الفيسبوك يصادر حسابى

>> 10 September 2008


" الدور جة عليا " ... دى كانت أول حاجة فكرت فيها لما الفيسبوك رفض يدخلنى على حسابى أمبارح ... مكنش الموضوع مفاجأة ، كنت متوقع أن الحركة دى ضرورى تحصل ، بس يمكن مكنتش متوقع أنها هاتحصل معايا فى الفترة دى


اللى حصل بكل بساطة أنى لما كتبت أيميلى و الباسوورد ، الفيسبوك رفض يدخلنى و قاللى أن فية واحد من مديرى الموقع قفل حسابى ... و اللى يغيظ أنهم مقالوش أى طريقة ممكن أسترجع بيها حسابى ، كأنهم معندهمش أى نية أنهم يرجعوة تانى ، و دة بعكس كتير من المواقع اللى لما تقفلك حسابك بتقولك أنك لو حاسس أنك مظلوم ممكن تراسل الأيميل دة أو ممكن تضغط على الزرار دة أو تعمل أى حاجة يطلبوها منك ... أما بقى اللى يغيظ أكتر ، هو أن الفيسبوك مابعتوليش أى أنزار قبل ما يلغولى الحساب على الرغم أنهم متعودين يبعتوا أنزارات للناس قبل مايلغولهم حساباتهم ... يعنى من الآخر مش بس بيلغولى حسابى ، لأ دة كمان فية معاملة سبيشيال


أما بقى لية الموضوع دة مكنش مفاجأة بالنسبالى ، فدة لأن الأمن المصرى بقيت طرقة كلاسيكية و مكررة و تقليدية بطريقة مملة جدا ... عندهم أزمة حقيقية فى التفكير و الأبتكار ... فاللى حصللى حصل لعشرات المدونين و السياسيين قبلى ، و هيحصل لناس كتير بعدى ، يعنى من الآخر مفيش جديد ، هما مايعرفوش غير كدة


زمان كانوا بيستغلوا الثغرات فى نظام الياهوو Yahoo! ، و كانوا بيبعتوا رسايل يشتكوا فيها السياسيين و المدونين ، و يتبلوا عليهم بأى تهم ... و الياهوو لفترة كبيرة أنضحك عليها و قفلت حساب وائل عباس كذا مرة ، و برضة قفلت حسابات و جروبات مدونين تانى ... لكن مع الزمن الياهوو فهمت اللعبة و بطلت تصدق الرسايل دى


بعد كدة أبتدوا يستغلوا الثغرات فى موقع أستضافة المدونات ( بلوجر Blogger ) علشان يقفلوا المدونات ، و نجحوا فعلا أنهم يقفلوا بعض المدونات ... و ساعات مكانوش بيقدروا يقفلوا المدونات لكنهم كانوا بيقدروا يجمدوا المدونة كام يوم ، بمعنى أن المدون يقعدلة يومين تلاتة من غير ما يقدر ينشر أو يغير أى حاجة فى مدونتة .... لكن برضة بلوجرز مع الزمن فهمت اللعبة و بطلت تقفل المدونات


فاضل بقى الفيسبوك Facebook ... زمان الفيسبوك مكنش مهم ، لأن عدد المصريين المشتركين علية كان قليل ... لكن فى السنة الأخيرة كتير من المصريين عملوا حسابات على الفيسبوك ، و أتكونت كتير من الجروبات علية ، سياسية و دينية و أجتماعية و ثقافية و كل اللى نفسك فية ... المدونين أبتدوا ينقلوا نشاطهم لية ، لدرجة أن أحمد بدوى فكر يلغى مدونتة و يكتفى بجروب على الفيسبوك ... كل الجروبات اللى كانت على الياهوو أو الجوجل أبتدت تفتح فروع على الفيسبوك ، و ساعات الفرع بتاع الفيسبوك بيكبر و يبقى أنشط و أكبر من الجروب الرئيسى على الياهوو ... و بكدة الفيسبوك بقى أكبر موقع بيؤثر فى الحياة السياسية فى مصر السنادى


و أهمية الفيسبوك تضاعفت مليون مرة مع أضراب 6 أبريل ... دعوة بسيطة من شباب فى العشرينيات من عمرهم ، كانت ممكن دعوتهم محدش يسمع عنها لو أتحطت على أى مدونة أو أى موقع تانى ، لكنها لما أتحطت على الفيسبوك نجحت نجاح غير مسبوق ... المفاجأة كانت فى أنضمام أكتر من سبعين ألف مصرى لجروب الأضراب ، و العدد دة يعتبر عدد مهول جدا بالنسبة للجروبات المصرية على الفيسبوك ، و بالنسبة للفترة الصغيرة اللى أتجمع فيها العدد الكبير دة .... و أضراب 6 أبريل رعب النظام المصرى لأنة ببساطة بقى نظام هش جدا و سهل أى حد يوقعة ، و لأول مرة من سنين طويلة نلاقى الداخلية بتنزل بيان قبل معاد الأضراب تهدد فية الناس من المشاركة فى الأضراب


عدى الوقت و أضراب 6 أبريل نجح ، و جة بعدة أضراب 4 مايو ، يوم عيد ميلاد اللواء حسنى مبارك ... و بحكم أنى فى الصعيد معزول عن مجرى الأحداث ، فكنت طول يوم 4 مايو بحاول أدخل على الفيسبوك علشان أتطمن على أصحابى اللى مشاركين فى الأضراب ... و طول يوم 4 مايو كان الفيسبوك محجوب ، فى الأول فكرت أن فية مشكلة فى الموقع ، لكن لما قدرت أستخدم الموقع من خلال البروكسيات عرفت أن المشكلة مش فى الموقع .... و آخر النهار لما الأمن أتأكد أن الأضراب عدى من غير مشاكل ، أتفك الحجب عن الفيسبوك و الموقع أشتغل عادى


و مع زيادة قيمة الفيسبوك يوم بعد يوم ، الأمن أبتدى يدور على وسايل يضايق بيها المدونين و المعارضين ... و لحسن حظة مكنش الموضوع دة صعب ، لأن الفيسبوك بيفرض نوع من الوصاية على نشاط المشتركين عندة .... يعنى فى كل جروب و فى كل نوتة و تحت كل كوممينت ، تلاقيهم حاطين كلمة " Report " ... الكلمة دى تضغط عليها لو أنت شاعر أن الشخص اللى كاتب التعليق دة أساء أستخدام الفيسبوك ، أو أنة بيسئ لغيرة فى كلامة .... و لو عدد اللى أستخدموا الزرار دة زادوا عن 100 شخص ، الفيسبوك بيقفل الحساب تلقائيا ... و تقريبا الفيسبوك مابيعرفش يحقق فى الشكاوى دى ، لأننا بنكتب بالعربى على الفيسبوك و بالتالى بتبقى عندهم صعوبة فى فهم الكلام بتاع المدونين


المهم الأمن و الأسلاميين فهموا اللعبة دى ، و كتير كنا بنشوف على الفيسبوك جروبات بتجمع المتخلفين أعداء حرية الرأى و التعبير و بيوجهوا أتباعهم علشان يعملوا ريبورت للمختلفين معاهم فى الرأى ... و كتير جدا كانوا بينجحوا فى كدة فعلا ، علشان كدة أنا قلت أن الأسلوب بقى كلاسيكى و مفضوح جدا


- يعنى مثلا أحمد ماهر مؤسس جروب أضراب 6 أبريل ... قفلولة حسابة قبل الأضراب بكام يوم ، و بعد ما قفلولة حسابة خطفوة و عذبوة فى أمن الدولة لمدة 3 أيام

- محمود الفرعونى وكيل مؤسسى الحزب المصرى الليبرالى ( تحت التأسيس ) ، قفلولة حسابة من أسبوعين ، و فى نفس اليوم بعتولة 3 سلفيين يهددوة بالقتل ، و بعد كدة سحبوة أمن الدولة و هددوة تانى

- أمنية طلعت ، صحفية مصرية و كاتبة بارعة ، قفلولها حسابها من أكتر من 6 شهور ، و كل المحاولات اللى أتبذلت علشان حسابها يرجع مانفعتش ، لدرجة أن مجموعة كبيرة من أصدقائها عملوا جروب على الفيسبوك بيعترضوا فية على اللى أتعمل معاها ، و برضة مفيش فايدة ... كذا مرة أحاول أضيف أيميلها ، لكن الفيسبوك بيرفض

- محمد ماهر ، صحفى و ناشط سياسى ، قفلولة حسابة من حوالى سنة بعد تعليق كتبة عن الريس

- رامى رؤوف ، ناشط حقوقى من المنيا ، قفلولة برضة حسابة من 3 شهور ... يمكن علشان نشاطة فى مجال حريات الأقليات الدينية ، أو علشان يغطوا على الأزمة الطائفية اللى كانت موجودة فى المنيا فى التوقيت دة

و أسماء غيرهم كتير لصحفيين و مدونين أتقفلت حساباتهم ، فيهم اللى عرف يرجعها تانى ، و فيهم اللى ماعرفش يرجع حسابة تانى و خسر كل التدوينات و التعليقات و الأصدقاء و الصور و الجروبات اللى عملها على الفيسبوك



طيب هما لية بيقفلولنا حساباتنا ؟

أسباب كتير .... ساعات بتبقى غلاسة ... و ساعات بتبقى عقاب على تصرف أنت عملتة ضايقهم ... و ساعات بيبقى نشاطك كبر و هما مش عايزينك تكبر أكتر من كدة ... و ساعات بيبقوا عايزين يعملولك حاجة ، فعايزين يفصلوك عن كل أصحابك و حبايبك علشان يعملوا فيك اللى هما عايزينة من غير ما حد يحس ، بيقصقصوا ريشك يعنى


طيب أنا عايزين منى أية ؟

أعتقد أن اللى حصل معايا جزء من الحملة اللى بتدار حاليا ضد الناشطين فى أسيوط ... فى البداية أبتدوا مع محمود الفرعونى ، و بعد كدة كملوا على حسام حسن شحاتة أمين شباب حزب التجمع فى أسيوط ، و الدور جة عليا ... أنا حاولت كتير ألفت نظر الأحزاب و المنظمات للهيمنة الأمنية فى الصعيد و خصوصا فى أسيوط ، لكن للأسف محدش عايز يصدق ... هنا يقدروا يصفونا كلنا تصفية جسدية فى لحظات من غير ما يسيبوا أى دليل ضدهم

يمكن الموضوع برضة يكون لية علاقة بالمفاجأة اللى ناوى الحزب الوطنى يفجرها فى مؤتمرة فى نوفمبر الجاى ... يعنى يمكن بيخوفونا و بيقصقصوا ريشنا علشان لما نعرف بالموضوع مانعرفش أو نخاف نعترض علية


طيب أنا هعمل أية ؟

أمبارح ، أول ما لقيت حسابى أتقفل ، رحت باعت رسالة للفيسبوك ( قدامكم نسخة منها ) ، لكن لسة محدش رد عليا ... أنا هستنى كام ساعة تانى ، و أذا الفيسبوك ماردش عليا أو مارجعليش حسابى ، يبقى هصعد مواقفى ضد الفيسبوك لحد ما يرجعلى حسابى ... أنا ماعملتش أى حاجة تضر الفيسبوك ، كمان أنا ما أعتديتش على أى حد فى كلامى ، و مش هقبل أبدا أنى أتعاقب علشان أستخدمت حقى الطبيعى فى التعبير عن آرائى ... و مش هتنازل و أعمل حساب جديد و أخسر نشاط السنة اللى فاتت كلها بكل التدوينات و التعليقات و الجروبات و الأصدقاء اللى عملتهم ... مش هسيب حقى ، ولا يضيع حق وراءة مطالب



Read about this subject in English


14 comments:

beshoy makram 10/09/2008, 19:29  

اولاً بقدملك تحياتي الخالصة علي مقالاتك وموقفك السياسي المعتدل وعلي فكرة انا من المتابعين لكل مقالاتك والمعجبين بطريقتك في عرض الحقائق , بس بالنسبة لحكاية الفاسبوك فده بصراحة انا مش متفق فيه لأني انا برضه كان ليه عضوية واتحذفت بنفش الطريقة اللي حصلت مع حضرتك وبرضه بدون سابق انذار , واكتر من واحد اعرفه حصلت معاه نفس الحكاية فالموضوع مش موضوع لعبة من الحكومة واسلوب من اساليبهم المعتادة , يمكن علي الياهو او البلوجر حصلت الحكاية دي لكن صدقني بالنسبة للفاسبوك فده موضوع عادي وبيحصل مع ناس كتير وليه اكتر من سبب...عموماً بقدملك تحياتي للمرة التانية وبأكد لك تاني ان الموضوع بتاع الفاسبوك ده مش شخصي خالص

Anonymous,  12/09/2008, 11:39  

هههههههههه
سورى يا مايكل تعيش وتاخد غيرها
انا بضحك لانى انا عملت ريبورت على البروفيل بتاعتك وكمان قولت لكل اصحابى - وما اكثرهم - انهم يعملو ريبورت عليك
انا لم اعرفك بشكل شخصى لكن متابع البلوج بتاعك وارائك مش بتعجبنى

Maikel Nabil Sanad مايكل نبيل سند 12/09/2008, 14:11  

بيشوى مكرم

أنا عارف أن موضوع الفيسبوك بيحصل مع ناس كتير مالهاش دعوة بالسياسة ، لكن دة مايمنعش أن نظام الفيسبوك فى إلغاء العضويات دة ثغرة سهلة يقدر الأمن يستغلها

يعنى مثلا ، هل صدفة أن حساب محمود الفرعونى يتقفل فى نفس اليوم اللى الأمن هددة فية ؟
و هل لما تلت شخصيات حزبية فى أسيوط كلهم تحصلهم مشاكل فى 3 أسابيع ورا بعض ، هل دى صدفة ؟

و أعتقد أن التعليق التانى بيؤكد وجهة نظرى

تحياتى

Maikel Nabil Sanad مايكل نبيل سند 12/09/2008, 14:17  

بالنسبة للتعليق التانى

أولا أنت شخص جبان معندكش أدنى شجاعة أنك تكتب أسمك ... و يكفينى شرفا أنى بكتب تحت أسمى الحقيقى على الرغم أنى عايش فى دولة بوليسية قمعية ، مش جبان زيك ياللى خايف من مدون زيى معندهوش أى سلطات

ثانيا أنت شخص مفلس مش عارف ترد على آرائى ، فبتكمم فمى و بتمنعنى من الكلام ... ما هو أنت لو فاهم حاجة فى الدنيا ن كنت ناقشتنى فى كلامى

ثالثا أنت واثق من ضعف و زيف معتقداتك ، علشان كدة مقولتش أية هى نوعية آرائى اللى بتختلف معايا فيها

بكرة أنت و أمثالك هتروحوا لمزبلة التاريخ يا أعداء الحرية

Anonymous,  13/09/2008, 02:28  

ههههههههههههههههههههههههههههههههههههههههههههههههههههههههههههههههههههههههههههههههههههههههههههههه

Anonymous,  13/09/2008, 13:00  

بما انك اتكلمت على ضعف وزيف معتقداتى فا انت غلطان ، مش معنى انى مش حاطه اسمى يبقى انا خايفه
على فكره انا بنت
وبنت مسيحيه
لكن ده ما يمنعش ان ارائك ما تعجبنيش
ودى حاجه مالهاش دعوه بالعقيده او بالمعتقدات
لكن كل الموضوع انى معنديش البلاغه الكافيه فى الكلام انى اناقشك
بس

Anonymous,  13/09/2008, 14:14  

اما ليه بأه مش حاطه اسمى
ده مش خوف ولا حاجه
انا معنديش اى حاجه اخاف منها
لا منك ولا من الامن
لكن مجرد وجود اسمى فى مدونتك بيديلك شرف ومكانه انت ما تستحقهمش
لانك شخص فاشل
اه فاشل
فاشل فى حياتك
ودراستك
حتى بين اصحابك فاشل
حتى الحزب الليبرالى كنت فاشل فيه
ومنبوذ لغايه ما لفظوك

اما بخصوص مزبله التاريخ والكلام الفارغ ده فا انا ما يهمنيش ابدا ان التاريخ يفتكرنى لا فى مزبلته ولا فى لوحه شرفه
التاريخ ما هو الا مجرد تفاهات

Anonymous,  14/09/2008, 04:27  

الفاضل الدكتور مايكل
كثير من الأعضاء تم إيقاف حسابهم بدون سبب أو معنى ، وبدون أن يكون لهم نفس نشاطك وحيويتك . لهذا أنا أرى أن مصادرة حسابك فى الفيسبوك يمكن أن يكون له عدة أسباب وليس فقط ماذكرت فى خطابك .
لقد تأثرت كثيراً من تعليقات السيدة التى ارسلت عدة تقارير ضدك إلى الفيسبوك وطلبت من أصحابها أن يفعلوا مثلها ، لمجرد أن أفكارك لم تعجبها.
رغم أننا لانعرف من هى هذة "البنت" – كما أطلقت على نفسها – لكن تصرفها ليس غريباً علىَّ وهى ليست غريبة عن مجتمعنا وليست دخيلة علية. فنحن نصادف أمثالها فى كل مكان وزمان وفى كل يوم من أيام حياتنا. هؤلاء هم أعداء الحرية يامايكل... فلاتتعجب ياأخى ...
والحقيقة أنا لاأدرى لماذا ذكرتنا هذة البنت بأنها "مسيحية"
وكأن كونها مسيحية يعنى شيئاً فى إطار مانناقشة. هذا هو أسلوب الفكر المسيحى المتعصب الذى يتصور أن مجرد ذكر أنة مسيحى يجعلك تقيمة وتقيم أفكارة وتصرفاتة بطريقة مختلفة عن تقيمها إذا كانت غير مسيحية. ماهى علاقة كونى "مسلم" بماأكتب وماهو علاقة كونى "غير مسيحى" بما أناقش ولكنها العنصرية البغيضة التى تجتاح نفس "البنت المسيحية" . والعجيب أنها أخذت من قولها بأنها فتاة مسيحية ذريعةً تدفع بها عن نفسها تهمة الزيف والضعف وتصرفها المخجل .... بنت تعباتة قوى يامايكل!!!.
إن أعداء الحرية ليسوا - فقط - هؤلاء الذين يسجنون الأبرياء فى سجون الظلم ولكن ينضم لهم أعداء الكلمة والصحافة والتعبير.
و عداوة الفكر والكلمة ليست حكراً على جنس أو دين أو مذهب أو معتقد ، وهى ليست أيضاً حكراً على مستوى فكرى أو درجة علمية. عداوة الفكر داء يتفشى بين أفراد المجتمع بكل طبقاتة الفكرية والثقافية والمذهبية.
فأنظر إلى تلك البنت التى لم تتورع من أن تعمل على إخفاض صوت أفكارك لمجرد إنها لم تعجبها ، فراحت تستغل قدرتها على رفع تقرير ضدك ، بل لم تكتف برفع التقرير ضدك ولكنها كانت تحرض الأخرين على ذلك دون أن تترك لهم حرية التقرير.
مثل هؤلاء من أذناب البشر لا يقدروا أن يميزوا بين ماهو حق وماهو كائن ، ماهو قانونى وما هو أخلاقى ، ماهو مقدور علية وماهو إنسانى .
أعداء الكلمة يامايكل يعملون على قهرها قهرا كاملا بطرق شتى مثل التخويف و التشكيك والرقابة الذاتية والوشاية، بما يصحبها من إرضاء لأحاسيس الأنتقام والتشفى فى مصائب الخلق.
وأنا لا أرى أى سبب لضيقك بسبب مافعلتة تلك "البنت" ، فهى فتاة متعصبة ، فقيرة فى الفكر والقول (ليست لديها البلاغة الكافية فى الكلام حسب ماذكرت لنا)، مملؤة بالغل والتشفى فيما أصاب الناس من بلايا وأشياء كثيرة يمكن أن تستبطنها من كلماتها القمئية الملؤة غلاً وحسداً ضد المختلفيين معها.... لاتحزن يامايكل إنها واحدة من تلك الأذناب التى لايهمها أن تذكر فى مذبلة التاريخ أو فى لوحة شرفة ، إنها واحدة من الذين قدر لك ولمن مثلك أن يتعامل معهم..... إنها طفلة جديدة ولدت فى مصر لتنضم إلى فريق أطفال الحجارة الذين لايملكون الا القدف والهدم والتحطيم ..... كيرلس كامل

Anonymous,  15/09/2008, 01:10  

Dear Michael, Kerelos Kamal got it right, this Christian girl is not only one of the freedoms enemies but she is also a liar and a deceiver. She said in her first comment that she personally does not know then in her last comment she said that she knows that you are a failure in your personal life, in your studies etc …, how on earth she does not know you personally and then she says that she knows that you are a failure. It seems that her Christianity did not only teach her how to be freedom enemy but also a liar, fraud and a deceiver, Ahmad Khalefa

Anonymous,  15/09/2008, 11:02  

اية يادكتور مايكل ياأخويا أية موضوع البنت العيانة دى ...
مرة تقولك أنا ماأعرفكش ومرة بتتكلم عليك كأنها تعرف كل حاجة عنك وعن حياتك وأصحابك ودراستك وميولك السياسية والليبرالية والبقية تأتى.
جابت المعلومات دى منين يامايكل ....
الظاهر البنت دى واحد من العوانس اللى ماليين كنايسكم وكانت طمعانة فى حسن الجوار لكن أنت خيبت أملها فيك .... مايكل مايكل مايكل , يامحطم قلوب العذارا يامايكل .
قولها فى واحد من إصحابى جاهز بس مسلم ، أنا مستعد أن أكتب عليها وأدخل بها على سنة اللة ورسولة ... أنا عارف أنك ليبرالى وبتاع وحدة وطنية ومش هاتعارض ، أتوسط لى عندها يامايكل اللة يخليك ....
صديقك عزت الطيب

Maikel Nabil Sanad مايكل نبيل سند 16/09/2008, 03:24  

يا جماعة ماتشغلوش بالكم بالتعليقات الهايفة
دى لا بنت ولا حاجة
كل ما فى الموضوع ، أن أمن الدولة عايز يبعد الشبهة عن نفسة ، فبعت حد يبعد نظر الناس عنهم ، علشان الموضوع يبان على أنة أختلاف فى الرأى مش أضطهاد ممنهج للمعارضة
و علشان كدة هيا مسابتش أسمها ، و دة الطبيعى فى كل التعليقات الأمنية اللى بتيجى على المدونة
و دة يفسر المعلومات الشخصية المشوهة اللى كتبتها عنى ... مصدرها تقارير الأمن المضروبة اللى بيألفها المخبرين اللى بيستعبطوا النظام علشان يمشوا مصالحهم

أما بقى لية قالت أنها مسيحية ؟ فدة لأنى لسة عامل فضيحة للأمن بخصوص أستخدامة للتيارات الأسلامية فى تصفية المعارضة ، فلو كان اللى ساب التعليق لمح أنة مسلم ، كانت هاتبقى دليل أضافى ضد الأمن
و برضة الأمن بيلفت نظرى أنة مش بس بيستخدم الأسلاميين علشان يقضى على المعارضة ، لا دة كمان ممكن يستخدم الكنيسة و المتطرفين المسيحيين .... عادى خالص ، مفيش جديد

أما بقى قصة الحزب المصرى الليبرالى ، فأنا اللى أستقلت من الحزب رغم أنى شغلت أعلى مناصب فى الحزب ، و مكنش فاضل غير منصب رئيس الحزب أعلى منى
طبعا أستقالتى منشورة و فيها أسباب أستقالتى ممكن الكل يقراها
http://ra-shere.blogspot.com/2008/07/blog-post_30.html
أنا سبت الحزب المصرى الليبرالى لأنة حزب فاشل .... حزب فشل فى أنة يأسس نفسة فى أكتر من سنتين ، فى الوقت اللى أتأسس فية الجبهة فى كام شهر .... حزب فاشل فى الدفاع عن أعضاؤة ، و معرفش يدافع عن محمود الفرعونى لما أتهدد ، و اللى دافع عنة حزب الجبهة الديموقراطية ... الحزب المصرى الليبرالى هو اللى فاشل مش أنا ، بس الأمن عايزنى أبقى فى حزب فاشل ، لأن دة أحسنلهم من أنى أكون عضو فى حزب ناجح ، لكن دة بعدهم

دليل أضافى ظهر مع الزمن يثبت أن الأمن لية يد فى الموضوع ، هو أن الفيسبوك بيتجاهل كل رسايلى ... كل اللى أتقفلهم حساباتهم على الفيسبوك كانوا بيراسلوا الفيسبوك ، و الفيسبوك بيرد عليهم تانى يوم ... لكن فى حالتى الفيسبوك مش بيرد ، و دة يخلى الواحد يفكر فى الكلام اللى أتكتب فى الريبورتات اللى كانت بتتبعت للفيسبوك ... لو كان الموضوع عادى زى اللى بيحصل مع كل الناس ، كان الفيسبوك رد تانى يوم زى ما بيحصل مع كل الناس

Maikel Nabil Sanad مايكل نبيل سند 16/09/2008, 03:26  

لاحظوا المرة الأولى بيتكلم على أنة ولد
" لكن متابع البلوج بتاعك "
متابع مش متابعة

تبقى بنت أزاى ؟

مستوى ذكائهم ضعيف جدا
مشكلة فعلا

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP