ساعدونى علشان أسترجع حسابى على الفيسبوك

>> 15 September 2008



ست أيام عدوا من ساعة ما الفيسبوك قفل حسابى .... و على الرغم من أنى بعتلهم رسايل كتير ، لكن محدش فيهم رد عليا .... و علشان كدة أنا مضطر آخد خطوات تانية علشان أسترجع حسابى

أعتقد أنة جة الوقت اللى فية ضرورى كلنا نتحرك علشان الفيسبوك يوقف وصايتة على نشاطنا ... النهاردة قفلولى حسابى ، و بكرة هايقفلولك حسابك ... و فوق كدة أهانتهم لينا بتجاهل رسايلنا ... اللى مش هايتحرك النهاردة ، يبقى مايلومش ألا نفسة لو قفلولة حسابة فى يوم من الأيام

أنا فكرت فى مجموعة من الخطوات اللى ممكن نعملها علشان نضغط على الفيسبوك علشان توقف سياستها فى قفل الحسابات ، و فى نفس الوقت ترجع الحسابات اللى أتقفلت و منها حسابى أنا و حساب أمنية طلعت

1- أول حاجة ، أنا تقريبا مش هعمل حسابات تانية على الفيسبوك ... طالما الفيسبوك مش بيحترم أعضاؤة و بيسمح لأعداء حرية الرأى أنهم يعاقبونا بسبب آرائنا ، يبقى الفيسبوك مايستحقش عضويتنا فية .... الفيسبوك هو اللى محتاجلنا مش العكس ، الفيسبوك بيكسب فلوس كتير أوى من الأعلانات اللى بيحطها فى صفحاتة ، و فى خلال السنين الأخيرة سعر الفيسبوك تضاعف ألوف المرات بسبب العضويات اللى بتزيد و معاها حجم الدخل اللى بيكسبة الموقع من الأعلانات ... علشان كدة لازم نعرف أن عضويتنا ورقة ضغط نقدر نستخدمها بقوة علشان نحافظ على حقوقنا جوا الفيسبوك
علشان كدة أذا الفيسبوك مارجعش حسابى ، أنا مش ناوى أعمل حسابات تانية علية ، و هنقل نشاطى لواحد من المواقع البديلة .... و أنا فعلا أبتديت أنشط حساباتى على ال my space و ال Hi5 و كمان على ال Netlog ... ياريت بقى كل واحد يبتدى يعمل حساب على أى موقع من التلاتة دول ، و ماينساش يضيفنى عندة ... أنفراد الفيسبوك و أحتكارة للنوعية دى من النشاطات على الأنترنت هو اللى بيخلية يتوحش فى معاملتنا ... و فى نفس الوقت أكيد محدش يحب أنة بعد ما يقعد يبنى فى حساب على الفيسبوك ، و يجمع أصدقاء و يرفع ألبومات صور كاملة ، ييجى موظف غير مسئول يضيع كل التعب دة بضغطة زرار

2- تانى حاجة ، ضرورى نبتدى حملة رسايل للفيسبوك نعلن فيها رفضنا لوصايتة على نشاطاتنا .... أنا جمعت مجموعة من الأيميلات اللى ممكن نراسل الفيسبوك عليها .... ياريت اللى راسل الفيسبوك قبل كدة من أيميلات تانية ، أو يعرف أيميلات تانية ليهم ، ياريت يبعتهالى أو يسيبها فى التعليقات


دى الأيميلات بتاعتهم اللى عندى لحد دلوقتى .... ياريت بقى كل واحد ينسخ الأيميلات دى كلها و يبعت عليها كلها مرة واحدة ... أما بقى نص الرسالة ، فاللى يحب يتكلم براحتة و يعبر عن رأية مفيش مشكلة ، أما بقى اللى مش عايز يتعب نفسة فممكن ينسخ السطرين اللى بالأنجليزى اللى تحت و يبعتهم ، و هما فيهم الكفاية ... رسالة واحدة مش هاتكلفك دقايق ، لكنها هاتبقى خطوة تحاول تأمن بيها نفسك من إلغاء حسابك ... و كمان أذا كان وصلهم ضدى 100 ريبورت ، فيمكن لو وصلهم 100 رسالة بيدافعوا عنى يرجعولى حسابى ، و مش معقولة يكون الفاشيست عندهم مبادرة و أيجابية أكتر مننا ... و أنا شخصيا لو حسابى مارجعش هفضل أبعتلهم رسايل كل يوم لحد ما يزهقوا منى ... دة نص الرسالة للى مش عايز يكتب

Enable Maikel Nabil's account
Stop Your Disabling policey
Don't believe every Report
Don't stand against the right of expression
Leave our accounts alone

3- أنا أستخدمت حساب مدير مجموعة الليبراليين المصريين و عملت جروب جديدة على الفيسبوك أسمها Against Disabling Accounts on Facebook (ADAF) .... الجروب دى شغالة بالعربى و الأنجليزى ... ياريت كل اللى ليهم حسابات على الفيسبوك ينضموا ليها و يدعوا كل أصحابهم ... الفيسبوك ضرورى يحس أن المشتركين علية رافضين وصايتة علينا و قفلة لحساباتنا ... لو عدد أعضاء الجروب دة كبر و لفت الأنتباة ، هايبقى ورقة ضغط تانية فى أيدينا علشان الفيسبوك يستجيب لرغباتنا
كمان مطلوب أن الجروب دة يكون نشيط ... يعنى ضرورى نعملة الدعاية المناسبة ، و المدونين يقدروا يعملوا دى كويس ... كمان ياريت كل واحد يشارك برأية فى الجروب .... و ياريت كل واحد يعمل بحث على النت عن موضوع قفل الحسابات على الفيسبوك و ينقل المقالات الموجودة لصفحة الجروب ... النت مليان بمجموعات كتير من ضحايا الفيسبوك ، و أحنا عايزين نربط نفسنا بكل المجموعات دى

4- ياريت أى واحد حاسس أن حسابة أتقفل ظلم ، و خصوصا لو كان ناشط سياسى أو حقوقى أو مدون أو كاتب ، ياريت يراسلنى و يحكيلى عن اللى حصل معاة ، أو يكتب اللى حصل معاة على الجروب اللى عملناها .... و هيكون جميل جدا لو كان معاة أدلة تصلح للنشر ، زى مثلا print Screen للرسايل اللى كانت بينة و بين الفيسبوك

5- كمان ياريت حد يكون وقتة يسمح ، يتبنى الموضوع دة بطريقة أكتر ، و يعمل مدونة مخصوص للحملة دى ، و ياريت تكون المدونة دى بكذا لغة ... أحنا عايزين نكون رأى عام رافض لوصاية الفيسبوك على نشاطاتنا ، و بالتالى نقفل أى ثغرة بيستخدمها الفاشيست علشان يصادروا حريتنا

6- المدونين و أصحاب المواقع مدعويين أنهم يكتبوا عن الموضوع دة ، و يشرحوا وجهة نظرهم فى القضية ... و الموضوع دة مش تافة ولا حاجة ، لأننا أذا معرفناش ناخد حقوقنا من موقع محترم ، يبقى مش هانعرف ناخدها من حكومة غير محترمة

7- فية حملة جمع توقيعات دولية ضد سياسة الفيسبوك فى إغلاق الحسابات ، ياريت كلنا ندخل و نوقع عليها

8- هدف الأمن الرئيسى فى إلغاء حسابى ، هو أنهم يعزلونى عن أصدقائى اللى موجودين على الفيسبوك ، و فعلا بعد ما حسابى أتلغى أنقطعت صلتى بناس كتيرة لأنى معرفش أيميلاتهم أو أرقام تليفوناتهم ... أنا حاليا بستخدم حساب مدير جروب الليبراليين المصريين ... ياريت الكل يضيفنى عندة ، و بعد ما يضيفنى يعملى Suggest لكل المدونين و السياسيين اللى موجودين عندة ... أنا عايز أكسر الحصار و العزلة اللى فرضهم عليا قفل حساب الفيسبوك

فى النهاية ، بشكر كل واحد بيتضامن مع الحملة دى ، و بأكد أن كلنا محتاجين حرية الرأى و التعبير مش أنا بس ، و كلنا بنعانى من القمع الأمنى مش أنا بس

مواضيع ذات صلة

5 comments:

Anonymous,  15/09/2008, 12:52  

أخي العزيز مايكل،
لا أنكر في الحقيقة إعجابي بفكرك وثقافتك وليبراليتك وإيجابيتك الجميلة
ولكن، تساؤل شخصي من أين تأتي بالوقت والمال اللازم لنشاطاتك "الليبرالية التنويرية" هذه؟
وأنت كما تقول أنك طالب في السنة النهائية في الطب البشري أو البيطري لا أتذكر
ثانياً: مع كل إحترامي لجرأتك النادرة في مصر كلها وبخاصة في الصعيد وفكرك المتحرر، أجد أنك شخص غير مسئول، بمعنى أنك كما تقول تواجه هجوم من الإسلاميين وأمن الدولة ... إلخ لنشاطك السياسي، فهل وضعت في إعتبارك أنك في الصعيد المظلم وفي نظام فاشي متعجرف، ولما لجرأتك من تبعات قد تضر بك شخصياً أو بمن له صلة بك، فهل تقبل هذا الثمن الباهظ مقابل رفعك راية الليبرالية في حفنة مواقع لا تقدم ولا تؤخر من واقع البلاد شيئاً؟
أنا لست ضابط أمن دولة ولا متأسلم ولا متدروش، بل أنا طبيب ذاق الأمرين في مصر وأسعى للخروج منها بشكل نهائي وأتمنى التوفيق، ولكنني كتبت هذا من واقع خوفي على الكوادر الشابة المتفتحة مثلك، كنصيحة من أخ أكبر يعرف ما هي مصر جيداً وبشكل واقعي بعيداً عن نظريات الثورة الفرنسية
فبإمكانك أن تشارك في العمل السياسي في بلد تحترم هذا الحق، ولكن طالما أنك في مصر فأنت مهدد، هذا ليس مدعاة للجبن أو التخاذل ولكن دعوة للعمل بحكمة وحرص...فنحن يجب أن نطالب بحقوقنا ونشارك بإيجابية ولكن في حدود لا تعرضنا للخطر، لأنه يكفيك موقف واحد تصادم واحد فقط تنتهك فيه حقوقك، وهو كفيل أن يحطم حياتك كلها، هذا عن تجربة مريرة مع شياطين المتأسلمين ولازلت أعالج فيها حتى الآن ولا أعلم إلى متى سأظل أعاني من نتائجها
وهي تجربة بسبب التعصب المقيت وليس بسبب جرأتي أو عملي السياسي الجرئ مثلك، لمجرد أناساً يكرهون الآخر ويكرهون النجاح والناجح
فما بال من يلعب في عش الدبابير ذاته مثلك
صدقني...أنت لازلت صغير ولن ولا من يحبونك سيحتملون، كن حريص
مع محبتي وأحترامي
طبيب أسيوطي

عمر الشرقاوى 16/09/2008, 00:46  

مايكل
على فكره حساب امنيه طلعت شغال ومكلمانى النهارده ومعلقه على التوبك بتاعها
اكيد فى حاجه غلط فى اسم دخولك او الباسورد حاول تانى

Maikel Nabil Sanad مايكل نبيل سند 16/09/2008, 03:28  

مبدئيا يا دكتور ، أنا بشكرك على اهتمامك و على نصيحتك ليا بالحرص ... بس بصراحة أنا شايف أن الواقع السياسى مختلف تماما عن رؤيتك لية ... أحنا عندنا نظام بيقع ، و حكومة بتهار ... فى رأيى الحكم هايطلع من عيلة مبارك فى حد أقصى 10 سنين ... المشكلة الحقيقية مش فى النظام القمعى ، المشكلة فى الشعب ، من ناحية بسبب ثقافتة السيئة ، و من ناحية بسبب سلبيتة ... لو مصر فيها كام ألف معارض محترم ، كان نظام مبارك وقع من زمان

بالنسبة لكلامك عن تجربتك المؤلمة ، فأنا شايف أنها حافز يحرك الناس مش يثبطهم ... يعنى أنا بحاول أخلق ديموقراطية علشان أتفادى موقف زى اللى وقعت فية حضرتك ... كمان أذا كنت هاتظلم فى كل الأحوال ، فأكيد هايكون أسهل عليا أنى أتظلم و أنا عارف أنى بتعاقب على حاجة صح عملتها ، من أنى أتظلم بدون سبب ألا فاشية الظالم

أما بالنسبة للتمويل ، فالمدونات ببلاش ، و أى حد عايز يعمل مدونة أو ينضم لحزب مش هايتكلف أى حاجة ... و بالنسبة للوقت ، فمفيش حد بيشتغل 24 ساعة ، يعنى أكيد الواحد هيلاقى ساعة أسبوعيا على الأقل يكتب فيها مقال

تحياتى

Maikel Nabil Sanad مايكل نبيل سند 16/09/2008, 03:30  

عمرو الشرقاوى

أمنية طلعت عملت حساب تانى بأيميل تانى ، و هو اللى بتكلمك منة ، لكن حسابها الأصلى مارجعش لحد دلوقتى ، و الدليل موجود و ممكن تشوفة بعينك لو حاولت تضيف أيميلها .... هتلاقى برنت أسكرين فى مقال : الفيسبوك يصادر حسابى

تحياتى

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP