أول تهديد أرهابى لى

>> 26 March 2008


من دقايق أتصلت بيا نمرة غريبة على الموبيل ( 0120259539 ) ... رديت عليها .... كان صوت شاب ، و سألنى أنت مايكل ؟ فقلتلة أيوة ... سألتة أنت مين ؟ فقاللى أنة صديق مسلم ... أيوة يعنى مين ؟ مرضيش يقول .... طيب أنا أقدر أساعدك بأية ؟ .... فقاللى أنة أتضايق جدا من الكلام اللى قراة على مدونتى ، و قاللى بدل ما تتكلم على الأسلام روحوا بصوا فى دينكم أنتم .... أنتم أصلا بتعبدوا تلاتة ... فالمفروض توحد باللة .... أنتم راضيين أن ستتاتكم ماشيين عريانين فى الشوارى ، فبلاش تتكلم عن النقاب تانى ... ثم الكلام اللى أنت كاتبة عن مكة و المدينة أنا مقبلهوش ، و ماتتكلمش عن الأسلام تانى ، لأن الأسلام أشرف منكم كلكم ، و أشرف من دينك أنت يا كافر
دى تقريبا الكلمات حسب ما أنا فاكرها ، و طبعا بعد كدة قفل السكة فى وشى .... خلفية الصوت كانت هادية ، و كان واضح أن فية واحد جنبة بيفكرة بالكلام .... اللى حسيتة برضة أن الشخص كان مرتبك جدا و أنة أول مرة يتكلم بالشكل دة ، و كأنى اللى جنبة هو اللى مسلطة و جايبة يقول الكلام دة .... أنا حبيت أنشر الكلام دة بسرعة علشان أكون لسة فاكر الكلام كويس ، و كمان علشان أبقى لحقت الموضوع من أولة .... أنا حاليا مش عارف أعمل أية ، بس تقريبا بكرة الصبح هعمل محضر فى القسم


طيب أنا بتهم مين ؟؟ .... أحب أحلل خلفية كلامة .... الشخص دة علق على مقال " مكة و المدينة لا تضيئان " ، و على بعض المقالات المتعلقة بالحجاب .... الفكرة أن المقالات دى مش موجودة حاليا على الصفحة الرئيسية على مدونتى ، و بالتالى الوصول ليهم صعب جدا .... كمان الراجل دة جاب تليفونى منين ؟ .... السؤال دة مالهوش غير أحتمال من أتنين ، يإما أخدة من حد يعرفنى ، يإما اخدة من حد واصل ، و بكدة يبقى قدامى خطين واضحين
الخط الأول : فى أجازة نص السنة اللى فاتت أخدت دورة فى الجامعة بنقول عليها الباثواى Pathways ، هى بتعلم مهارات التفكير و الأدارة ، و أنا كتبت عنها قبل كدة فى مقال " درع أفضل متدرب - باثواى شتاء 2008 " .... بعد ما الدورة أنتهت قالولى أن خريجى الدورة دى كل سنة عاملين جروب على الياهوو علشان يحافظوا على التواصل ما بين خريجى المشروع ، و لأن العلاقات كانت سمن على عسل ، و لأنهم كانوا أختارونى قبلها أفضل متدرب فى المشروع ، فأنا ماخفتش من الموضوع .... فى أول رسالة ليا على الجروب دة عرفتهم بنفسى و حطيت لينك مدونتى .... اللى حصل أن فية ناس أعترضت على الموضوعين نفسهم اللى أعترض عليهم الأرهابى اللى لسة مكلمنى فى التليفون .... حاولت أتفاوض مع الناس و أراضيهم ، لكن ردود أفعالهم كانت ضخمة جدا ، و أتقال عليا كلام كبير أوى من نوع أنى عميل و خاين و بتعامل مع أقباط المهجر ، و أنى بسئ للأسلام و بشتم المسلمين على مدونتى ، و كلام كتير من النوع دة .... المهم آخر الكلام معاهم رسى على أنهم طردونى من الجروب .... بعد ما طردونى حصلت معاهم أزمة تانية بسبب أنى عيدت عليهم بمناسبة عيد المولد النبوى ، و كان مع نفس المعايدة معايدة تانية للبهائيين بمناسبة رأس السنة البهائية ، و أنا كتبت الموضوع دة فى مقال " المولد النبوى و أغرب معايدات " .... الفكرة أن الجروب دة فية ناس كتير معاها رقم تليفونى ، و فية ناس كتير متطرفة جدا و عايشة بعقلية العصر الحجرى و ممكن أوى تطلع منها حركة زى دى ... دة غير أن فية زميل ليا جوا الجروب دة كان حزرنى مرة من الكتابة فى الموضوعات دى لأنة حسب كلامة " عارف زمايلة كويس ، و عارف أنهم ممكن يهيجوا الدنيا و يعملوا فتنة ، و يطلعوا بمظاهرة و يعتدوا على "
الخط التانى : من فترة قريبة برضة كتبت مقال بعنوان " فضيحة بالصور : كيف يجمع الحزب الوطنى أعضاؤة ؟ " ، و نشرت فية فضيحة بالصور للحزب الوطنى جوا جامعة أسيوط .... المهم المقال دة أتنشر فى أماكن كتير جدا ، و المصريين بمختلف تياراتهم أهتموا بية لدرجة أنة أتنشر فى منتدى الوسط ، و على موقع حزب العمل الأسلامى .... بعد المقال دة أستدعانى وكيل الكلية ( مفيش أى سابق معرفة بيننا ) و قاللى أن فية واحد مش فاكر أسمة ( مفهوم أنة أمن الدولة ) قاللة أنى مهتم بعلم المصريات ( أنا مكتبتش غير خمس مقالات بس فى علم المصريات ) ، و قعد يدردش معايا و كان بيكلمنى بذوق و أحترام شديد جدا ، و قاللى أن لو فية أى مشكلة معايا فى الكلية أنى ألجألة علطول و هو فى الخدمة .... من كلامة كان واضح أنة كان بيمهد ليا أنى أنا اللى أطرح موضوع الحزب الوطنى ، و لكن أنا مافتحتش الموضوع ..... فهل الأمن لما حس أنى مارضيتش أحل الموضوع مع وكيل الكلية وديا ، راح بعتلى حد تانى يشاكل فيا ، و يشغلنى عن أى كتابة فى غير صالح الأمن و الحزب الوطنى ؟ .... هو بصراحة الأحتمال دة وارد ، و إن كنت أنا برجح الأحتمال الأولانى أكتر
طبعا الموضوع ممكن يكون بعيد عن الأحتمالين دول خالص .... بس طالما أنا كدة مش ضامن حياتى ، و طالما فرصة أنى أقعد على الكيبورد مرة تانية مش شرط تكون مضمونة ، فأنا حبيت أحط قدام الناس كل حاجة ، علشان لو حصلت حاجة بعد كدة يبقى الناس عارفة كل حاجة

ردى على الأرهابى اللى كلمنى : أيوة أنا كافر ، و بفتخر أنى كافر ، و أشرفلى ألف مرة أنى أموت كافر عن أنى أعيش أرهابى أهدد الناس فى تليفوناتهم علشان أنا مفلس فكريا و مش عارف أرد على الحجة بالحجة .... اللى عملتة سيادتك عادى جدا و متوقع من البداية .... زى ما أتعمل مع فرج فودة ، و زى ما أتعمل مع نجيب محفوظ ، و زى ما أتعمل مع الرئيس الراحل أنور السادات .... ضرورى يد الأرهاب الظلامى تحاول تطعن أى محاولة للتنوير أو الحوار أو تطوير المجتمع .... هو دة المعتاد أن الأرهاب بيدبح أى واحد بيفكر ، حتى لو كان الأنسان دة دافع عن حقوق الأسلاميين زى ما أنا عملت قبل كدة فى مقالات " حينما دافعت عن الأسلاميين " و " عشرون سببا تجعلنى أوافق على وجود الأحزاب الدينية "

فية مشكلة أخيرة عايز ألفت النظر ليها قبل ما أخلص .... أنا هنا عايش فى الصعيد لوحدى ، و ممكن أوى أنة يحصلى حاجة ولا حد فى الدنيا يحس بيا .... علشان كدة أنا محتاج كل الدعم اللى تقدروا تقدموة .... أنا كل اللى بطلبة أن حد يبقى متابع معايا تليفونيا بأنتظام ، و أنة يبقى قادر فى حالة لو بلغتة أنى فى خطر أنة يعمل حملة ألكترونية و أعلامية تضغط على المجتمع كلة للحفاظ على حياتى .... و أكيد طبعا كل واحد هايقدملى خدمة وقت زنقتى ، أنى هردهالة وقت زنقتة

28 comments:

osama attalla 26/03/2008, 03:53  

متخافش يا مايكل .معلش هي دي مصر اللي بنحبها اللي مبنقدرش نفكر فيها لا بصوت عالي ولا حتي واطي لكن لو اتراجعت هتكون خسرت نفسك ومبادئك بالاضافه ان ده تهديد عادي من ناس متقدرش تعمل حاجه , عموما انا هنا لو احتجت اي حاجه وانتا طبعا عارف ايميلي ممكن تبعتلي رقمك وانا هتابع معاك التطورات .

كفاية 26/03/2008, 10:54  

العزيز مايكل ،،
اسمى ساهر جاد ..014648287
منزل 02/24587101
واعتقد اميلاتى عندك ومتواجد 24 ساعة .. يعنى اتهدد انت بس واحنا جاهزين :D

أحمد محمود ميلاد 26/03/2008, 12:58  

الزميل مايكل بالطبع نتعاضد مع حضرتك و مع كل صاحب رأي يريد أن يطرح ما يشاء حتى و لو أختلفنا مع بعض أو كل الطرح لأن الرأي لا يواجه ألا برأى أخر و للأصحاب العقول الحق في الموازنه و الترجيح....و بالتالي فأنا أستنكر مثل هذا الأمر بكل قوه و لكن لي عتب على حضرتك فيما يتعلق أولا بأسم المقال ثم بالتعميم...أسمح أن أناديك بأخي أن القول بأن هذا التافه هو تهديد اسلامي لأنه ببساطه لا يصح أطلاق تعميم ديني على تصرفات فرديه حمقاء لأن هذا هو عين العدل فقنابل الجيش الأيرلندي المزروعه في شوراع لندن لم يتم وصمها بالتهديد أو الأرهاب المسيحي الكاثوليكي ضد البروتستانت و ذبح الرهبان في جنوب أمريكااللاتينيه على يد الحركات لم الثوريه لم يوصم بدين و قنبلة أمريكا الذريه على مدينتين بريئتيين لا يجب أن يوصم بدين معين و مذابح رواندااا التى ذهب ضحيتها تحت سمع و بصر الأمم المتحده مليون شخص مسيحي على ايدي مسيحيين يجب أيضااا ألا توصم بدين ما و غير ذلك كثير و لكننا يجب ألا نقع في فخ القولبه ووصم مجموعات بشريه كامله بأفعال بعض من يدعي الأنتماء لها و هكذااا هذا التافه الذي حركت كلماتك ماءه الراكد..و لذلك أرجو ألا نقع في نفس الفخ الذي وقعوا هم فيه لأنه أخي بهذا الطرح و هذه الصور قد نكون أتبعنا منهج الأسلاموفوبيا و أنا أحسن الظن بحضرتك و برغبتك في تحريك الجماد الفكري الذي يعصف بعقول أبناء الوطن...أرجو أن تقبل هذا من شخص يختلف مع حضرتك في البعض و يتفق مع حضرتك في البعض الأخر...لك كل السلام و التحيه و السلامه

Maikel Nabil Sanad مايكل نبيل سند 26/03/2008, 13:37  

الزميل أسامة
طبعا مش هتراجع ، هو أنا لو بخاف كنت كتبت الكلام دة ؟ ... مستحيل أطاطى راسى قدام التخلف و البربرية

الزميل ساهر
بجد تضامنك معايا دعم كبير جدا مقدرش أستهين بية ... كتر خيرك يا باشا

الزميل أحمد محمود ميلاد
أنا غيرت أسم المقال و شلت كلمة " أسلامى " من العنوان .... طبعا الأسلام كدين برئ من التصرفات دى ، و أنا لما كتبت المقال راعيت السرعة علشان أكسب وقت ، و زى ما أنت أكيد عارف أنة صعب أن الواحد يراعى السرعة و الدقة فى نفس الوقت
على العموم شكرا على نقدك البناء ، و على دعمك ليا

Anonymous,  26/03/2008, 14:36  

كس أمك احمر يا ميكل
خلى بالك حنحط السيخ فى طيزك
ونطلعه وهكذا يعنى حنكيفوك
يا خول يا ابن الخول

Anonymous,  26/03/2008, 19:44  

اهو مايكل بيتكلم علي البهايم اللي زي صاحب التعليق اللي فوقيا دة
ربنا يشفيك يبني

Anonymous,  26/03/2008, 20:13  

العزيز مايكل : ـ

انا صديقك إسلام أحزنى كثيراً ما قرأته عما حدث لك فأنت شخص جميل جداً وعلى درجة عالية من الثقافة والتنوير أسلوبك هو التحدث بالعقل والتمدن وليس أسلوب هؤلاء الهمج والغوغاء والأرهابيين الذين لا يشغلهم شاغل ألا حجاب النساء وعنصرية الإسلام وكان لا شئ فى العالم الا هذة الأشياء السخيفة ، هل تعرف مدى جهل هؤلاء الذين يتكلمون بالدين ومدى سطحيتهم فمنهم فى منطقتى الزيتون حيث أقطن أجد سخافتهم الشديدة فأجدهم يكتبون على حوائط الشوارع والمترو عبارات تنم عن مدى جهل هؤلاء الأغبياء فيكتبون هذة العبارة المتخلفة " يستمر الغلاء أن لم تتحجب النساء " أود أن اسأل هذا الشخص المتخلف الذي يكتب ذلك الهراء ما علاقة تحجب النساء بإرتفاع وتحسين الإقتصاد القومى ، كيف به أكتشف هذة النظرية العبقرية ، ولماذا لم يكتشفها أباطرة الأقتصاديين أمثال آدم سميث أن تتحجب النساء ونصبح نجد أننا اصبحنا من أغنى بلاد العالم ، انهم ينموا لنا عن مدى تفكيرهم بل لا تفكير فليس مثل هؤلاء لهم تفكير أو ليس لهم آى علاقة بالتفكير آياً كان شكله هذا الهراء يدل عن مدى جهل وتخلف وسطحية هولاء الأرهابيين

العزيز مايكل أننى أخاف عليك لأنك خسارة أن تفقد حياتك فالعمر مازال طويل أمامك وأستخسر أن تضيع عقليتك هذة الجميلة على يد هؤلاء المتخلفين

وفى النهاية أعلن عزيزي تضامنى الكامل لك لعلى الله أن يحميك من يد هؤلاء

مع ألف سلامة يا عزيزى

صديقك الخائف كثيراً عليك وأتمنى لك السلامة

إسلام

Anonymous,  26/03/2008, 23:15  

عزيزى مايكل : و لا يهمك يا مان ... لازم يا ابنى يتجننوا ما أنت بصراحة جامد جدا . الصبح كنت فى الكنيسة
و أفتكرتك و السنكسار بيتقرى النهارده عيد القديس سيدهم بشاى. أوعى تفتكر انى قصدى انك قديس و العياذ بالله لكن لفت نظرى التشابه التاريخى رغم اختلاف الظرف و القناعة لكن الظلام واحد.
اسمع يا سيدى": فامت ثورة من الرعاع بالثغر وقبضوا على الكاتب سيدهم بشاى واتهموه زورا أنه سب الدين الإسلامي وشهد عليه أيام القاضى الشرعي بربري وحمار."
رعاع و بربرى يعنى عبد و حمار بتشديد الحاء. يعنى أسافل الناس الجهلة ...زبالة المجتمع .خلى بالك من نفسك و ربنا يحميك.
عماد عبد الملك. عضو من 3 ايام بس فى الجروب ووشى حلو موووووووووت

Anonymous,  26/03/2008, 23:33  

ماتخافش يامايكل من اى تهديد ولا حتى من تليفونات الدنيا كلها لان اللى بيقدر يعمل حاجة بيعملها من غير مايقول انا هعمل ولا حتى يهدد انما الناس دى مش قادرين غير على التهديد وبس
خد بالك من نفسك كويس اوى وماتخافش من اى حاجة ولا من اى حد واوعى اوعى اوعىىىىىىى يامايكل تتراجع عن موقفك نهاشى كمل للنهاية وكلنا معاك
صديقتك ليلى

درس وعمل بالأغذية والمشروبات والإدارة الفندقية منذ 1964 27/03/2008, 01:21  

أخى أو إبنى مايكل
رأيت من التعليقات عاليه عدد من الإخوة المسلمين المعتدلين يفوق عدد ذوو الأفكار المنحرفة وهذه بادرة خير، والقضاء على الفئة المريضة نفسيا وعقليا غير مضمون لأنهم جبناء يطعنون من الظهر وفى الظلام وما يمكن أن يخيفك يخيفنا أيضا نخاف على أبنائنا وأحفادنا، وأنا شخصيا أخاف على أهل بيتى فى حين لاأخاف على نفسى، لنصل من أجل بعضنا البعض ولنطلب من رب الجنود أن يحمينا وأن تكون إرادته نافذة لاإرادتنا، الرب يحميك، استمر فى صدقك ومعتقداتك ولا تسىء للآخرين والله القادر على كل شىء يحميك ويسدد خطاك

anton_2012,  27/03/2008, 08:15  

ربنا معاك ويقويك ويحميك
والحمد لله احنا كفار زى بعضينا
فانا بنادى وبقول ياكفار العالم صلوا عالشام ربنا يحمى ابنه مايكل
ربنا معاك ويقويك ويحفظك

المهم معلش حاول تقرا مزامير فى الفتره دى وانت هتبقى مطمن باذن ربنا

Nah·det Masr 27/03/2008, 10:00  

عزيزي مايكل، متخافش (ان عارف انك مش بتخاف) البلد لسة مش بتاعت الأظلاميين دول وانشاء الله مش هتكون بتاعتهم ابدأ. انا بأحييك على شجاعتك وبأفكرك انك مش لوحدك.

مفكر حر

Mary,  27/03/2008, 15:30  

اوعى تخاف اللة معاك و يحميك


الهنا يحارب عنا

مصطفى فتحي 27/03/2008, 20:25  

انا مسلم لكني متضامن معك ضد اي جهل وتنطع وتخلف

تحياتي لك

ra2iak 2h group 27/03/2008, 21:30  

hi ya michel eh el a5bar
ana 3ayza 2a2olak 7aga el 2rhab mesh ya3ny eslam we el sha5s ele kalemak da law kan moslem fe el eslam mai3taberoosh moslem
la2en mesh men 7a2 7ad yekafar 7ad
we mesh men 7a2 7ad yesader afkar 3'ero la2enha mosh 3agbah
we mesh men 7a2 ay muslim eno yena2esh ay 7ad fe deno aw bete3melo keda leeh la2en el eslam kafal 7oteyet el 3aqeda we el rasool wala el sa7aba 3omroham na2sho yahoody aw masee7y fe sho2oon deno
we fe a7adeeth 3an el rasool we el qor2an bei2ool keda
we men na7yet el deen kolena bena3boh barena laken mo5talefeen fe el toro2
we ba3deen a7la 7aga fe masr 2en mafeesh far2 been muslim we mase7y kolena egyptians
ya2ny ana walahy leya so7ab b2aly kteer 3arfahom 3ereft mo25aran enhom mase7eyyen 3omry mas2altohom 3ashan 7aga mosh mohem 2ny a3rafha kol wa7ed 7or fe denoh
ana ma2aretsh ele kont katboh bas akeed ma3'letesh fe dena le sabab baseet enak et3asabt awy lma el sha5s da 2alak kalam el eslam baree2 meno 3an denak fa akeed mesh hatekteb kalam sa5eef 3an ay deen la2enak keda beta7tarm denak hwa ma7taramsh deno besbab kalam 2alo mosh sa7ee7
we mat5afsh ele bei2ool mabie3melsh
la2en da kalam wa7ed gaban

benabdob 29/03/2008, 20:12  

لا حلوه ملعوبه

تهديد ايه و ارهابي ايه و قتل ايه و اغتيال ايه
معقوله وصل الاستخفاف بعقول الناس للدرجه دي

يعني انت عايز تعمل نفسك بطل و بقى بتهدد الامن و الاسلاميين و الظلاميين
طب تيجي ازاي الامن والارهابيين مع بعض وسعت شويه

و بعدين دي مش الفاظ اسلاميين ابدا لا امك ولا ابوك ( ولا الاماكن الحساسه اللي في جسم حضرتك و اللي في جسم والدتك ) ولا حتى ارهابيين هي كل الحكايه انك واحد عايز يعمل لنفسه منظر و خلاص

فكرتني بواحده كانت نشرت على النت ان ابن اخوها او ابن اختها عيل صغير و اسمه مايكل ( برضه ) و ان مايكل خرج يلعب مع العيال في العماره راح العيال قالولوا ما تلعبش معانا عشان انت مسيحي
اوم الاستاذه نشرت الموضوع ده على كل منتديات و جروبات مصر تقريبا و طبعا عمل البلبله المطلوبه
بس مع الاسف نأبها طلع على شونه لان معظم الردود حتى من مسيحيين كانت انه واضح انها قصه من خيالها و انه صعب اوي ان اطفال في السن ده كل همهم اللعب و المرح يفكروا بالطريقه دي و ان ده لو ممكن في اي بلد تانيه فمش ممكن يحصل في مصر لان اصلا اصلا في مصر صعب اوي انك تفرق بين مسلم و مسيحي
اوم الاستاذه بعد كده قالت انها ما كانتش قصدها تعمل الدوشه دي كلها ( مش قصدها رغم انها نشرتها على معظم منتديات مصر )

و طبعا الاستاذ مايكل ( بكل براءه ) ها ينشر الموضوع ده برضه على كل منتديات مصر

و بعدين و كيل كلية ايه اللى ها يبعتلك انت من بين الاف الاف الطلبه عشان موضوع اتنشر و لا ما اتنشرش على النت ولا حتى على حبل الغسيل
هو وكيل الكليه ده في اي جامعه و مع الكثافه الرهيبه دي في عدد الطلاب اللي الدفعه الواحده فيها بالالاف عارف كل طلبة الكليه نفر نفر

يا كابتن مايكل ( كابتن لانك لعيب بصراحه ) خليني اوضحلك حاجه عشان المره الجايه تلعبها صح

اولا بخصوص الدوله و امن الدوله فما فيش داعي تعمل دور الشهيد لان الامن في مصر هو اللي سامح بكل اللي بيحصل ده من حراك في الرأي على النت و غير النت
و الكلمتين اللي انت بتكتبهم دول بيكتب زيهم و اكتر منهم مائة مره ناس محسوبين على الحكومه و من الحزب الوطني و من لجنة السياسات نفسها
ده طبعا غير المستقلين و المعترضين و الزعلانين
يعني حضرتك ما جبتش الديب من ديله عشان امن الدوله يبعتلك وكيل الكليه يكلكمك كده وكده يعني على المتغطي عشان يشوفك انت اللي كتبت ولا لأ و ان بتوع امن الدوله وصوه يكلمك كده على المتغطي
ليه يعني مكسوفين منك مثلا
فهل الأمن لما حس أنى مارضيتش أحل الموضوع مع وكيل الكلية وديا ، راح بعتلى حد تانى يشاكل فيا ، و يشغلنى عن أى كتابة فى غير صالح الأمن و الحزب الوطنى ؟ ..
اوم امن الدوله لما حضرتك ما اتكرمتش عليه عشان تحل الموضوع معاهم وديا اوم ايه باعتلك واحد يشاكلك
الله يخليك بلاش استخفاف بعقولنا

اما بالنسبه للاسلاميين و الارهابيين و الخطرين فدول يعني ( لو موجودين في غير خيالك ) فيعني مش فاضيين لواحد ( لا مؤاخذه ) زي حضرتك و قاعدينله يعني
طب ما البلد مليانه ناس بتتكلم عن الاسلام و الاسلاميين و متأخذنيش يعني ناس على الاقل لهم وزن و قيمه و تأثير في المجتمع يعني ليهم حيثيات و معروفين و ليهم قراء و بيكتبوا كل يوم و في كل حته و ما حدش كلمهم ولا هما الارهابيين دول موصوف لهم واحد يكون اسمه مايكل و تكون عينه خضرا و عنده خمس صوابع في ايده اليمين
لكن ازاي
الاستاذ مايكل عايز يعمل راسه براس نجيب محفوظه و حامد ابو زيد و مش عارف مين تاني
و عشمان مثلا بكره تجيله دعوه من امريكا و لا من كندا يعيش هناك لان الرجل مهدد في دينه و في دنياه و في عقيدته و في حياته من الدوله و من الاهالي و من الامن و من سكان كوكب المشترى ( المشترى ده لان تقريبا كده بيوحي بالبيع و الشراء )

يا كابتن مايكل الاوهام اللي في خيالك دي كانت زمان
النهارده حتى بتوع اقباط المهجر ( اللي عمال بتتمحك فيهم و بتقول اصل الارهابيين فاكرني تبعهم ) اللي عمالين بره يألفوا و يقولوا مصر بتعمل و بتسوي في الاقباط
النهارده بتلاقي مايكل منير بيجي مصر كل يوم و التاني و بيقعد مع اكبر ناس في البلد يتكلموا و يتحاوروا و بيروح و بييجي من غير ما حد يكلمه
النهارده الاسلاميين و الاخوان المسلمين و الاخوان المسيحيين و الاخوان البهائيين و الاخوان الشعيين بيظهروا في التليفزيون و بيتكلموا و بيكتبوا في كل حته و بيقولوا اللي هم عاوزينه في السياسه و في الدين و ما حدش قربلهم لا من الحكومه ولا من لا مؤاخذه اللي ما يتسموش الارهابيين

اما بخصوص رقم التليفون اللي بتقول انهم كلموك منه فأنا قريت في الجرنان من يومين تلاته ان وزارة الاتصالات اكتشفت ان مش عارف كام الف تليفون اصحابهم ما لهمش بيانات عند شركات المحمول و الكلام ده اتنشر في جميع الجرايد و اكيد اكيد عدى على حضرتك بصفتك واحد من ابرز المثقفين التنويريين في البلد
يعني مش ها استغرب لو بعد كام يوم ترجع تقول ان الامن ما استدلش على العنوان او انك تطنش بقى و خلاص لانه في الغالب ممكن تكون النمره و الموضوع كله من تأليف و اخراج و تسويق حضرتك

عامة يا كابتن و لا يهمك تتعوض و خيرها في غيرها بس المره الجايه خد بالك

ملحوظه :
الاخوه الافاضل دراويش الكابتن مايكل
اعتقد ده جروب ليبرالي ديمقراطي و من حقي اقول رأيي
يعني مش معقول تبقى الدنيا كلها عماله بتنتقد الحكومه و النظام و حتى رئيس الدوله و يبقى مش من حقي اني انتقد الكابتن عصام قائد المنتدى
لان طبعا ها اتفاجئ بردود من نوع الظلاميين و الرجعيين و المتأخرين عشان بأنتقد مدير الجروب
ولا هو الفرق بين التنويريين و الظلاميين هو كالفرق بين انتقاد قائد الجروب و الهتاف بحياته
فيعني ما فيش داعي للعصبيه لان مش دايما اللي صوته عالي هو اللي على صواب بل على العكس غالبا ان الصوت العالي بيدل على الضعف
ده رأيي و انا حر فيه فيه زي ما انت كمان من حقك تقول رأيك في كل شيء فبرجاء الهدوء الهدوء

و ارجو النشر اذا كنت فعلا فعلا ليبرالي و ان كنت اشك انك ها تنشره

benabdob

Maikel Nabil Sanad مايكل نبيل سند 30/03/2008, 14:16  

أشكر كل اللى زارونى أو تضامنوا معايا

بالنسبة للتعليق رقم 8 اللى بيشبهنى بسيدهم بشاى
فية فرق كبير بينى و بين سيدهم بشاى
سيدهم بشاى قتلوة مسلمين و المسيحيين أستخبوا فى بيوتهم و مادافعوش عنة
لكن أنا بيدافع عنى المسلمين قبل المسيحيين
و أنا أوعد أى حد عايز يأزينى أنة يلاقى مسلمين بعدد شعر راسة بيدافعوا عنى
دى مش معركة بين المسيحية و الأسلام ، دى معركة بين التقدم و التخلف

أما بقى أبن عبدة ، فدة دورة مكمل للأرهابى اللى هددنى
واحد يتصل يهدد ، و واحد يدخل يسيب تهديد هنا ، و واحد تالت يدخل يكدبنى علشان يخلى الأولانى و التانى يستفرطوا بيا
طلبة كليتنا مايزيدوش عن ألف و ربع طالب ، و المدونين فى الصعيد أساسا مايجوش عشر مدونين ، يعنى سهل جدا تتبعهم و مراقبتهم

تحياتى و شكرى للجميع

nachoua 05/04/2008, 08:16  

مايكل العزيز،
ارجو الا تتاثر من هذه المكالمة او من غيرها.
وكما قال آخرون هنا ان من يريد فعل شئء لا
يهدد قبلها.
تجاهل ما حدث وواصل نضالك من اجل التحضر والحرية
وضد التخلف والرجعية

على فكرة انا واحدة من المسلمين "الحقيقيين" اللى حيدافعوا
عنك فى اى وقت.

سلام لاخى "الصعيدى".
:-)

Maikel Nabil Sanad مايكل نبيل سند 05/04/2008, 21:39  

شكرا يا نشوى على زيارتك
و أكرر شكرى لكل اللى وقفوا معايا فى الفترة اللى فاتت

أنا حاليا رجعت لحياتى الطبيعية ، و هستمر أكتب عادى ، و عمر ما طيور الظلام هاتخوفنى أبدا

تحياتى للجميع

Marvel 06/04/2008, 15:00  

ايا كان اللي قلته..فهو مجرد رأي لا يجب ان يمتد الخلاف خوله الى التهديد والوعيد

انا متضامن معك...دمت بخير

Sharm 18/04/2008, 14:10  

هو ايه الفرق بينك دلوقتى و بين النائب الهولندي اللى عمل فيلم فتنة و اخرج الصور و الايات من سياقها
!!!

شوية صور لناس بتتسحل ( العراق ) و ناس مشنوقة ( ايران ) و غيرهم
و كل ده عشان واحد اتصل بيك و قالك الكلمتين دول و و دول ميكبروش عن مجرد وعيد طفولي لا يرقى حتى للمناقشة

عموما انا ضد اي حد ممكن يضايقك و عايزك تكمل و تكتب كل اللى نفسك فيه لاننا عايزين بلدنا تبقى احسن بينا ان شاء الله لكن بدون عنصرية او تشدد

HardwireKinetic 25/04/2008, 07:27  

أحمد محمود ميلاد اللى كان عايز يشيل كلمة إسلامى من العنوان إسمحلى أقولك عن ثغرة كبيرة قد الحوت فى المنطق بتاعك. مايكل كتب إسلامى فى العنوان مش بس لإن اللى كلمه كان مسلم إنما كمان عشان رسالته كانت بإسم دينه. اللى إتكلم قاله مايتكلمش عن الإسلام و الإسلام أشرف من الكل. اللى إتكلم كانت دوافعه دينية. أما الأمثال اللى إنت إستخدمتها فا مافيهاش غير بتاعت أيرلانده هى اللى كانت بإسم الدين. و فى الحالة دى مافيش مانع أبداً يخلينا منقولش عليها إرهاب مسيحى أو عنف بإسم الدين المسيحى. هيروشيما و رولانده مكنوش بإسم الدين إطلاقاً فا بلاش بأه نعمم كده و ندخل المواضيع فى بعض و نلخبط فى المنطق. أما عن رهبان أمريكا الجنوبية دول فأنا مسمعتش عنهم خالص و دورت عالنت و مالقتلهمش أى وجود هنا. رجع يا مايكل العنوان زى ما كان لإن اللى كلمك كان مسلم و بيتكلم بإسم دينه. صحيح إنه مسلم "متخلف" زى ما الناس بتقول هنا بس هو برده لسه مسلم بيحاول يدافع عن دينه.

مايكل، مش هاقولك ربنا معاك ولا الله يحميك لإن محدش هيحميك غيرك إنت. متعتمدش على "الكائن الوهمى" زى ما كريم عامر بيقول لإنه مجرد كذلك: كائن وهمى. خد كل إحطياطاتك. حتى لو ده طلع لعب عيال: خد بلك برده. أنا مع حرية الإنتقاد و التعبير

Anonymous,  18/04/2009, 22:21  

و هو انت متعرفش تكون انسان محترم بتقول رأيك من غير اهانة و تجريح و اسائة للدين.. و لا هو لازم خبص الليبراليين ..
اللى بايعيين كل حاجة للغرب
و ماشى يا عم الكافر .. اصلا انت مفيش حد عايز يسمع منك حاجة .. لان اسلوبك مقرف و مستفز و زبالة ..
و حلوه اوى الثوب اللى ملبس فيه كلامك تحت عنوان .. قول رايك بحرية و خليك متحرر ..
و يشهد الله على ما فى قلوبكم

Anonymous,  15/05/2009, 16:07  

يابنى بلاش تدي لنفسك اهميه والمشكله ان الناس بترد عليك .. حقيقي انا مستغرب لا عندك اسلوب ولا فكر وحتى لغتك ضاربه ولا اى حاجة وياللى بتدعى الليبراليه عمال تهاجم كل الناس مش الاسلام بس بحجة ان واحد هددك ومقالاتك فرغه وكلها كلام مصاطب ما بيقولوا
ربنا يرحمنا

Anonymous,  07/02/2010, 09:50  

benabdob لذيذ أوى اللى اسمه

عايش ف الجاهليه و المشكله انهم لسه فاكرين أن ألاسلوب الارهابى بتاع عمرو بن الخطاب و بن العاص ده هاينفع معانا و توزيع الاتهامات لمايكل و أقباط الداخل و الخارج هههههه .. هو لسه فيه كده .. ياسلام ربنا يكتر من أمثالك يارب لنصرة دين الحق .. و القضاء عليه تماما و بسرعه طالما لسه ف الدنيا أرهابيين أمثالك

ابو نبيه,  13/04/2010, 01:37  

حقيقي أنا شعرت مش عارف أرد أقول ايه لكن من الواضح بموضوعية شديدة جدا إن الكاتب محاط بعدد غير طبيعي من الغلاة والمتطرفين فكريا وليست هذه سبه والعياذ بالله ولكنه فعلا تجمع به الكثير من الآراء المتضاربة والغير سوية حيث أن البعض يدافع عن الدين والبعض يدافع عن اللادين البعض يدافع عن الوطنية والقومية والآخر كل همه أن يثبت دينه بشوية فذلكة وآراء غاية في الغرابة .....
صحيح يا سادة إننا شعب يلهث وراء غريب الأفكار ومتطرفها طالما إنك لا تفهم اتبع القائد - أكيد هو فاهم هو بيقول ايه - أكثر من ربع الناس اللي بيتكلمو إما بيقول شكرا يا أستاذ مايكل ....وده ليس شيئ جيد على الإطلاق لأنه لا يقدم إضافة موضوعية أو بيقول في بداية كلاه أنا مش فاهم حاجة من الكلام الكتير ده
عموما أحب أن أحاورك بالأسلوب الجيد المهذب يعني أدب المسلم المحب لوطنه ودينه الغيور عليه المحترم لغيره بلا إنقاص ولا قلة أدب من غيره وهذا بريدي nabihmogahed@yaahoo.com

Anonymous,  21/09/2013, 07:31  

ماتيجي حبه تزيد محبه ....
عايز احط القرد في الجراب الجلد ....

امجد,  16/03/2014, 21:36  

أبدء كلامى
بأسم الله الرحمن الرحيم
اولآ احب اعلق على حاجه من كلامك انت قولت ان فى اكتر من تهديد جالك وناس كلمتك موبيل
ثانيآ فى كلامك بتقول ان الأسلام دين ارهابى وعنصرى ولا يقبل ثقافة الأخرين
ثالثأ بتحكى عنى نفسك واصحابك يحكو انك تتكلم بالعقل والمنطق ؟
رابعآ أنت تقول انك كافر وتتشرف بذلك وتريد ان تموت هكذا

أحب ابدء كلامى بالنقطه الثالثه وكلامى للجميع وليس لك كفرد
فين المنطق والعقل اللى انت بتحكى عنه فى كل كلامك

وبتقول ان فى ناس بتهددك زى ما زكرت من قبل انت حد مسك بسوء حد اتعرضلك وبعدين صدقنى لو حد عايز يعمل معاك حاجه كان عمل من زمان من غير ما يكشف عن نفسه أو حتى يخليك تاخد حظرك

والبنسبه لانك بتقول برضو ان الأسلام دين ارهابى وعنصرى طيب مش انتو بتقولو ان مصر اصلها قبطى وكانت كلها أقباط ارجع كدا بالتاريخ لما مصر كلها اقباط ودخلها الأسلام الأرهابى العنصرى زى ما انت بتقول تقدر تقولى ليه مقتلش كل الأقباط اللى كانو فى مصر تقدر تفهمنى كمان انت ازاى عايش دلوقت وسط الأرهابين دول من غير ما حد يقتلك ولا يخطفك ويعذبك ولا ولا ولا فكر كدا بعقلك

بالنسبه بقا بأنك عايز تموت كافر انت عارف يعنى ايه كفر اساسآ يبقا دور على معناها انا مش هقولك معناها
ولما تدور على معناها يبقا اعرف ان مفيهاش اى شرف

وفى اخر كلامى احب اقولك انك انسان لا يمتلك عقل من الأساس
انت شخص حاقد على الأسلام لا يحركك الا كرهك للمسلمين وكرهك لغيرك فقط
لو عايز تعرف بجد الدين السلام انا مستعد اجيلك فى المكان اللى انت عايزه ونتحدث سويآ بالــــعقل ان اردت انت تشغله يومآ فانا بانتظارك

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP