فية ناس تستحق الظلم

>> 21 July 2008


فى أنتخابات المحليات اللى فاتت حصلت حادثة فى محافظة قنا لكن للأسف الأعلام مأخدش بالة منها .... اللى حصل أن فى أحد المراكز كان فية مرشح مسيحى معين و كانت الحكومة عايزة تسقط العضو دة ..... فاللى حصل أنهم فى الدايرة دى منعوا المسيحيين أنهم يصوتوا فى اللجان و سمحوا فى نفس الوقت للمسلمين أنهم يدخلوا و يصوتوا عادى .... المسيحيين فى الدايرة دى كانوا ساعتها متضايقين جدا و بعضهم بكى بالدموع يومها من كتر القهر و الذل و الأستعباد .... بعض النشطين فى الحزب المصرى الليبرالى سمعوا بالقصة ، فأتصلوا بيهم و أعلنوا تضامنهم معاهم ضد التمييز الدينى الحكومى ، و كنوع من الدعم لقضيتهم أقترح الحزب أنة يعمل مؤتمر يحكى فية الناس دول عن اللى حصل معاهم علشان الناس كلها تعرف و يشوفوا حل فى الموقف دة .... المهم الناس المظلومين لما عرفوا كدة أنبسطوا خالص و وافقوا على حكاية المؤتمر و كانوا قربوا يطيروا من الفرحة .... و على الرغم من أن الحزب تحت التأسيس و بيعانى من نقص شديد فى الأمكانيات المادية و البشرية لكنة ضغط على نفسة و أجر قاعة و حضر للمؤتمر و دعى الصحفيين و عمل كل اللى يقدر علية علشان يساعد الناس دى .... الى فوجئنا بية يوم المؤتمر بقى أن الأمن لما عرف بموضوع المؤتمر راح ظبط الناس دى و راضاهم و أتفق معاهم أنة يخرب المؤتمر .... جم البهوات المؤتمر و هما جايبين معاهم مجموعة من أصدقائهم المسلمين و قعدوا يقولوا كلام عبيط عن الوحدة الوطنية و أن مفيش تمييز دينى فى مصر و أنة محصلهمش حاجة و كلة تمام ياريس .... طبعا كان الموقف فية أحراج كبير للحزب اللى فية ناس كتير دفعت من جيبها علشان تعمل المؤتمر دة ، دة غير المنظر قدام الصحفيين و الحضور .... و هنا السؤال اللى بيطرح النفسة : الناس دى اللى بتتواطئ مع الفساد و بتبيع نفسها للى يدفع أكتر و بتغدر باللى وقف معاها فى زنقتها ، مش يستاهلوا الأضطهاد اللى بيحصلهم ؟ مش يستاهلوا أن النظام يغدر بيهم و يمنعهم من حقهم فى التصويت ؟ .... هل هما كانوا بيشتكوا و يصرخوا لأنهم شاعرين بالظلم فعلا ؟ ولا دة كان أبتزاز للنظام علشان يشتريهم و يراضيهم ؟ .... هل لو أتعرضوا لظلم بعد كدة ، ممكن حد يرضى يقف معاهم ؟

موقف تانى حصل من فترة قصيرة .... أنا كنت دخلت فى شراكة معينة مع مجموعة من الناس من حوالى 6 شهور .... و من أول أسبوع و أنا شايف أن فية حاجات مش مظبوطة .... يعنى فية حاجات كتيرة بتنقص ، أو بمعنى أدق بتتسرق .... دورت كتير على السبب لكنى ماوصلتش لأى نتيجة .... حاولت أتكلم مع بقية الشركاء ، لكن معظمهم مكنش مهتم بالموضوع أساسا ، و بالتالى كنت أنا لوحدى المهتم بالموضوع ، و مع الزمن زهقت و سكت .... حاجة تانية كنت بعانى منها هى أن فية شريك معين كان مقصر فى ألتزام معين المفروض أنة ينفذة ناحية بقية الأعضاء ، و الألتزام دة حق للأعضاء ، يعنى عدم الألتزام بية يعتبر أعتداء على حقوق الأعضاء أو بمعنى أدق سرقة لحقوقهم .... المهم فوجئت بالعضو دة جاى فى يوم من الباب للطاق و راح مزعق فيا و قل أدبة و أتبلى علىّ بأنى بسرقهم ( من غير ما يقدم أى دليل ) ، و لما دافعت عن نفسى أتهمنى بالكدب .... المهم أنا مارضيتش أرد علية و قعدت أحاول أهدى فية علشان نقعد سوا نشوف المشكلة فين ، و دة كل مايشوفنى بهدية فى الكلام يعلى فى صوتة أكتر و يقل فى أدبة أكتر .... آخرة ما قرفت منة قلتلة تغور الشركة دى ولا تلزمنى ، و أنا أكبر من أنى أدخل فى شراكة عبيطة تخلى واحد زيك يقل أدبة عليا .... مفيش دقيقتين بعد الموقف دة و وقع فى أيدى دليل أن الشخص دة هو اللى كان بيسرق الحاجات اللى بتنقص من أول أسبوع فى الشركة.... يعنى هو لية 6 شهور بيسرق و كمان مش بيقوم بألتزاماتة ناحية بقية الأعضاء ، و بعدين جاى يتبلى على شخص برئ و يتهمة بالسرقة ، و لما يدافع عن نفسة يتهمة بالكذب ، شفتوا وقاحة أكتر من كدة ؟
المهم ، معانا فى الشركة شخص متدين و لما سمع باللى حصل حب يصالحنا على بعض ، فراح جايب الولد دة عندى فى البيت و قال نتصالح ، طيب ياسيدى أنا معنديش مانع نتصالح بس علشان يحصل صلح ضرورى كل واحد يعرف غلطة علشان ميكررهوش .... أفاجئ بأن أخينا يزعق فى بيتى و يقول أنة مغلطش و يكرر كلامة اللى هو مفبركة و يقول أنى أنا الحرامى ، طيب هات دليل يا عم الحج ، مفيش دليل .... طيب أزاى عايزنى أتصالح معاك و أنت لسة بتقول على الحرامى بينما فى الحقيقة و الثابت أنك أنت الحرامى ؟ .... صلح أية دة اللى يتبنى على أنى مجرم و أنت ملاك ؟ .... و اللى يغيظ بقى أن الشخص المتدين زعل منى علشان مقبلتش الصلح ، بقى تطلعونى حرامى و عايزينى أتصالح ؟ .... المهم بعد كدة كل ما أقابل واحد من الشركاء ألاقى صاحبنا ماتوصاش و قالهم شوية كذب عنى و ألاقيهم واخدين صورة وحشة جدا عنى و حاسيين أنى أعتديت على حقوقهم ، يعنى هو ماكتفاش باللى سرقة ، و ماكتفاش بأتهامى ظلم من خلال أدعائات من وحى خيالة ، و ماكتفاش بقلة أدبة ، و ماكتفاش بأنة طفشنى من الشركة ، لأ دة كمان بيطلع على أشاعات و بيسئ لسمعتى
اللى بسألة لنفسى : شخص زى دة أعملة أية ؟ .... يعنى لو هو عمل الكلام دة مع شخص مسئول ولا ظابط شرطة كانوا زمانهم طلعوا عينة .... لكن أنا علشان مواطن بسيط مقدرش أردلة اللى عملة معايا .... بس السؤال : العينة دى من الناس ، لو واحد ظلمة فى أى موقف فى حياتة ، مش يبقى يستحق اللى جرالة ؟ مش يبقى ساعتها دة العدل و العقاب على الظلم اللى ظلم بية غيرة ؟ .... لو حصللة حاجة فى قسم شرطة ولا فى أى حتة و جة أستنجد بيا ، هل لو رفضت أساعدة أبقى غلطان ؟

كل شعب يستحق حكامة .... العيب مش فى حكامنا .... أحنا اللى بنفسد حكامنا .... أحنا اللى بسلبيتنا السياسية سيبنالهم الجمل بما حمل و رضينا أننا نكون خدامين تحت رجليهم .... أحنا اللى نصنا بيغش فى الأمتحانات و بيسلك أمورة فى كل مصلحة و لما بيتزنق فى أى موقف بيتصل بالواسطة بتاعتة .... حكامنا مش جايين من المريخ ، دول عينة من شعب بقى الفساد منهج فى حياتة ، بس الفرق أن فية حرامى كبير و حرامى صغير .... أحنا اللى بنهتفلهم بالروح و الدم ... أحنا اللى بننفخ فيهم و نعمل منهم آلهة ... و بعد كدة نزعل أنهم بيستعبدونا ؟ .... طيب ما أحنا اللى رفعناهم أسياد فى رؤوسنا ، بنزعل لية لما يمسحوا جزمهم فينا ؟ .... أحنا اللى لغينا عقولنا لصالح رجال الدين ، و بقينا بننفذ اللى بيقولوة من غير ما نفكر فية ، يبقى نزعل لية لما يستغفلونا و يستعبطونا و يكدبوا علينا و يقولولنا كلام مالهوش أى جانب من الصحة علشان يزودوا الفلوس اللى بتدخل جيوبهم و يحافظوا على علاقاتهم بالنظام الفاسد ؟ .... لما هو البابا فى كل أنتخابات بيحشد الناس لصالح مبارك و مرشحى الحزب الوطنى ، و المسيحيين فرحانين بالبابا العالم اللى محصلش قبل كدة ، زعلانيين لية من اللى بيحصلهم فى عهد مبارك ؟ و عايزينا أزاى أننا ندافع عنهم من ظلم الشخص اللى هما فرضوة علينا بأصواتهم الأنتخابية ؟

ياما ناس فيكى يا مصر مضطهدة .... ياما ناس فيكى يا مصر مظلومة .... لكن للأسف ، نسبة كبيرة منهم يستاهلوا كل اللى بيحصل فيهم

6 comments:

Anonymous,  21/07/2008, 09:12  

يامايكل

اتفق معاك والمضهد فى مصر ينطبق عليه مثل " اًكلت بيوم اًُكل الثور الابيض " .. وعدم التفاف الناس لمواجهة الظلم إلاعندما ينالهم شخصياً هو أكبر دغم للظلم والظالم ، ولكنى اقول لك أن هذه قاعدة عامة فى مصر وقانون شرير سلبى ينطبق على كل المواطنين فى مصر وليس المسيحين فقط
تحياتى
محمد منير

أسوور 24/07/2008, 21:26  

جريدة الأسرة العربية
قرر رئيس مجلس ادارة الجريدة مشكورا أن يتبنى كل ما يكتبه المدونون
وان يفرد مساحة لا بأس بها لبوستات البلوجرز
كما وافق على نشر البوستات المرشحة بتوقيع كتابها
وسوف يفتح باب التدريب الصحفى لهواة الصحافة من المدونين
وذلك ايمانا منه بقوة التدوين وبأنها صوت المصريين
***
على كل مدون يرغب فى نشر مقالات - تحقيقات - قصص - نقد - ادب - شعر - سياسة او أى كتابات لم يرد ذكرها
ان يرسل البوست المرشح مذيل بتوقيعه وعنوان المدونة والإسم الحركى ان اراد
مرفق بصورة شخصية له
على الإيميل التالى

amyasser@hotmail.com

أو بتعليق على هذا البوست نفسه
يترك لينك البوست اللى عايز ينشره الجرنال له
تحت عنوان جريدة الأسرة العربية
الشـــــــــــــــــروط
-مراعاة الصحة اللغوية والنحوي والإملائية قدر الإمكان.
-مراعاة الا يزيد البوست المراد نشره فى الجريدة عن صفحة ايه فور.
- أولوية النشر تكون للبوستات التى فيها موضوعات عامة تهم قراء الصحف.
-اولوية النشر للبوستات التى ترسل على الميل المذكور أعلاه كفايل وورد مرفق.
الجريدة تصدر الإثنين من كل أسبوع

usamaalrody اسامة الرودى 26/07/2008, 09:34  

المسيحى والمسلم هم فى الهم سواء ان كان هناك اضطهاد او تمييز او سرقة او ظلم او محسوبية فكلنا سوف نغرق معا مثلما غرق شبابنا معا على سواحل ليبيا وايطاليا وهم يحاولون ان ينجو بعيدا عن حكم الفرد والطغيان ولم يفرق بينهم الموت ولم تفرق اسماك القرش بينهم اسامة الرودى ابن الاسماعيلية

Maikel Nabil Sanad مايكل نبيل سند 26/07/2008, 11:31  

أسوور
رجاء لا تنشروا أى شئ لى دون الرجوع لى ، أحتراما لحقوق الملكية الفكرية

أسامة الرودى
أكيد طبعا مفيش فرق بين المسيحيين و المسلمين فى مصر .... البنية الثقافية و المجتمعية واحدة ، فطبيعى أن تصرفاتهم تبقى متقاربة مع أختلاف شكلى بسيط

تحياتى

أسامة,  29/07/2008, 19:56  

والله يا مايكل الموضوع يحير
في القصة الأولى الناس طبعا غلطانة 100% ، لكن الخوف بيعمل كتير
ممكن في لحظة غضب نقول انهم يستاهلوا أي حاجة تحصل لهم ، لكن لو شفت واحد منهم اتمسك وحصل فيه اللي عارفينه أكيد ساعتها هانغير رأينا
نفس الكلام في القصة التانية
انت أكيد كرهت الراجل ده عشان نصاب وكداب ، لكن أكيد لو عرفت انه راح معتقل مثلا واتعذب هاتغير رأيك ، لأن مافيش جريمة في الدنيا تستحق التعذيب الرهيب اللي بتمارسه أجهزة الأمن عندنا

Maikel Nabil Sanad مايكل نبيل سند 30/07/2008, 04:44  

عزيزى أسامة
فى البداية أشكرك على أيجابيتك و أهتمامك بالتعليق

طبعا كلام صح ، بس مش هيا دى النقطة اللى عايز أقولها

اللى عايز أقولة فى الموقف الأول أنى أذا ما وقفتش مع الناس دول تانى ، أكيد هبقى معذور و محدش هيلومنى على كدة ، لأننا لما ساعدناهم قبل كدة غدروا بينا ، و أنت عارف أن العاقل مايقعش فى نفس الحفرة مرتين

و بالنسبة للموقف التانى ، لو ظابط عذب الشخص دة ، فأنا هعذر الظابط ... أيوة اللى بيعملة الظابط غلط ، بس الشعور بالظلم وحش ، و لما الأنسان بيحس بالظلم بينسى كل القوانين و المبادئ و الأخلاقيات

اللى عايز أوصلة أن فية ناس هى اللى بتظلم نفسها ، و أنها باللى بتعملة بتحرم نفسها من أحقيتها فى العدالة

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP