ثلاث فضائح للأخوان فى 3 أسابيع فقط

>> 15 April 2008


كلامنا النهاردة عن الأخوان .... الجماعة المحظورة .... اللى قتلت النقراشى باشا سنة 1948 .... و اللى حاولت تقتل جمل عبد الناصر فى حادثة المنشية الشهيرة .... الجماعة اللى عندها 10 آلاف مقاتل جاهزين علشان تبعتهم لبنان .... الجماعة اللى رئيسها مهدى عاكف الأرهابى اللى كان مشارك فى التدبير لحادثة المنشية .... الجماعة اللى عاملة نفسها شهيدة الحرية .... اللى طول النهار تتكلم عن الديموقراطية .... اللى بتدعى أنها معارضة حقيقية هدفها مصالح الشعب المصرى ... اللى بتدعى أن أفكارها هى الحل لكل مشاكلنا .... لكن خلاص : كل شئ أنكشف و بان .... 3 فضايح للأخوان فى 3 أسابيع بس .... يعنى فضيحة كل أسبوع .... فضايح كتير ليهم قبل كدة مكتبتش عنها ، لكن لما يبقوا 3 فضايح فى فترة صغيرة زى دى ، يبقى ضرورى أكتب

الفضيحة الأولى : تخازلهم عن مساندة أساتذة الجامعات فى أضرابهم فى 23 مارس 2008
الموضوع و بكل بساطة أن أساتذة الجامعة زيهم زى غيرهم فى البلد دى عندهم مشاكل ياما ... و برضة زيهم زى غيرهم بيتكلموا و بينادوا فى وادى و النظام المصرى ولا هنا ولا هناك .... أتكلموا بالذوق كتير ، لكن مالقيوش غير ودن من طين و ودن من عجين ... حبوا يوصلوا صوتهم بطريقة قوية .... حبوا يقولوا " لأ " .... و زى ما هو متوقع النظام المصرى أبتدى يقاوم الأضراب من قبل أنعقادة .... ييجوا بقى الأخوان يقفوا فى أنهى جانب ؟؟؟؟ .... فى جانب الحكومة طبعا .... أيوة ، أمال أنت فاكر أية ؟ الأساتذة الأعضاء فى الجماعة المحظورة مايهمهش مشاكل أعضاء هيئة التدريس .... مايهمهاش أعضائها المرميين فى السجون و المعتقلات .... مايهمهاش أنها تقول رأيها فى أزمة موجودة على الساحة السياسية على الرغم من أنها بتدعى أنها أكبر تيار معارضة فى مصر .... كل اللى يهمها هو زواج المتعة اللى بينها و بين النظام .... كل اللى يهمها أنها تزايد على المعارضة فى بعض المواقف علشان تضغط على النظام و تقسم معاة التركة ... ألف مبروك عليهم خيانتهم للشعب و لأعضائهم المعتقلين

الفضيحة التانية : عدم مشاركتهم فى أضراب 6 أبريل 2008
مبدئيا و قبل ما حد ييجى يزايد ، أنا مشاركتش فى الأضراب .... مشاركتش لية ؟ ... لأنى شايف أن أرتفاع الأسعار سببة وجود نقص فى الأنتاج ، و الموضوع مش من الحكومة زى ما المعارضة بتقول .... و بالتالى الأضراب مش هايحل حاجة ... بالعكس لو فية سلعة أنت شايفها غالية بسبب الحكومة ، و هى كانت غالية بسبب قلة الأنتاج ، و بعد كدة أنت أضربت عنها ، هاتكون النتيجة أن اللى صنعها هايخسر ، و لو خسر مش هاينتجها تانى ، و بالتالى الأنتاج هايقل أكتر و السلعة هاتغلى أكتر .... هو الموضوع عايز شوية فهم فى الأقتصاد ، و ماينفعش يتآخد بالعواطف ، و ممكن نبقى نحكى فى التفاصيل بعدين
المهم نرجع للموضوع .... شوية شباب طلعوا بفكرة و قالوا أنهم هايعملوا أضراب عن العمل و عن الشراء يوم 6 أبريل .... حركة كفاية أنضمت للأضراب ، و بعدها حزب الغد الليبرالى و حزب الجبهة الديموقراطية ( ليبرالى برضة ) .... طيب الأخوان رأيهم أية السبب فى أرتفاع الأسعار ؟ .... يقولولك الحكومة علطول .... كل المشاكل سببها النظام .... يعنى أنتم متفقين فكريا مع اللى نظموا الأضراب ، ماتشتركوا فية ؟ .... يقولك : لا طبعا ، لحسن جوزى ( الحزب الوطنى ) يطلقنى ، و هو كتر خيرة اللى عطانى 88 كرسى فى عشة البرلمان ، و هو اللى عاطينى النقابات و الجامعة ، و هو اللى سايبنى أشتغل فى الشارع رغم أنى محظورة .... و لتانى مرة فى خلال كام يوم تخذل الجماعة الشعب المصرى .... لو كانت مختلفة مع الأضراب فى الرأى ، كنا قلنا حقهم .... لكن دة ليهم نفس الرأى و نفس التحليل الأقتصادى ، يبقى ماشاركوش لية ؟ .... قال أية محدش دعانا ، طيب هو أنت محتاج دعوة ؟ يعنى هو الشباب بتاع الفيسبوك كان حد دعاة ؟ ثم مش أنت عامل نفسك بتمثل الشارع و كل شوية بتتكلم بأسم الأغلبية اللى معرفش مين عطالكم الصلاحية أنكم تتكلموا بأسمها ، طيب لما أنت بتمثل الأغلبية ، هل مستنى دعوة تجيلك من الأقلية ؟ ..... ماتتعبش نفسك و تفكر فى أجابة على الأسئلة دى .... فية دعوات رسمية كتير راحت للجماعة تدعوهم للمشاركة فى الأضراب ، و برضة ماشاركوش .... لية ؟؟؟؟ مش عايزة نباهة

الفضيحة التالتة : أحتلالهم لنقابة الصحفيين علشان يمنعوا مؤتمر مصريون ضد التمييز الدينى 11 أبريل 2008









مجموعة مصريون ضد التمييز الدينى أسسها من حوالى سنتين البشمهندس محمد منير مجاهد نائب رئيس هيئة المحطات النووية المصرية .... أبتدت فى الأول من خلال بيان بأسم " مسلمون ضد التمييز الدينى " مضى علية بشمهندس منير مع مجموعة من المثقفين المسلمين بيرفضوا فية التمييز الدينى الموجود فى مصر ضد الأقليات الدينية الموجودة فى مصر ، و ضد المسلمين اللى بيعبروا عن آرائهم بحرية .... بعد كدة قالوا مش معقول نبقى ضد التمييز الدينى ، و أحنا كلنا مسلمين ، فأبتدوا يدخوا معاهم المصريين اللى بيعتنقوا أى دين تانى
اللى حصل أن المجموعة حضرت نفسها علشان تنظم مؤتمر ينشر الوعى بقضية التمييز الدينى فى مصر ، و علشان كدة حجزوا قاعة نقابة الصحفيين .... الحجز تم رسميا فى نقابة الصحفيين و تم دفع الرسوم ، و تمت مراسلات بين مدير المجموعة ( م. منير مجاهد ) و بين نقيب الصحفيين ( أ. مكرم أحمد ) للتأكيد على الحجز ، و كان النقيب بيأكد على أنعقاد المؤتمر و على حضورة فى أول أيام المؤتمر و إلقاءة كلمة فى أول جلسات المؤتمر
أول أيام المؤتمر كان الجمعة اللى فات 11 أبريل 2008 .... الناس رايحة بعد صلاة الجمعة علشان يبدأوا المؤتمر ، لقيوا سبعة من أعضاء جماعة الأخوان المسلمين بايتين من ليلتها فى النقابة و قافلين النقابة من جوة ، و ماسكين عصيان و شوم ، و رفضوا يفتحوا النقابة لأى حد و كأن النقابة دى بتاعة أبوهم !!! .... جة نقيب الصحفيين فى معادة علشان يقول الكلمة بتاعتة ، لقى النقابة مقفولة دون علمة .... دخلهم يتكلم معهم ، راحوا ضربوة .... ضربوا النقيب !!!
و دى كانت تالت فضيحة للأخوان .... لأنهم هنا كشفوا عن الطريقة اللى بيعبروا بيها عن رأيهم : الشوم و العصى .... كشفوا الطريقة اللى بيتعاملوا بيها مع القيادات الشرعية المنتحبة : ضرب النقيب .... كشفوا مدى أحترامهم للديموقرطية لما نسيوا أن النقابة ليها نقيب منتخب و ليها مجلس نقابة و ليها جمعية عمومية ، و فيها طرق كتيرة سلمية للتعبير عن الرأى ، لكن تعمل أية ؟ الأرهابى هايفضل طول عمرة أرهابى ، و ديل الكلب عمرة مايتعدل و لو علقوا فية قالب .... كشفوا أحترامهم للتعددية الفكرية لما هما نفسهم بيستأجروا قاعة النقابة علشان يعملوا فيها مؤتمراتهم ، و فى نفس الوقت بيرفضوا أن أى حد تانى يعمل مؤتمرة فى النقابة .... كشفوا عن التسامح اللى عندهم مع الأديان التانية : الشوم و العصى و الطرد من النقابة
كشفوا عن طريقة تعاملهم مع ملف التمييز الدينى فى مصر ، لما حولوا الموضوع من موضوع حقوق أنسان لقضية سياسية ، و أدعووا كذبا و زورا أن المؤتمر يدعو للبهائية و أنة بيشارك فية أقباط المهجر و أنة بيغطية التليفزيون الأسرائيلى .... أنا شخصيا عضو فى المجموعة من أكتر من سنة و عارف معظم أعضاء المجموعة شخصيا ، و أجزم بأن الكلام دة كلة كذب فى كذب ، و الكدابين دول مقدموش ولا دليل واحد على صدق أدعائاتهم .... مصريون ضد التمييز طول عمرها بتهتم بالبشر و حقوقهم و عمرها ما أهتمت أنها تدعى لدين أو لآخر ، و المؤتمر دة منظماة المجموعة فى مصر و ما أشتركش فى التحضير لية أى حد من أقباط المهجر ، أما بقى قصة التليفزيون الأسرائيلى فلية ماصوروش المزيعين الأسرائيليين و هما داخلين ؟ ولا هما مش صحفيين برضة ؟
كشفوا فية الأخوان برضة عن كذبهم و تضليلهم بخصوص مؤتمرات أقباط المهجر .... يعنى كل ما ينعقد مؤتمر برا مصر ، يقعدوا جنب الحكومة ، و هما الأتنين يقعدوا يقولوا سوا أنهم بيرفضوا التدخل الخارجى فى شئون مصر ، و بيرفضوا أى حلول من الخارج .... طيب أهة الحلول جت من الداخل ، و مش من الداخل بس ، لأ دى من مجموعة مؤسسها و رئيسها مسلم متدين و مشترك فيها باحثين أسلاميين كتير ، لية بقى معترضين ؟ .... ولا هى العنصرية و محاولة تهميش الآخر اللى هاتوصلكم للحكم ، و علشان كدة بتتمسكوا بيها ؟

عموما فى النهاية أحب أقول أن الإمام حسن البنا مغلطش لما قال على الأخوان : " ليسوا أخوانا ، و ليسوا مسلمين " .... لأنهم لو كانوا مسلمين كانوا أتشبهوا برسول الأسلام اللى كان بيلقب بالصادق الأمين ، لكن الأخوان كداااااااااااااااابين

لقراءة تفاصيل أكثر عن سلبية الأخوان فى الأضرابات - راجع الروابط التالية 1 2 3
لمشاهدة تقرير كامل عن ما فعلة الأخوان فى المؤتمر من أعداد موقع الأقباط متحدون 1 2

6 comments:

bluestone 16/04/2008, 11:28  

بصراحة انا مش عارفة ان كانوا الاخوان ولا لأ.. انا كنت من حضور المؤتمر في اليومين الاول والتاني
لكن محضرتش واقعة النقابة لاني رحت على مقر الحزب على طول بعد تلقي اتصال هاتفي من احد الاعضاء
بعض الناس قال انهم اخوان وآخرون قالوا بلطجية وفيه ناس قالوا انهم من الامن .. اسوأ واحقر ما في الموضوع الاتهامات الباطلة .. يعني واحد يقول مؤتمر البهائيين .. وده مش صحيح مكانش المؤتمر هدفه البهائيين ولا متنظم عشانهم ..كان فيه عدد من البهائيين لكن المؤتمر كله مكانش عشانهم

ولا كان عن اقباط المهجر كل المصريين اللي فيه عايشين في مصر مسلمين ومسيحيين واللي جم ضيوف من الخارج كان عددهم قليل جدا يتعد على اصابع اليد الواحدة واغلبهم مسلمين من اطباء عايشين في الخارج ومشاركين في المجموعة

كمان التغطية الصحفية كانت قذرة جدا وخصوصا الهبل اللي كتبه الطرابيلي

Anonymous,  30/04/2008, 11:05  

جميل ما يعبر عنه المصريون. الشعب المصري يعني كل الوان الطيف الأجتماعب والأثني.
المشكلة تبدأ من التفرقة ومن الكذبة الأولى. الذي يكذب هو الأناني لأنه ضعيف ولأنه يبتغي المنافسة بطريقة غير سوية او شريفة.
حين اطلع على ما يكتبه احرار مصر اتفاءل بالقادم الجميل. وفي الوقت نفسه أرثي للأنانيين الذين ضيعوا عمرهم ويطمحون لضياع الآخرين. لتبقى مصر ام طرحه اوكلابيه ..
سلام لك يا بن رع ولكل المصريين الذين يحملون لقب مصري بجدارة وليس خداعا.
صباح محسن جاسم
أديب/ العراق
sabah1iraq@yahoo.com

Maikel Nabil Sanad مايكل نبيل سند 30/04/2008, 12:38  

شكرا يا أستاذ صباح على كلماتك الرقيقة
و تحياتى لحضرتك و لكل المثقفين العراقيين اللى من ساعة سقوط الطاغية و هما رجعوا يشتغلوا بقوة لصالح العراق

Jean 17/04/2010, 01:28  

يا مايكل أنا مصرية مسلمة و أؤيدك فى كل ما تقوله عن الإخوان المجرمين .. و إسمحلى أضيف لكلامك موقف حصل فى كليتنا كلية الأداب جامعة الزقازيق .. و معروف إن الشرقية تحديدا معقل مهم من معاقل الإخوان الأقذار ... كانوا فى يوم عاملين مهرجان كده و حفلة لهم مش فاكرة إيه مناسبتها لإنهم مهرجاناتهم كتير .. المهم طلعوا على شباك حمام البنات فى الكلية عشان يعلقوا لوحة قماش من لوحاتهم و البنات و هما سورى فى اللفظ أو لامؤاخذة بالمصرى قاعدين على ال..... لقت البنت ولد واقف وراها على الشباك بيعلق لوحة و كانت النتيجة إن البنات دخلوا فى ساحة الحمام (فى مكان الأحواض) عريانين عشان يهربوا من عيون الإخوان المجرمين اللى واقفين على الشباك بيعلقوا اللوحة .. يا ترى هوا ده الإسلام؟؟ .. ياريت اللى بيتستر ورا أى دين يفوق و يحس إننا كاشفينه .. فى برضو على الصعيد الأخر مجموعة مسيحيين حاقدين على مصر و بيروحوا أمريكا يقولوا المسلمين فى مصر بيبصوا لنا نظرة مش كويسة ... نعم لمصر و الدين لله و الوطن للجميييييييييييييييييييييييييع .. و لا عزاء للكدابين مسلمين كانوا أو مسيحيين .. مصر محتاجة للمصريين ..

Anonymous,  05/02/2011, 19:40  

فيه ناس على الإنترنت عمالين يدافعوا عن الإخوان بالصدق أحيانا و بالكذب أحايين

والله انا باحاول اتصدى ليهم قد ما اقدر

دولت ناس عملوا الدين وسيلة و ليس غاية

ربنا يحمينا منهم

والله انا خايفة يغتالونى

محمد صلاح 17/01/2012, 19:33  

معلش يعنى مايكل وعمال تشتم وتنتقد وترمى تهم بالباطل واتهامات من 1948لغايه دلوقتى وكل ده وانت عارف والناس كلها متاكده انه كدب فى كدب ويا ريت تتبع انت الرسول اللى كان بيلقبوة بالصادق الامين وبعدين تعرف الجناعه دى وتعرفنا الاسلام بجد

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP