أهلى بيعاقبونى

>> 13 October 2008



أهلى بيعاقبونى على نتيجتى
نسيوا أنى مجنى علية مش جانى
بيعاقبونى على ثقافتى
بيعاقبونى على قراياتى
طول عمرهم بيكرهوا الكتب و بيحاربونى علشان أبطل قراية
بيعاقبونى على كتاباتى
مش عارفين أن اللى يعرفوا يكتبوا اللى بكتبة ناس قليلين جدا

أزاى وصلنا لزمن نعاقب فية المجنى علية ، و فى نفس الوقت نقف للجانى أحتراما ؟
أزاى وصلنا لزمن نرجم فية المثقفين ، و نخرج جماهير نهتف بالروح و الدم للرعاع و المتخلفين ؟
أزاى وصلنا لزمن يبقى فية شوية عسكر جهلا هما كل حاجة ، و المثقفين و العلماء بقيوا على الرف ؟
أزاى وصلنا لزمن قعد فية الدجالين على كراسى العلماء ، و الفنانين أتقطعت رقابهم بالسيف ؟

عايزين تعاقبونى ، عاقبونى
بس اللى مش قادرين تفهموة أنى ماقدرش أمسح مخى
مقدرش أنسى اللى أتعلمتة
فية حاجات أذا ضاعت ماينفعش ترجع تانى
و الجهل من الحاجات دى

فرحانين بجهلكم
ألف مبروك عليكم
جيلكم خلى مصر فى مزبلة التاريخ
جيلكم هو السبب فى كل المشاكل اللى أحنا عايشين فيها
جيلكم هو اللى خلى مصر جهنم لا تطاق
و بدل ما تعتذروا عن غلطكم
بتعاقبونا علشان عايزين نخلق بيئة مناسبة نعيش فيها

عايزينا نعيش جهلة زيكم
نحنى راسنا للكلاب و الخنازير
نتجيش زى الخرفان ورا الجزارين
و نبيع عقولنا لبياعين الوهم و تجار الخرافات
و نرضى بالخرنوب أكل الخنازير

و بعد كل دة جايين تتستروا بالدين
عاملين نفسكم ودعاء قديسين
مع شوية نصوص دينية ذكورية أبوية
و اللى ماعرفتوش تقهروة بسلطتكم الطاغية
تستحضروا إلة من الكتب ، علشان تقهرونا بجبروتة

أعملوا فينا اللى أنتم عايزينة
فى النهاية مكانكم مزبلة التاريخ
التاريخ اللى نسى ملايين عاشوا سلبيين وقت الأحتلال التركى
و أفتكر محمد على و عرابى و سعد
التاريخ مش بيفتكر الجهلا و السلبيين
التاريخ بيفتكر بس اللى بيمدوا أيديهم للتغيير

أهداء إلى : أبى و أمى
خوفا ان يذكرهم التاريخ بذكرى حسنة بسببى



2 comments:

Anonymous,  15/11/2008, 21:58  

يعم مايكل هدى أعصابك
قولتلك لو اى حد معترض على الى بتعمله طنش و كبر دمغاك لكن متتعبش اعصابك
**************
المهم قبل ما تخطى خطوة تدرسها صح تدرس عواقبها عليك و على الى حواليك
لو هتضرك او هتضر غير بلاش منها
*********************************

و متزعلش قوى كده من ابوك و امك
مهما ان عملوا حرام لما تتكلم كده
******************************

احد الأصدقاء
سلام

Anonymous,  05/08/2009, 22:41  

اتكون الايجابية هى السعى وراء الخلود؟
ولماذا كل هذه الثقة فى كتب التاريخ؟

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP