارب ؟ يا أمة ضحك من جهلها الأمم !!

واحد من اللى معايا ، من بساطتة و طيبة قلبة ، رايح فى المعرض يسألهم عن كتاب " الليبرالية " بتاع جون ستيوارت ميل ( هو يقصد كتاب عن الحرية On Liberty ) ... فطلعولة كتاب أسمة " حقيقة الليبرالية " للشيخ معرفش مين !!!

حالة تبعث على القيئ ... أية القرف دة ؟ ... أية الهباب اللى بتنيلة وزارة التجهيل دى ؟ ... و قال أية كل شوية يطلع فاروق حسنى فى التليفزيون يقول أحنا عملنا و سوينا ؟ ... بقى هيا دى الكتب اللى بتنطبع بالفلوس اللى بتاخدها سنويا وزارة الثقافة من ميزانية الدولة ؟ ... بصراحة أذا كان الوضع هايستمر كدة ، يبقى تلغوا وزارة الثقافة ، و بميزانيتها أخبزوا عيش أحسن .... أوووف ، حاجة تقرف

ملحوظة : الصور كاميرا المدون مدحت نص

5 comments:

Ahmed EL Berry 30/12/2008, 09:35  

ازيك يا مايكل
مدونتك ظريفة جدا يا مايكل أحييك عليها،لكن أنا حبيت أعلق على الموضوع دة ،في البداية دة قصر ثقافة مش صفاقة،لكن ماتنساش أن المكان دة هو مكان حكومي صرف ،مملوك للدولة و يدار بواسطتها ،يعني ماتتوقعش مثلا إنك تلاقي الأعمال الكاملة لأحمد فؤاد نجم أو النشؤ والارتقاء لداروين ،يعني من الأخر مش هتلاقي أي أثر لمن يكتب أويفكر أو يغرد خارج السرب دي نقطة ممكن تكون سلبية
بالنسبة للكتاب اللي أنت علقت علية ..دة بردوا لفت إنتباهي و أنا في المعرض لكن أنا ما أستغربتش زييك لسبب بسيط،أن الوضع الحالي يسمح بكدة، يعني الواحد ممكن يسب ويلعن في اليهود ودي مافيهاش أي مشكلة وأظن أن الدولة ممكن تسمح بكدة كنوع من التعبئة المستمرة ضد اليهود عشان لو لاسمح الله قامت حرب ممكن الناس تكون متعبية تمام،لكن دة من علامات الجهل بعينة لأننا بسؤ تقديرينا خلطنا تماما بين اليهود و اليهودية وبين الحركة الصهيونية ...أنا شخصيا معادي للحركة الصهيونية تماما،،،لكن مؤسسي الصهيونية أنفسهم لم يكونوا يهود متدينين من الأساس ،صحيح إنهم أستغلوا الدين بالمنطق الإنتهازي اللي بيستغل بية الدين على مدار التاريخ لكن دة مش معناة إنهم بيمثلوا اليهود ،،الله يرحمك يا د/عبد الوهاب المسيري...لكن بالنسبة للمناخ السطحى العام اللي إحنا عايشين فية دة يعتبر شئ غير مفاجىء ..بالنسبة لكتاب التاني ماخدتش بالي منه و ماعرفش موضوعة بالظبط
لكن في جانب ايجابي لمعرض الكتاب .زيي ما أنت عارف أن أسيوط مجتمع مغلق والأنشطة المختلفة فية سواء سياسية أو فنية أو ثقافية تكاد تكون منعدمة ودة للأسف عمل تأثير سلبي على أغلب الاسايطة ،،و أظن إن المعرض فرصة كويسة لينا كأبناء للمدينة إننا نحاول شوية نجدد أفكارنا حتى لو بشكل بسيط ولعلمك أني بتابع المعرض سنويا ولكن بختلف معاك في أنة سئ لهذة الدرجة ،،ممكن يكون في ملاحظات كتيرة علية لكن في نفس الوقت يوجد به كتب جيدة ومفيدة ممكن تكون قليلة لكنها موجودة
نحياتي ليك

An Egyptian 30/12/2008, 13:40  

انت نستني ايه يعني من شعوب الواق الواق دي؟

Maikel Nabil Sanad مايكل نبيل سند 31/12/2008, 01:57  

@Ahmed EL Berry
مبدئيا أنا مبسوط جدا أنى عرفتك ... أنا بزعل لما أكتشف أن فية مدون من أسيوط ... ياريت نتقابل قريب ، و نشوف هانقدر نتعاون سوا أزاى ... ياريت تراسلنى على الأيميل بتاعى لأنى مش عارف أيميلك

بالنسبة لكلامك عن أن المعرض دة بيدخل شوية كتب لأسيوط المقفولة و اللى محدش بيقرا فيها ... فأنا متفق معاك ، بس بصراحة مشتوى الكتب كل سنة عمال يتدهور ، و كل سنة كتب أعبط من السنة اللى قبلها ... بالطريقة دى المعرض أتفرغ من مضمونة

على فكرة تعبيراتك عن التعبئة ضحكتنى جدا ... الأنظمة الشمولية بتتعامل معانا على أننا علب صلصة

تحياتى

Ronah 31/12/2008, 10:40  

ماتزعلش اوي يا مايكل على معرض اسيوط.. كل الجمهورية والوطن العربي معرض اسيوط..
انا مش من اسيوط ومروحتش اسيوط قبل كدا .. بس من القاهرة وبروح معرض القاهرة الدولي للكتاب.. بس فعلاً مستوى متدني جداً في الكتب.. وقليل لما تلاقي كتب ليها معنى ... اللي عايز يقرا ماقداموش غير انه ينزل الكتب من على الانترنت ويقرا فيها..
وبخصوص التعبئة ..
دا الحال الطبيعي هنا في مصر.. ومن زمان الكلام دا .. وفي الكتب المدرسية وفي كتب الدين الاسلامي.. يعني اي شخص او عقيدة مخالفة لكلامهم يبقى يستحق اقامة الحد عليه لو قدروا يعملوا كدا

Anonymous,  31/12/2008, 16:28  

الصراحة انا متفق معاك فى كل كلمة
قصر الثقافة ده ضاعت قيمته
خسارة

أحد الأصدقاء ( بيشوى عاطف(

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP