نفسى فى أية فى 2009 ؟

>> 24 December 2008



ايام و تنتهى 2008 ... 2008 بكل حلوها و مرها ، بكل نجاحاتها و كوارثها ... بالتأكيد فية حاجات حصلت فى 2008 مش هتقدر البشرية تنساها يمكن لقرون ، زى مثلا فوز أوباما فى الأنتخابات الأمريكية ، و الأزمة الأقتصادية العالمية ، و أضراب 6 أبريل ... سنة أبتدت بقطع كابلات النت و أنتهت برضة بقطع كابلات النت ... سنة أجبرت فيها المعارضة المصرية النظام على تقديم تنازلات كتيرة ، و نما فيها المجتمع المدنى أكتر ، و أتولد جرنانين محترمين ( البديل و اليوم السابع ) ... سنة مش قليلة ، و هنفتكر منها حاجات كتير و نقول للأجيال اللى بعدينا " أحنا عشنا الوقت دة "

2009 خلاص هايبتدى ، و أحلامنا لازالت عايشة و صاحية و مستمرة .... كل واحد فينا لية أمانى كتير نفسة أنها تتحقق فى سنة 2009 ... أنا هكتب الحاجات اللى نفسى تتحقق فى 2009 ، و فى نفس الوقت بمرر السؤال لكل الزملاء المدونين ، و ياريت كل مدون يرد على السؤال دة على مدونتة و يقول هو نفسة أية يتحقق فى 2009 ... عايزين نخلى عندنا أمل و نحلم ، كل المعجزات أبتدت بحلم

أولا : على المستوى العالمى
1- نفسى المشاكل الدولية الكبيرة تتحل ... نفسى الجيش الأمريكى يطلع من العراق ... نفسى أيران تبطل أستعباط و تعرف أنها كدة بتضر نفسها و بتضر المنطقة كلها معاها ... نفسى الفلسطينيين يبطلوا أسترزاق من قضيتهم ... نفسى أسرائيل تفهم أن الفسطينيين دول من لحم و دم ... نفسى سوريا و لبنان ياخدوا أراضيهم و يعملوا معاهدات سلام مع أسرائيل

2- نفسى دول العالم تقدر تطور منظمة الأمم المتحدة ... نفسى يتخلصوا من البيروقراطية و الفساد اللى جوا المنظمة دى ، و يلغوا البتاع اللى أسمة فيتو ( لانة ضد الديموقراطية ) ... نفسى قرارات الأمم المتحدة تبقى ملزمة لكل دول العالم ، و يكون عندها السلطة أنها تجبر الحكومات على تنفيذ قراراتها ... نفسى نمشى خطوة لقدام ناحية حكومة الأرض الموحدة

3- نفسى التطرف الدينى يقل ... نفسى الناس يبقى عندها تسامح أكتر ... نفسى نحب بعض و مانضطهدش بعض بسبب أديان و أعراق و أجناس ما أخترناهاش ... محدش فينا أختار لونة أو جنسة أو عرقة ، محدش فينا أختار الدين اللى أتكتبلة فى شهادة الميلاد لما اتولد ... فلية نكرة بعض بسبب حاجة مش فى إيدينا أختيارها أو تغييرها ... نفسى نفهم أن " كلنا أنسان "

4- نفسى أفريقيا تشد نفسها حبتين ... نفسى الشعوب الأفريقية كلها تتخلص من العسكر اللى بيحكموها ... نفسى كل الدول الأفريقية يبقى فيها أنتخابات نزيهة ... نفسى الحروب الأهلية و الصراعات القبلية زى اللى فى الصومال و نيجيريا و السودان تنتهى ... نفسى العبودية تنتهى ... نفسى تجارة السلاح و الماس ماتدمرش شعوب القارة أكتر من كدة ... نفسى أننا كأفارقة نتعامل على اننا بشر ، فى أفريقيا أولا ، و فى باقى دول العالم بعد كدة

5- نفسى الانظمة القمعية زى اللى فى كوبا و كوريا الشمالية تنهار ... نفسى الصينيين ياخدوا حريتهم ، و حكومتهم تدخل لقاموسها كلمة حقوق أنسان ... نفسى السعوديين يفهموا اللى بيعملة آل سعود فيهم ... نفسى قطر يبقى فيها برلمان و تبطل مزايدة بقناة الجزيرة على باقى نظم المنطقة ... نفسى البعث السورى ينهار ، و أخواتنا السوريين يترحموا من ظلمة و دمويتة ... نفسى القذافى يبطل هلس و يرحم شعبة من دمويتة و فوضويتة ... نفسى البشير يتحاكم قدام المحكمة الجنائية الدولية ... نفسى الشيوعيين الأتراك يبطلوا بوظنة و يسيبوا حزب التنمية و العدالة ( العالمانى ) فى حالة ... نفسى تركيا تعترف باللى عملتة فى الأرمن ... نفسى الأكراد و الأمازيغ ياخدوا حقوقهم

ثانيا : على المستوى الوطنى
1- نفسى أيمن نور يخرج من السجن ... وجود أيمن نور فى السجن هو أستمرار فى قهر كرامة المواطن المصرى ... مصر كلها مسجونة بسجن أيمن نور ... النظام عمل من أيمن عبرة لكل من تسول لة نفسة التفكير فى تداول للسلطة ... خروج أيمن من السجن ، هايفتح باب الحرية لمصر ... نفسى بجد أيمن يخرج ، و يرجع يلف مصر كلها ، يحرك الناس و يرفع سقف الحرية من تانى

2- نفسى يحصل تحالف محترم بين أحزاب المعارضة ... نفسى التجمع و الوفد يبطلوا تبعيتهم للسلطة و يرجعوا زى ما كانوا زمان حاملين لواء الحراك السياسى ... نفسى فى آخر 2009 يكون عندنا أئتلاف معارضة قوى ، يقدر يدخل 2010 اللى فيها هاتكون أنتخابات مجلس الشعب اللى هاتحدد حاجات كتيرة فى أنتخابات الرئاسة 2011 ... فهل قيادات المعارضة المصرية ممكن تبطل عمالة للأمن و العنجهية و الفساد ، و يعملوا مع بعض أئتلاف محترم تقف وراة مصر كلها ؟؟

3- نفسى فى 2009 ناخد من النظام تنازلات تفضل معانا علطول ، تنازلات ماتضيعش بعد سنتين تلاتة ... تنازلات ماتقلش عن الأنتخابات الرئاسية التعددية ... تنازلات زى إلغاء التجنيد الأجبارى ، أو إلغاء لجنة شئون الأحزان ( شئون الأحزاب سابقا ) ، أو زى السماح بوجود نقابات مستقلة ، أو السماح بوجود أذاعات أرضية غير حكومية ، أو حكم نهائى بطرد كلاب الأمن من الجامعة ، أو حل جهاز مباحث أمع الدولة ... نفسى فى تنازل سياسى لما تقدمة الحكومة ، ماتعرفش أى حكومة بعد كدة ترجع عنة

4- نفسى كريم عامر و مسعد أبو فجر يخرجوا من السجن ... نفسى فى 2009 نكسب حرية التعبير على الأنترنت ... نفسى أن حرية الكتابة على الأنترنت تبقى مقدسة ، و أن النظام يكون مجبر أن يسيب الكل يتكلم براحتة من غير ما يفرض علينا محاكم تفتيش تحاسبنا على كلامنا و على أفكارنا ... نفسى فى آخر 2009 أكتب من غير ما أراعى قوانين عقيمة من عينة إثارة الشائعات و السب و القذف و تكدير الأمن العام و البلبلة و غيرها من القوانين الفاشية الشمولية ... نفسى فى آخر 2009 ، يكون كل كاتب على الأنترنت بيكتب و هو مطمئن و مش خايف لا من أرهاب النظام ولا من أرهاب الفاشيات الدينية ( أسلامية أو مسيحية )

5- نفسى مبارك يعيش لحد ما ييجى اليوم اللى يقعد فية على الكرسى اللى قعد علية صدام و ميلوسوفيتش ... أوعى تموت يا ريس ، عايزك تعيش و تشوف اليوم دة بعينك ، و صدقنى هاييجى

ثالثا : على المستوى الشخصى
1- نفسى أستقل أقتصاديا ، و يبقى عندى دخل ثابت يخلينى ما أحتاجش للى بيقولوا أنهم أهلى ... أستقلالى الأقتصادى هايضمنلى مساحة كبيرة من الحرية بعيد عن الوصاية الأسرية الفاشية

2- نفسى أتخرج ... 7 سنين تعليم فى كلية مابحبهاش لحد ما قرفت ... نفسى علاقتى بالجامعة تنتهى ... أساسا جامعاتنا ( و خصوصا اللى فى الصعيد ) ، هى فكريا أقرب لصناديق الزبالة منها لمكان للعلم و الفكر و الحضارة

3- فى سنة 2008 تضاعف زوار مدونتى 4 مرات عن زوار عام 2007 ... نفسى برضة أن عدد زوار المدونتة يتضاعف أربع مرات السنة الجاية ... لو حصل كدة ، يبقى هوصل ل 200 ألف زائر فى نهاية 2009 ... فهل ممكن أقدر أوصل لكدة ؟

4- نفسى أحقق نجاح أكبر فى حزب الجبهة الديموقراطية ، دون أصطدام بحد جوا الحزب ... حزب الجبهة من الأحزاب اللى بتكبر بسرعة ، لكن فى الصعيد تقريبا مش موجود ... عملنا شوية شغل فى الكام شهر الأخرانيين ، بس لسة ماوصلناش للشكل المؤسسى اللى بيستمر لوحدة تلقائيا ... هل هقدر أنجح فى رسالتى جوا الحزب ؟ هل هقدر أشتغل من غير ما حد يسرق شغلى ؟ هل هشتغل و ألاقى اللى يقدر شغلى ؟ ... كل دى حاجات هيجاوب عليها 2009

5- نفسى أحب ... نفسى ألاقى أنسانة ملائمة أقرب منها ... ساعات بحس أن ظروفى بتخلى دة المستحيل بعينة ... فهل همر فى 2009 بتجارب عاطفية ترجعلى شوية من أنسانيتى اللى أفقدتنى أياها السياسة و الأحداث اللى يشيب لها الولدان و الجرائم الأسرية ؟ ... ولا هيعدى 2009 زى اللى قبلة ، و قلبى مهجور لم يدخلة أحد من سنين طويلة

6- نفسى أقدر أطلع كتابى الأول فى 2009 ... أنا كنت أبتديت فى كذا مشروع كتاب فى الفترة اللى فاتت ، لكن كترت عليا المشغوليات فى الشهور الأخيرة و كل حاجة وقفت ... نفسى أقدر أضغط على نفسى و أنظم وقتى و أكمل فى أى مشروع من اللى أبتديت فيهم ، و أبتدى أطرح أفكارى لفئات كتيرة من القراء غير اللى بشوفهم و بحبهم على النت

7- نفسى أقدر فى 2009 أوفر شئ من الأمان لنفسى ... أنا قلم حر وحيد عايش بين 3 وحوش دمويين ( الأمن - الأسلاميين - المتطرفين المسيحيين ) ... حياتى مهددة من ال 3 وحوش دول يوميا ... كتاباتى بتتقهر يوميا بسبب أرهاب ال3 دول ... نفسى فى آخر 2009 ، أكتب و أنا حاسس بالأمان و مش خايف من الأرهابيين دول

محدش يقدر يعرف المستقبل مخبيلنا أية ... لو كنت كتبت مقال زى دة السنة اللى فاتت ، أكيد مكنتش هتمنى حاجات كتيرة مكنتش هعرف أنى هحققها فى سنة 2008
دى أحلامى و أمنياتى ... هسيبها حروف ملونة على مدونتى ... و المفروض أنى أرجع تانى فى آخر 2009 أكتب مقال تانى ، و أقول فية أية منها أتحقق و أية ما أتحققش ... فياترى هكتب أية فى آخر 2009 ؟ ... يا ترى أنا أساسا هكون موجود و حر وقتها ؟ ولا هكون سبت الدنيا أو فقدت حريتى أو نجحت طيور الظلام أن تقصف قلمى و تقتل الحلم جوايا ؟ ... دلوقتى معنديش غير الأسئلة ، و الزمن هو اللى هيجاوب

11 comments:

Obaida,  24/12/2008, 19:31  

شكراً يا عزيزي على وجودنا في أحلامك..
:)
أحلام سعيدة وتصبح على خير:)

Anonymous,  24/12/2008, 21:32  

ربنا معاك يعم مايكل أمنياتك حلوة جدا ربنا يوفقك
أتمنى ديماً تكون معاه أول شئ و هو هيكمل الباقى
لا تقلق
كل سنة وانت بخير
أحد الأصدقاء
قريب هتعرفنى انا مين
( واحد غلبان جدا جدا ) نفسى أشوفك لانك وحشنى جدا ديماً أبعتلك السلام و الله و اعلم بيوصلك و لا لا

Maikel Nabil Sanad مايكل نبيل سند 25/12/2008, 04:51  

عبيدة
ماتبقاش متشائم يا عزيزى ... دة أنتم كنتم نموذج متفرد فى الأمل ، علشان كدة كتبت عنكم قبل كدة
مصير البعث ينهار ، إن مكنش السنادى يبقى السنة اللى بعدها ... بس أنتم خليكم مستعدين للتغيير

Anonymous,  01/01/2009, 11:52  

كاتب شاطر
وكلمات تدخل القلب
نصيحة من واحد متخرج لو اتخرجت مشاكلك هتزيد ومش هتخلص لسه جيش وشغل وانترفيوهات وشغلانة
وهتلاقى نفسك مشغول اكتر من ايام الكلية
ويمكن متلقيس وقت تكتب فيه
ربنا يوفقك

مسلم 100% 02/01/2009, 17:22  

كل مادخل مدونة نصراني أجده يتابع المدونة الهبلة دي
اولا غير عنوان الموضوع لنفسي في إيه مش في أية
حتى لا تفهم بشكل خاطئ كما فهمته قبل أن أقرأ هذا الموضوع الممل
لو بتسألني عن أمنيتي أقولك نفسي النصارى كلهم يرحلوا و النسر يتغير إلى لا إله إلا الله محمد رسول الله

مسلم 100% 02/01/2009, 17:29  

كل سنة و انت طيب ( من تحت الضرس طبعا )

Maikel Nabil Sanad مايكل نبيل سند 03/01/2009, 11:09  

@مسلم 100%
للأسف ، ليس كل ما يتمناة المرء ينالة

مسلم 100% 03/01/2009, 12:17  

بسم الله الرحمن الرحيم
الثالوث المقدس لأ
الثالوث المقدس لأ
الثالوث المقدس لأ

اسمع كلامي و سيبوا البلد دي
إحنا يا سيد إرهابيين و إنتم ملايكة طيروا بقى
و عيشوا مع الملايكة اللي زيكم و سيبونا نقطع في بعض

Maikel Nabil Sanad مايكل نبيل سند 09/01/2009, 18:09  

@مسلم 100%
ماتحلمش
أنا قاعد على قلبك
يا تحبنى ، يا تقبل وجودى

Anonymous,  10/01/2009, 10:28  

عزيزى مسلم 100%
عيب عليك اللى انت بتقوله ده
مايكل كاتب شاطر ومقالاته احسن من مقالاتك ومسلمين قبل المسيحيين بيقروا ليه
والكلام الفارغ اللى انت بتقوله ان المسيحين يسيبوا البلد فاحب ان اقولك اننا كمسلمين ومسحيين مواطنيين مصريين والبلد دى بتاعتنا كلنا وعمرنا ما سمعنا ان رسول الله طرد اهل البلاد اللى كان بيفتحها
ده رسول الله عليه افضل الصلاة والسلام كان عايش فى المدينة مع اليهود
وهل تعتقد ان المسيحين لو مشيوا من مصر هتبقى حاجه كويسة
انت وامثالك بيجيوا البلد لورا
eng.elewa

Anonymous,  17/01/2009, 18:42  

law tes2alny ana nefsy fy eh?nefsy ykoon fy e7teram ben elmasi7yeen w el moslemeeen aktar men keda 3adam ele7teram da akbar daleel en elbalad dy mesh hatenga7 l2en awel mabade2 elta7ador w mesh ha2ool eldeen wala 7aga en kol wa7ed ye7terem eltany
e7na no2men belthaloooth we ento la2 ento 3andoko 4 zawgat aw ay mo3akad mo7'talef mayenfa3sh ataraya2 3aleh leh ma7taremhoosh mesh lazem o2men bemo3takad 3'eiry bas lazem a7taremo

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP