تكييف القطر

>> 03 November 2008

من حوالى أسبوعين كنت مسافر فى القطر بالليل
كنت تعبان ، و علشان كدة نمت أول ما ركبت
بعد حوالى ساعتين ، صحيت و كانت العربية برد تلج ... كان جسمى بيترعش من البرد ... و كل الركاب اللى حواليا طلعوا هدوم من الشنط بتاعتهم و أتغطوا بيها
رحت قمت و بصيت برا العرابية ، لقيت ناس سايبين كراسيهم و قاعدين فى المنطقة اللى بين العربيات علشان يهربوا من البرد اللى جوا ... و قالولى أن مش العربية دى بس ، لا دة آخر 6 عربيات فى القطر كلهم كدة
سألت على مهندس التكييف ، فعرفت أنة فى اول القطر ، فرحتلة
كان نايم ، فصحيتة من النوم ، و طلبت منة يوطى التكييف ، و الراجل قام معايا و ظبط التكييف و كل شئ بقى تمام

السؤال اللى سألتة لنفسى : الست عربيات دول فيهم أكتر من 350 شخص
لية قعدوا فى البرد من غير ما يعترضوا اكتر من ساعتين ؟
لية محدش فيهم راح عمل اللى أنا عملتة ؟
لية محدش فيهم راح يطالب بحقة ؟
لو مكنتش انا صحيت ، هل كانوا هايفضلوا فى البرد لحد ما يوصلوا ؟

أمتى الناس يتعلموا الأيجابية ؟
أمتى يعرفوا أنهم لو طالبوا بحقوقهم ، هياخدوها من غير أى مشاكل ؟
بتخافوا تتكلموا لية ؟

2 comments:

An Egyptian 03/11/2008, 14:33  

نفس القصة اللى كنت بفكر فيها امبارح
واحد بيدقدق فى عز الليل فى الشارع و الناس نايمة
الشارع فيه مش اقل من 1000 نسمة
مافهمش راجل طلع يقوله بطل دوشة احنا فى نص الليل
الشعب المصري ان كان شعب لديه كل شسىء فهو شعب فاقد للنخوة

bluestone 03/11/2008, 17:01  

فعلا عندك حق
احنا اتعلمنا السلبية
يمكن عشان الناس اخدت على ان مفيش حد بيحترمها ولا بيحترم رغبتها في اي حاجة اصلا

واحيانا الناس بتخاف تتحرج لو محدش استجاب ليها او تحصل خناقة او او او

مفهوم الخدمة عندنا مختلف وفيه مشكلة
والناس كمان بقت بتستسهل

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP