هل يسمح لنا الفيسبوك بالأختلاف معة ؟

>> 27 September 2008



من حوالى أسبوعين ، لما حسابى على الفيسبوك أتقفل ، أستخدمت حساب مدير جروب الليبراليين المصريين Egypt Liberals و عملت جروب جديد على الفيسبوك أسمها " ضد أغلاق الحسابات على الفيسبوك Against Disabling Accounts on Facebook " ... الجروب دى كانت جزء من الحملة اللى عملتها علشان أضغط على الفيسبوك علشان يرجعلى حسابى ، و دة اللى حصل فعلا بعد كدة


أمبارح بقى فوجئت بحاجة ظريفة أوى ... أول حاجة لقيت الفيسبوك راح قفل الحساب بتاع مدير الجروب اللى هو فى نفس الوقت ال Creator بتاع الجروب ... و لما أتفرجت على الجروبات اللى ماشية فى نفس الخط ( بتستهجن سياسة الفيسبوك فى غلق الحسابات ) لقيت أن كتير منها لغى الفيسبوك حسابات الأشخاص اللى عملوها Creators


بعد كدة ببص على ال Wall بتاع الجروب ، لقيت فية بوست ناقص .... البوست دة كانت كتبتة واحدة أجنبية ، الفيسبوك لغالها حسابها و هى عملت حساب مؤقت ، و كانت كاتبة أنها هاتاخد خطوات قانونية ضد الفيسبوك لأن الفيسبوك لما قفل حسابها منعها من الوصول لمقالاتها اللى هيا ملكية فكرية ليها ... أنا ساعتها رديت عليها و شجعتها على كدة ... لكن أمبارح لما دخلت على الفيسبوك ، فوجئت أن حسابها الأحتياطى اللى كتبت بية البوست دة أتلغى


دخلت على ال Discussion Board ... كانت فية واحدة أجنبية تانية ، أسمها Dee ، برضة حسابها أتلغى و شغالة بحساب مؤقت ... كانت كاتبة بتسأل : هل الحسابات اللى بتتقفل بترجع كاملة ولا لأ ؟ ... و أنا رديت عليها فى وقتها من حساب Egypt Liberals ، لأن حسابى مكنش رجع وقتها ... بعد كدة هيا علقت على تعليقى ، و أكيد كانت متضايقة جدا لأن حسابها الأصلى لسة ما رجعش ... بعد كام يوم دخلت لقيت البوست الأولانى بتاع سؤالها ممسوح ... و لأن الأدارة عبارة عن أنا و أنا و أنا ، و أنا ما مسحتش البوست ، يبقى فية حاجة غلط ... سبتلها تعليق بسألها فية أذا كانت هيا اللى مسحت البوست بتاعها ، ولا الفيسبوك هو اللى مسحة ؟ ... ما ردتش ... أمبارح ببص لقيت التعليق التانى بتاعها أتمسح ، و حسابها المؤقت برضة أتلغى

كدة 3 أعضاء من الجروب أتلغت حساباتهم فى خلال يومين : 1- Egypt Liberals الحساب اللى أتعمل بية الجروب ، 2- البنت بتاعة ال Wall ، 3- البنت بتاعة ال Discussion Board ... و مش أحنا بس ، لأ دة كمان الجروبات اللى بتقول نفس الرأى بتعانى من نفس المشكلة برضة


طبعا الحسابات التلاتة اللى أتلغوا مستحيل تكون تخطت ال limits اللى محددها الفيسبوك للنشاط علية ، لأنها بالمنطق حسابات مؤقتة و مش بيتم أستخدامها ألا نادرا ... يعنى من الآخر ، واضح أن الفيسبوك بيقفل حسابات الناس اللى بتختلف معاة فى الرأى


دة أنا عايز كمان أتخطى المرحلة الدفاعية دى و أدخل فى مرحلة نقد الفيسبوك ... الفيسبوك بيحط كتير جدا من القواعد الغير منطقية و اللى بتتعدى على حريات الأفراد ... يعنى مثلا الفيسبوك بيمنعك أن تستخدم أسم مستعار ، و بيمنعك أنك تستخدم أسم حيوان جنب أو بدل أسمك ، و بيمنع وجود حسابات للمؤسسات و الشركات و المجموعات ، و بيقفل الحساب أذا كان الشخص بيستخدمة لأسباب تجارية ... دة كمان بيقفلك حسابك أذا ضفت أصدقاء كتير ، أو بعت رسايل لأصحابك كتير ، أو حتى أستخدمت ال Search كتير ، أو أذا كنت حاطط صورة مش على مزاجهم


الكلام دة كلة غير منطقى و مالهوش لزمة ... يعنى لو قارنا الكلام دة بالياهوو ... الياهوو مالهوش دعوة أذا كان ليك أيميلين أو تلاتة أو حتى مية ، و مالهوش دعوة أذا كنت بتستخدم أسمك الحقيقى ولا لأ ... مالهوش دعوة بنوعية الصور اللى بتستخدمها ... مالهوش دعوة أذا كان الأيميل دة بتاع شخص طبيعى أو شخص أعتبارى ( مؤسسة أو مجموعة ) ... مالهوش دعوة أذا كنت بتستخدم أيميلك لأغراض تجارية أو لأ ... كل دة ما يخصهوش ، كل القضية أن الياهوو بيديلك حساب مجانى مقابل أنة يحطلك جوا الأيميل أعلانات هو بيكسب منها كويس جدا ، و طالما هو كسبان يبقى يغلس عليك لية ؟؟


أما بقى قصة ال Spammers ، فالياهوو حلها بطريقة بسيطة جدا ... هوا بيحطلك حد أقصى من الرسايل اللى من حقك تستخدمها فى الساعة ، و أذا حاولت تتخطاها بيعتذر و يقولك أرجع كمل بعد ساعة ... لكن الفيسبوك بيسيبك تتخطى الحدود بتاعتة ، و بعدين يقفلك حسابك ... يعنى هو بيحطلك خط أحمر ، و بيغمى عنيك علشان ماتشوفش الخط الأحمر ، و أول ما تعدية يعاقبك ... فين المنطق فى دة ؟؟


أما بقى قصة ال privacy بتاعة الأعضاء ، اللى الفيسبوك بيستخدمها كحجة لمصادرة حسابات الناس ، فدى حجة مالهاش أى معنى ... كل مشترك على الفيسبوك يقدر فى ال Profile بتاعة يختار مين اللى يدخل عندة و مين ما يدخلش ، و أنت من حقك تحزف أى صديق فى أى لحظة ، و لو واحد غلس عليك برسايل كتير أو قالك كلام ماعجبكش ممكن ببساطة تحزفة من الفريندز ... أما بقى الناس اللى بيبعتوا رسايل من غير الأصدقاء ، فدى ممكن الفيسبوك يحلها بطريقة بسيطة جدا و هى أن كل واحد يبقى فى أمكانة يعمل قايمة بالناس اللى ممنوع يراسلوة أو يتصلوا بية على الفيسبوك بأى طريقة ، بالظبط زى ال Block على الياهوو ميل ، و زى ال Ban على جروبات الياهوو


كدة الصورة شكلها أية ؟ ... الفيسبوك حاطط شروط بتتعدى على حرياتنا ، و حاطط حدود ضيقة جدا و مخبيها عننا و لما بنتخطاها بيقفل حسابتنا ، و أذا أختلفنا معاة فى الرأى أو أتكلمنا عنة بصراحة بيصادر حسابتنا


فى البداية كنت عايز أسمى المقال دة " هل يعترف الفيسبوك بحقنا فى الأختلاف معة ؟ " ... لكنى لقيت أن الفيسبوك هو الخصم و الحكم ... الفيسبوك هو اللى بيحط القانون و هو اللى بينفذة ... هو اللى بيظلمنا و هو اللى بنشتكيلة لما حساباتنا بتتقفل ... كل واحد فينا أتنازل عن جزء كبير من حقوقة لما عمل حساب على الفيسبوك ، أو بمعندى أدق أحنا قبلنا أن الفيسبوك يدينا حسابات منقوصة الحقوق


بصراحة ، أنا مش حاسس بالأمان على الفيسبوك ... كل يوم حسابات كتيرة بتتقفل ، و أنا مش مستعد أنى أتعب لسنين طويلة فى نوت و كومينتات و تجميع فريندز و جروبات ، و فى الآخر ييجى موظف غير مقدر لوضعى و مجهودى و يحذف دة كلة بضربة ماوس ... نفسى أنقل لل MySpace ، بس المشكلة مش لاقى حد هناك ، على الرغم من أن ال MySpace أقدم و أحسن من الفيسبوك


طبعا ممكن نعمل حملة أكبر و نجمع بعضنا و نوصل للفيسبوك رسالة نعبر فيها عن موقفنا من الحاجات اللى أتكلمت عنها ، بس اللى شفتة بوضوح فى الحملة اللى عملتها الأسبوعين اللى فاتوا ، أن شعبنا محدش فية بيتحرك ألا لما يتقرص ، بمعنى أنة محدش بيحس بحجم المشكلة ألا لما يقع فيها بنفسة ... معندناش بعد نظر ... ضرورى نستنى المصيبة لما تقع علشان نحس بيها ، بس بيكون فات الأوان


مواضيع ذات صلة

حسابى رجع يا جدعان ... فلتحيا المقاومة الليبرالية

أخيرا الفيسبوك رد عليا

ساعدونى علشان أسترجع حسابى على الفيسبوك


7 comments:

Anonymous,  28/09/2008, 00:47  

ركز أكتر
اللي بيمسح اليوزرات بتاعتك مش الفيس بوك، و مش لازم يكون الفيس بوك لواحده
بتوع الداخلية

محمد الكومي 28/09/2008, 15:44  

انا مع الاخ الغير معرف اللي فوق

الفيس بوك مخترق امنيا تماما هو و باقي خدمات جوجل كمان

اامن حاجة يا ميكو دلوقتي هية الياهو لان ماعليهوش اي سيطرة حكومية

Maikel Nabil Sanad مايكل نبيل سند 28/09/2008, 20:54  

طبعا أحتمالية أن الأمن يكون لية يد فى الموضوع ، أحتمالية لا يمكن أستبعادها

بس لية الأمن هايقفل حسابات الأجانب اللى فى الجروب ، و فى نفس الوقت يسيب حسابات المصريين ؟؟
اللى أنا شايف أنة منطقى ، أن الفيسبوك قرا الكلام اللى بالأنجليزى و قفل حسابات الأشخاص اللى كتبوة ... أما الكلام العربى ، فالفيسبوك معرفش يقراة ، و بالتالى ساب اصحابة

تحياتى

Anonymous,  30/09/2008, 03:13  

انا متابع معاك موضوع الفيس بوك من أول ما كتبت عنه ...بس لىّ سوال و لك الأحقية فى عدم إجابته أو إجابته

أنت ليه تعبن نفسك كده ...لو الفيس بوك بيلغى الى بتكتبه و حساباتك ما فى الف مكان تانى غير الفيس بوك
ممكن تسجل فيه و 10/10
و بعدين دى سياستهم كده ..فرضا\ص هما مش عاوزين اللكلام السياسى و غيره خلاص مع الف سلامة سيبهم و شوف غيرهم و متتعبش نفسك.
عموما بردو دى حاجة ترجعلك

سلام و ربنا معاك

Maikel Nabil Sanad مايكل نبيل سند 30/09/2008, 09:00  

لما بتعمل حساب على الفيسبوك ، الفيسبوك بيخليك توافق على أتفاقية ... الأتفاقية دى تعتبر عقد بينك و بين شركة الفيسبوك ، و طالما أنا ماكسرتش أى بنود العقد ، اذا أنا صاحب حق ، و مش هتنازل عنة

دة غير أن مفيش مكان أحسن من الفيسبوك زى ما أنت بتقول

كمان لو الفيسبوك مش عاوز سياسة ، يبقى بلاش سياسة للكل ، مش أنا بس اللى يمنعنى من السياسة

تحياتى

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP