الكيبورد أقوى من المدفع

>> 25 April 2008


أطرف موقف ممكن تسمعة عن الأضراب
من كام يوم كنت بحكى فى التليفون مع واحد صاحبى فى كلية حقوق ، و جبنا سيرة العصيان المدنى بتاع 6 أبريل .... فقاللى أن القانون المصرى بيعتبر العصيان المدنى جريمة عقوبتها من 5 - 10 سنين سجن غير الغرامة المادية ( أنا معرفش مدى صحة المعلومة دى) .... المهم أنا جاتلى فكرة ، قلت لية مانشرش نص القانون دة على مدونتى ؟ و أهة يبقى سبق صحفى ، لأن مفيش حد من المدونين اللى كتبوا عن الأضراب فكر ينشر القانون دة .... بس ، فرحت طلبت من صاحبى دة أنة يجيبلى نسخة من القانون دة من مكتبة الكلية
تانى يوم الصبح راح صاحبى الكلية ، و دخل المكتبة و قعد يدور على كتب بتتكلم عن العصيان المدنى .... لكن المفاجأة أن كل الكتب اللى بتتكلم عن العصيان المدنى أختفت ( فص ملح و داب ) .... قعد فترة كبيرة يدور ، و لما تعب خالص راح سأل أمين المكتبة .... تتخيلوا قاللة أية ؟؟ .... قاللة أن فية ظابط جة الصبح بدرى و لم كل الكتب اللى بتتكلم عن العصيان المدنى و خدها معاة
طبعا أنا سمعت الموقف دة و وقعت على الأرض من الضحك .... بقى هما خايفين للدرجة دى ؟؟؟ .... أنا مش متخيل أية اللى يخلى ظابط محترم يسيب مكتبة النضيف ، و يطلع من التكيف ، و يهز طولة و يوصل لحد الجامعة ، و يطلع السلالم ، و كل دة علشان يلم شوية ورق أصفر محدش قراهم من عشرات السنين ؟؟
من كام يوم كنت كتبت تعليق على أحد المواقع ، قلت فية أن الصراع بيننا و بين النظام صراع غير متكافئ ، لأن النظام معاة البنادق و الرشاشات ، و أحنا ماعناش غير الأقلام و الكلام و الكيبورد .... لكن فى الموقف دة شفنا اللى معاة الرصاص و المدافع خايف من اللى معاة القلم ، و رايح يلم الورق و الكلام علشان محدش يقراهم .... أكتشفت أنة فعلا الصراع غير متكافئ ، بس يبدو أن القلم أقوى بكتير أوى من الجنازير و البلطجية المأجورين
صحيح أنا مش مشارك فى الأضرابات دى ، لكن فى الموقف دة فية رسالة ضرورى توصل للمدونين .... أوعوا تفتكروا أننا زوبعة فى فنجان .... أوعوا تفتكروا أن اللى بنعملة مالهوش فايدة .... أوعوا تفتكروا أننا بنكلم نفسنا .... أوعوا تفتكروا أن كلامنا مالهوش قيمة .... أوعوا تفتكروا أننا مش بنساهم فى التغيير .... المواقف بتثبت أن كل كلمة بتتكتب على الكيبورد بتزق مصر خطوة لقدام .... كل خط بينقش على الورق بيفتح لمصر صفحة جديدة مكان الصفحات القديمة الوسخة .... أكتبوا .... أكتبوا .... الأنسان ممكن يتحبس ، ممكن يتقتل ، ممكن يتقطع لسانة .... لكن الكلام محدش يقدر يقتلة

7 comments:

شوقى رجب 25/04/2008, 04:00  

نعم الكيوبرد اقوى فعلا
سلمت يداك

محمود سعيد 25/04/2008, 04:24  

لا أظن هذا الكلام صحيح

فقانونى بقامة المستشار طارق البشرى كتب كتاباً باسم
أدعوكم إلى العصيان

يدعوا فيه إلى العصيان المدنى
والموضوع أصلاً مش بالسهولة ديه

لأنه حتى وإن صح
فكيف تثبت النيابة لقاضى المحكمة
أن المتهم عاصى
:-)

مينا زكري 25/04/2008, 06:20  

مسخراااا
شالوا الكتب فعلا؟

Maikel Nabil Sanad مايكل نبيل سند 25/04/2008, 14:59  

أمال أنا بهزر يامينا ؟

محمود سعيد
طبعا مفيش دليل يثبت ان الفرد عاصى .... يعنى كل واحد ممكن يقول أنة كان عيان ، المنبة مارنش ، أى كلام عبيط يعنى
بس التهمة هاتبقى ثابتة على اللى دعوا للأضراب

Anonymous,  17/07/2008, 07:03  

النظام بيهرعلي روحه
نظام الحكم الشجاع يعطي كل الحقوق للمواطن لانه مش خايف منه ولانه هوا ممثل عنه
لكن في العروبة والاسلام في ناس تتحط علي كرسي الحكم دون صلاحية او حق
وكمان يقولوا ان الديموقراطية كفر

بالذمة ايه الفرق بينهم وبين الاستعمار ؟

Maikel Nabil Sanad مايكل نبيل سند 17/07/2008, 16:10  

أزاى الكلام دة يا عم أنت ؟

أكيد طبعا فية فرق بينهم و بين الأستعمار

المستعمر دة راجل غريب جاى يسرقك عينى عينك ، لكن دول أخواتنا مصريين زيينا بيطعنونا فى ضهرنا

الأستعمار عدو ظاهر لكل الناس
لكن دول عدو غير ظاهر ، مش كل الناس بتاخد بالها منة

الأستعمار أرحم يا عم
فين أيام الأستعمار ؟

Anonymous,  10/06/2010, 04:22  

كلامك منطقي و رائع يامايكل ..

الكيبورد فعلا بقي اقوي من المدافع و عصيان عساكر الامن المركزي اللي بتعزق المعتصمين و المتظاهرين عزق
و البلد اصبح فيها حالة حراك سياسي اكتر من اي وقت فات بين الشباب و السبب في كل ده اننا بقينا بنشوف ونقرا كل حاجة بصورتها الحقيقية مش زي زمان كنا بنسمعها زي ما بيقولها صفوت الشريف ..واذا كانت الشرارة انطلقت في 2008 ف انا متهيالي ان ترمومتر الشارع المصري اصبح الان في حالة الغليان اللي يعقبها مرحلة الانفجار في وش الحزب الوطني و الحكومه بتاعته  

كل اللي احنا محتاجينه هو توعية سياسة لتعويض سنين الجهل اللي الشباب كان عايش فيها علشان يعرف ايه اللي ليه و ايه اللي عليه ..صدقني في شباب كتيير نفسه يتحرك بس للاسف مش عارف ..واذا اتحرك بيخاف للاسف

Keep Up the good work !!

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP