تقدر تساعد المدونين أزاى ؟

>> 26 July 2008


أنت دلوقتى دخلت مدونة و عجبتك .... قريت الحاجات المكتوبة فيها و أستفدت منها ... عايز ترد الجميل لصاحب المدونة .... أو عايز تقدملة مساعدة علشان يقدر يقدم حاجات متميزة أكتر .... تعمل أية ؟ .... بسيطة خالص .... أقولك أنا

1- سيب تعليق
التعليقات من أهم الحاجات اللى بتشجع المدونين .... بيبقى شعور ماصخ جدا لما الواحد مننا ينشر تدوينة و ميلاقيش حد علق عليها .... يعنى حاول تقول رأيك فى المكتوب ، سواء كنت متفق مع مضمون التدوينة أو لأ

2- أبعت اللينك لأصحابك
أنت ليك أصحاب كتير .... عندك أيميلاتهم كلهم ، و فية منهم ناس بتقعد ترغى معاهم على المسنجر .... و ممكن كمان تكون مشترك فى جروبات كتيرة من اللى مالية الياهوو و الجوجل و الفيسبوك ، دة طبعا غير المنتديات الألكترونية ... لو فية مدونة عجبتك ، خد عنوانها و أبعتة لكل أصحابك ، و لكل الجروبات و المنتديات اللى مشترك فيها .... ممكن برضة تدية لأصحابك اللى فى الكلية أو الشغل أو النادى أو الحزب أو الجمعية أو الكنيسة أو الجامع ... و بعد كدة ، لو المدون حط مقال جديد ، مفيش مانع تبعتلهم لينك المقال الجديد

3- دوس على الأعلانات
كتير من المدونين مابيقدروش يدوا للتدوين الوقت الكافى بسبب أنشغالهم فى شغلهم .... و كتير منهم بيتكلف علشان يجيب صور و فيديوهات ينشرها على مدونتة ، أو علشان يعمل تليفونات يجيب بيها معلومات مهمة .... نسبة كبيرة منهم بيبقى بيتمنى أنة يتفرغ للتدوين علشان ينتج أكتر .... علشان كدة المدونين بيتعاقدوا مع شركات أعلانات ، بحيث أن الشركة تحط أعلانات على المدونة ، و المدون بياخد مقابل مادى على كل واحد بيدخل على أعلان من المدونة بتاعتة .... يعنى أنت ممكن بعد ما تخلص قراية ، قبل ما تمشى روح دوس على أى أعلان .... عايز تقرا الصفحة اللى هاتتفتح أو ماتقراهاش ، مش مشكلة .... المهم أنك تستنى صفحة الأعلان تفتح كويس .... هى أينعم المبالغ اللى بتيجى من الأعلانات قليلة جدا و ماتكفيش حاجة ، بس يمكن مع الأعداد الكتيرة اللى بتدخل المدونة تعمل فرق

4- أعمل مدونة
ممكن تستغرب من النقطة دى .... بس أنا مش بضحك عليك ... أيوة أعمل مدونة .... ما هوا دلوقتى المدونين بيتعرضوا لمضايقات كتيرة ، و فيهم ناس بيتقبض عليهم و يتسجنوا بسبب التدوين .... لكن تخيل كدة لو مصر بيتكتب فيها 30 مليون مدونة .... ساعتها لو أتلمت كل أجهزة المخابرات اللى فى العالم ، برضة مستحيل حد يقدر يراقبهم كلهم .... و بالتالى أنت لما تعمل مدونة ، هاتكتر عدد المدونات ، و الموضوع هايبقى أوسع ، و أنت كدة بتقدملنا الحماية بطريقة غير مباشرة
ثم يعنى هو أنت صغير ؟ .... ممكن تتعلم أزاى تعمل مدونة من هنا .... أكتب و بعبر فيها عن مشاعرك .... قول أية اللى عاجبك و أية اللى مش عاجبك .... و لو خايف ماتكتبش أسمك .... و مش ضرورى تكتب بالفصحى و تقول كلام كبير .... أكتب بالعامية كأنك قاعد تحكى مع أصحابك .... و لو قفلت معاك خالص و مش عارف تكتب ولا كلمة ، أبقى حط شوية صور .... حتى لو حطيت صور الفنانين اللى بتحبهم ، كلة بينفع

5- حط لينك على مدونتك
لو أنت عملت مدونة ، أو لو أنت عندك مدونة .... ممكن تحط لينك للمدونة اللى عجبتك على مدونتك .... كمان ممكن تحط اللينك فى أكتر من مكان على المدونة .... و ممكن كمان تكتب تعليقات على مدونتك على المقالات اللى عاجباك على المدونة اللى عاجباك

6- أنضم للجروب بتاعة صاحب المدونة
كتير من المدونين بيعملوا جروبات تربطهم بأصحابهم و قرائهم و الناس القريبين منهم فى الفكر .... و دايما المدونين دول بيبقوا حاطين لينك للجروب بتاعتهم على مدونتهم .... أنضمامك للجروب دى بيخلى المدون سهل يوصلك ، و سهل أنة يوصل اللى عايز يقولة لأكبر طبقة ممكنة من الناس ، و دة أكيد بيسهل علية مهمتة

7- أنضم للقايمة البريدية بتاعة صاحب المدونة
المدونين اللى مش عاملين جروبات ، بيبقوا عاملين قايمة بريدية Mailing List .... أنت لو سجلت subscribe فى القايمة دى ، يبقى المقالات اللى هاينشرها المدون هاتوصلك أول ما تتنشر .... و دة طبعا بيساعد المدون أنة تكون فية قاعدة شعبية عريضة بتقرا اللى بيكتبة و بتوصلهم أفكارة

8- خلى المدونة صفحتك الرئيسة
لو بتاخد بالك ، أول ما تفتح الأنترنت أكسبلورر بتلاقية بيفتح أوتوماتيك على موقع معين Home Page .... أنت ممكن تغير عنوان الموقع دة بحيث أن الأكسبلورر يشغل المدونة اللى عاجباك بدل الموقع دة .... طريقة تغيير ال home Page بتتغير حسب نوع و أصدار المتصفح اللى أنت بتستخدمة .... لكن سعات بعض المدونات بتبقى حاطة زرار مكتوب علية Make me your home page ، فأنت تدوس على الزرار دة و كل شئ أنتهى .... أما بقى لو مكنش المدون حاطط اللينك دة ، يبقى تضطر تنخفس فى ال Options بتاعة المتصفح Explorer و تغير ال Home page

9- ضيف المدونة لمواقعك المفضلة
بكل بساطة هتلاقى عندك فى متصفح الأنترنت من فوق كلمة Favorites أو كلمة Bookmarks .... دوس عليها ( بس بشرط تكون جوا المدونة اللى أنت عايز تضيفها ) ... هاتظهرلك قايمة ، دوس على أختيار Add .... هتلاقية ضاف المدونة للقايمة الموجودة .... و دة معناة أن جهازك بقى فية وصلة Shortcut للمدونة دى ، ممكن تستخدمة فى أى وقت علشان ترجع للمدونة بسرعة

10- ترجم المقال للأنجليزى أو لأى لغة أجنبية تعرفها
فية مدونين بيحبوا ينشروا مقالاتهم بلغات أجنبية غير العربى ، لكن الترجمة للأسف بتاخد مجهود كبير ، و حتى المواقع اللى بتترجم زى موقع Google Translate بتطلع ترجمة وحشة أوى و الجمل مش بتبقى مفهومة .... فلو أنت بتجيد الأنجليزى أو الفرنساوى أو أى لغة أجنبية ، مفيش مانع أنك تترجم التدوينة اللى عاجباك ، و تبعتها للمدون اللى كتبها ، و هو هايبقى ينشرها و يكتب تحتها أن فلان الفلانى هو اللى ترجمها ، دة طبعا أذا مكنش عندك مانع

11- أرشد المدون لأخطاؤة
طبعا المدونين دول بشر ، و ساعات كتير أحنا و بندون بنغلط أخطاء أملائية ، و ساعات كتير برضة بنقول معلومة بنكون واخدينها من مصدر أحنا مش واخدين بالنا أنة غلط .... فلو أنت لاحظت أن المدون قال حاجة غلط ، مفيش مانع أنك تبعتلة أيميل أو تسيبلة تعليق تنبهة فية للحتة الغلط ... بس طبعا أعمل كدة بأسلوب لطيف علشان مايزعلش منك

12- أعلن عند المدون
فية مدونين بيسمحوا أنك تحط عندهم أعلان بمقابل مادى .... يعنى لو أنت عندك شركة أو جريدة أو منتدى أو أى مشروع أو موقع عايز تعلن عنة ، و كان عندك المقدرة الأقتصادية أنك تدفع تمن للأعلانات دى ، فممكن تبعت للمدون تتفق معاة بحيث أنة يحطلك الأعلان على مدونتة ، و كمان يشوف الطريقة اللى هيحاسبك بيها ... طبعا الطريقة دى مش هتناسب كل الناس ، يعنى اللى معاهم فلوس بس

دى الحاجات اللى فى ذهنى حاليا .... و ياريت لو فية حد من زمايلى المدونين يعرف طريقة تانية ممكن القراء يساعدوا بيها المدونين ، ياريت يكتبها فى التعليقات


13 comments:

Ismail,  26/07/2008, 13:46  

برافو يا مايكل

عمر الشرقاوى 27/07/2008, 09:20  

برافو يامايكل والله
بالمناسبه دى انا عجبنى المقال وهانشرو فى مجله للمدونين هاتنتشر عبر البريد العادى

Anonymous,  29/07/2008, 17:12  

شكرا يا مايكل لإيجابيتك
وممكن أتخيل لو فيه 30 مليون إيجابي زيك
أكيد مصر هتكون أحسن كتير
تحياتي
و
آمال

أسامة,  29/07/2008, 19:38  

موضوع أكتر من ممتاز يا مايكل
تصدق ان دي أول مرة أرد على أي مدونة ، لأني ماكنتش واخد بالي من الموضوع ده خالص
ربنا يكتر من أمثالك

Anonymous,  29/07/2008, 19:42  

مبرووك خروجك من الافكار العنصريه ودخولك للافكار الايجابيه البنائه منتظرين منك المزيد

Maikel Nabil Sanad مايكل نبيل سند 30/07/2008, 04:33  

شكرا للجميع على التعليقات الجميلة و المشجعة

أسامة
شرف كبير أنى أكون أول واحد تعلق عندة
أشكرك على الشرف دة

عمر الشرقاوى
ياريت تدينى فكرة عن الجريدة دى الأول

بالنسبة لآخر تعليق
بيقولوا الملافظ سعد
أفكار عنصرية أية يا عمى الحج ؟

تحياتى للجميع

Anonymous,  21/01/2009, 17:02  

شكرا لك يامايكل استفدت كثر من مقالك
مدونة جديدة

Anonymous,  30/09/2011, 20:44  

كويس يا وله

Anonymous,  08/10/2011, 01:20  

3ash (Y)

Olivia Mohsen 23/11/2011, 21:23  

المقالة رائعة جدا ،انا عندى مدونة صغيرة و حتى مش بكتب عليها كتير بس انا عملتها عشان اسجل عليها الحاجات المهمة اللى بتحصللى فى حياتى و كمان عشان اكتب اللى بحس بيه زى ما انت قلت ، هاستناك لما تخرج قريب عشان تقولى رأيك فيها

Olivia Mohsen 23/11/2011, 21:44  

على فكره انا عامله bookmark للمدونة بتاعتك وهيبقى ليا الشرف انى احط اللينك بتاع مدونتك عندى

akram nabil 30/12/2011, 22:09  

استمر يا ولداه ورع يفك سجنك

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP