الفرق كبير

>> 02 December 2008



الفرق كبير ... بين واحد كان بينجح كل سنة ، و لما بقى سياسى بطل ينجح
و واحد كان بيسقط كل سنة ، و لما أشتغل مخبر بطل يسقط

الفرق كبير ... بين واحد ماتعينش معيد ، لأنة معارض
و واحد متخلف عقليا أتعين معيد و أترقى بسرعة ، لأنة مخبر

الفرق كبير ... بين واحد بينضم لحزب ، علشان يكبرة و يقوية
و واحد بينضم لنفس الحزب ، علشان يشتغل مخبر على أعضاؤة و يفجر الحزب من جوا

الفرق كبير ... بين حزب معارض ، بيتأسس علشان يكون معارض
و حزب معارض ، هو فرع من الحزب الوطنى ، بس شغلانتة يوسخ صورة المعارضة

الفرق كبير ... بين واحد كان عضو مجلس الشعب ، و مانجحش فى الأنتخابات علشان مارضيش ينضم للحزب الوطنى
و واحد مابيعرفش يقرا و يكتب ، و بقى عضو فى مجلس الشعب لأنة عضو فى الحزب الواطى
الفرق كبير ... بين ظابط شرطة محترم أتنفى من بلدة ، علشان كان فاهم أن الشرطة فى خدمة الشعب
و ظابط شرطة بيترقى بسرعة ، علشان فاهم أن الشرطة فى خدمة زعيم العصابة

الفرق كبير ... بين واحد عميل لمصر و عميل للشعب ، بيتهموة أنة عميل للغرب
و واحد عميل أمريكى أسرائيلى سعودى ، ماسك دولة و بينجح كل مرة فى الأنتخابات

الفرق كبير ... بين وزير الداخلية الهندى اللى أستقال بعد أحداث بومباى الأرهابية ، رغم أنة مالهوش ذنب فيها
و بين مبارك اللى حصل فى عهدة أكتر من 50 هجمة أرهابية ، ولازال عندة الجراءة أنة يرشح نفسة فى الأنتخابات

الفرق كبير ... بين رجل دين شغلانة يودى الناس لربنا
و بين رجل دين شغلانتة يودى تقارير عن الناس لأمن الدولة

الفرق كبير ... بين فقهاء السلاطين و كنيسة الملك
و بين فقهاء الأسلام و كنيسة المسيح

الفرق كبير ... بين أب و أم مكانهم جوا القلب و فوق الراس
و أب و أم مكانهم الوحيد ورقة شهادة الميلاد

الفرق كبير ... بين واحد بيقرا المقال دة علشان يستفيد منة
و بين واحد بيقراة علشان يبعت عنة تقرير لمحاكم التفتيش

الفرق كبير ... بين واحد عارف الكلام دة كلة و فاهمة كويس ، لكن كتمة جواة ، علشان يعيش
و بين واحد معرفش عقلة يعيش محبوس ، و أختار أنة يتكلم و لو حتى يكون دة آخر كلام لية

4 comments:

Anonymous,  02/12/2008, 10:55  

مقالة رائعة صديقي مايكل
فعلاً ده فرق بين السماء والارض
محمود الفرعوني

سقراط 02/12/2008, 22:04  

الفرق كبير
بين واحد داخل حزب سياسى معارض عشان يعمل حاجة فعلا ويحقق مستقبل افضل لمصر والخير لبدة
و بين واحد داخل حزب معارض عشان يحقق مصالح شخصية بين مناصب او مكاسب مادية او شغل او سفريات الى اخرة
الفرق كبير فعلا

Anonymous,  03/12/2008, 14:11  

معاك حق فى كل كلمة
أحد الأصدقاء
ربنا معاك

عاشق الحرية 21/04/2011, 00:36  

الفرق كبير بين واحد عايز يعيش وبين واحد عايز يموت

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP