إبليس يهاجر من مصر - على باب سفارة كندا

>> 16 August 2008

القصيدة لشاعر العامية المصرية علي سلامة

لمحت ابليس و ف ايده استماره

بقول له على فين

قاللي بص ..يا هجره يا اعاره

يا عم زهقت كفرت

الاقيش معاك سيجاره

انا انتهيت خلاص

لا نافع وسواس ولا خناس

دي عالم مجرمين

عندكوا فائض ف الفساد

في كل البلاد

ومش محتاجين شياطين

مليش عيش ف البلد دي

بقالي سنين عاطل

و انتوا بتعرفوا تقلبوا الحق باطل

و تسلكوا القاتل

و تمشوا ف جنازة المقتول

ومفيش مشاكل

يا عم ده انا بقيت أوسوس بالمقلوب

و أقول للحرامي كفايه بقى توب

انت هاتعمل كل الذنوب لوحدك

و أنا ابليس

أشتغل واعظ ولا كمساري ف اتوبيس

يا عم ده انا زمان

كنت استنى حد ينسى يسمي

وهو بياكل لقمته

دلوقتي كل اكلكم ملوث

بصراحه

الواحد خايف على صحته

ده مفيش ضمير اساسا

عشان اموته

و كل واحد بمزاجه

خربانه ذمته

يا عم ده كل حاجه اتسرقت

وكده الاجيال الجديده

م الحراميه اتظلمت

يا راجل ده من كتر ما لطشت معايا

خرجت ف مظاهره

مع الناس اللي بتقول كفايه

و برضه مفيش فايده


0 comments:

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP