المولد النبوى و أغرب معايدات

>> 21 March 2008


أمبارح كان عيد المولد النبوى الشريف ( كل سنة و انتم طيبين ) ، فقلت بما أنها مناسبة جميلة بيحتفل بيها أخواتنا المسلمين فأنا هعيد على المسلمين اللى أعرفهم .... رحت هيلاهوب فاتح الكومبيوتر ، و بعت رسالة لجروب الليبراليين المصريين دة نصها :
" كل سنة و أخواتنا المسلمين طيبيبن بمناسبة المولد النبوى الشريف ، و كمان كل سنة و أخواتنا البهائيين طيبيين بمناسبة رأس السنة البهائية ، و نتمنى أننا نحتفل السنة الجاية بالأعياد دى و مصر تبقى أحسن من دلوقتى"
بعد كدة رحت فاتح الياهوو مسنجر و رحت معلم على أسامى معارفى المسلمين ، و رحت باعتلهم الرسالة دى " كل سنة و أخواتنا المسلمين طيبين بمناسبة المولد النبوى الشريف ، و برضة كل سنة و أخواتنا البهائيين طيبين بمناسبة رأس السنة البهائية "
طبعا معظم الناس مش عارفة أن النهاردة 21 مارس موافق رأس السنة البهائية ، فأنا قلت أعيد على الأتنين بالمرة ، و أنا عارف طبعا أن النهاردة برضة عيد الأم بس لأن معارفى مافيهمش أمهات فمجيبتش سيرة عيد الأم خالص .... المهم المفروض لما تقول لواحد " كل سنة و أنت طيب " أنة يردلك المعايدة و يقولك " و أنت بالصحة و السلامة " أو " و أنت طيب يا باشا " أو " شكرا " أو أى حاجة تانية .... أنا بقى قعدت مستنى يوصلنى رد ، فأول حاجة وصلتنى كانت رسالة على جروب الليبراليين المصريين دة نصها :
" الاستاذ مايكل . لا يوجد احتفال بالمولد النبوي الشريف فهو بدعة وما محمد صلى الله عليه الا بشر خاتم الانبياء والرسل ولا يوجد من السلف من اجاز الاحتفال بيه ... ثانيا لا تجمع في التهنئة بين دين سماوي وهو خير الاديان وبين ما يدعية البشر من معتقدات كالبوذية والبهائية الى اخره لانك كده بتهين دين يحب عيسى عليه السلام يا مايكل ، وشكرا "
و غير الرسالة دى محدش رد على الجروب ( أنا طبعا مش عارف رأى رئيس الجمهورية أية فى قصة أن المولد النبوى بدعة ، لأنة بعت تهانى لرؤساء و زعماء الدول الأسلامية بمناسبة العيد دة ) .... المهم قلت يمكن علشان الجروبات بتبعت الرسايل على الأيميل ، و مش كل الناس بفتح أيميلها يوميا ، فيمكن الناس لسة ماقريتش المعايدة .... لكن الغريب جدا أنى لاحظت أن الناس اللى بعتلهم المعايدة على الياهوو مسنجر فية منهم ناس دخلت أونلاين و مع ذلك محدش رد .... بعد شوية وصلنى أن أحد الزملاء أتضايق جدا من المعايدة دى و أتمسك بقرار طردى من جروب كنا مشتركين فية على النت بسبب أنى كتبت فى رسالة من رسايلى للجروب عنوان مدونتى ( أنتم طبعا شايفين أن مدونتى مليانة صور ناس عريانة و ناس مش لابسة حاجة ، و كمان بستضيف زكريا بطرس كل يوم و التانى ، ولا أنتم شايفين حاجة غير كدة ؟ ) ، و فوق كل دة هدد أنة هاينسحب من الجروب لو الأدارة رجعتنى
السؤال اللى بيطرح نفسة هنا : هو أنا علشان أحافظ على صداقتى بأصحابى المسلمين يبقى ضرورى أخسر أصحابى البهائيين و الملحدين ؟
و المضحك المبكى أنة وصلتنى مرة رسالة من أحد أعضاء تلك المجموعة نصها : " يـــــــارب الجهاز يضرب وندوز وكرت الشاشة يطير والبوردة تتشرخ ويجيلك فيرس يخليك تفرمط الهرد وفى الاخر الهرد يتحرق ويبوظ لو مقولت لا اله الا الله محمد رسول الله " ، و أنا أستقبلت التعليق دة بمرونة كبيرة جدا و أخدتها بضحك عادى ، و قلت أكيد أتبعتت غلط و أن اللى بعتها مايقصدش .... المهم أن الرسالة دى بتفكرنى بأغنية بيغنوها كتير زمايلى المسلمين لما نطلع رحلة فى الجامعة ، بيقولوا فيها " اللى ما يصلى على النبى ، أمة يهودية .... اللى ما يصلى على النبى هانحط فى عينة مية نار " و بعد كدة بتكمل الأغنية و هى بتعدد الحاجات اللى هايعملوها فى اللى مش بيصلى على النبى .... أغنية زى دى على الرغم من أنها بتحمل عنصرية لا حد لها ، دة غير أنها بتحمل تهديد علنى بالأذى ، و دة فى أى دولة ديموقراطية موضوع فية بوليس و محاكم و يمكن سجن كمان ، لكن أنا بستقبلها كل مرة بهدوء و بعتبر أنها أغنية تراثية بيرددها الشباب و هما مش فاهمين معناها .... أنا حبيت أفتكر الأغنية دى هنا علشان أحط الموقفين جنب بعض و أسأل : مين اللى لية الحق يتضايق من التانى ؟ اللى بيعيد على التانى ، ولا اللى بيهدد التانى ؟

7 comments:

Misrian Bloggers Directory 22/03/2008, 07:26  


كم عدد الأصدقاء الذين أرسلت لهم هذه الرسالة؟ وكم نسبة البهائيين؟ هل هي صفر في المائة؟ وكم عدد المسلمين منهم؟ ولماذا جمعت بين التهنئتين؟ وهل العينه التي أرسلت لها هذه التهنئة ممثلة لكافة التيارات؟ أليس من حق الإنسان أن يحدد أيام أعياده؟ أما هذه الأغنية التي تتحدث عنها فهي شيء طبيعي لو كنت دارسا للتراث الشعبي وأولها هذا المثل الشعبي الذي كتبته نوارة في أحد تدويناتها "ربنا مايفرح حد واحنا جزانا" ولعلك لم تقرأ عن الجنس الصريح أو العدوانية التي توجد في بعض تراثنا الشعبي؟! فالإختيار من هذا التراث يكون وفق أجندة الكاتب التي لم تعد خافية!

وفي أجندة أخرى ستجد التسامح والحب لكل البشر.

Maikel Nabil Sanad مايكل نبيل سند 22/03/2008, 15:25  

أنا مش بختار ولا حاجة ، و عارف كويس أن التراث الشعبى مليان حاجات بتشجع على التسامح و محبة كل البشر
بس لما تكون عايز تنقى التراث و تنضفة من الشوائب اللى فية ، يبقى ضرورى تشاور على النقط العنصرية اللى فية ، و هو دة اللى أنا عملتة

اسرة بهائية من مصر 25/03/2008, 20:32  

كل سنة وانت طيب يا استاذ مايكل
وشكرا على تهنئتك اللطيفة بعيد رأس السنة البهائية
الردود التى وصلتك عادى جدا ، دا فى ناس بتحرم انك تقول صباح الخير للبهائيين فمابالك لو تقولهم كل سنة وانتم طيبين!!!
:):)

كم نسبة البهائيين؟ سؤال لاادرى ماهى علاقته بوضوع تهنئة الآخرين المختلفين عنا باعيادهم!!
فرغم انى بهائية الا اننى اعيد على جميع اصدقائي المسلمين والمسيحيين فى اعيادهم واشاركهم فيها
وذلك طبقا لما تمليه على تعاليم البهائية( عاشروا مع الاديان بالروح والريحان)

ادعوك لزيارة مدونتى وشكرا لك

Lady of Shadow 02/08/2008, 13:44  

السلام عليكم ورحمة الله وبركاته
الأستاذ العزيز مايكل
طبعا أعرف أن ردي جاء متاخرا جدا كالعادة لكنك تعرف الظروف
عموما أود التعليق على أولئك الناس الذين أرسلو الرد على تهنئتك بالمولد النبوي الشريف
أولا كان الأستاذ عمرو خالد يتحدث عن خلق مهم في حياتنا ألا وهو الذوق وذكر أن أحد الشباب الملتزمين كان يجلس في المسجد وبجواره رجل كبير في السن فصلى ذلك الرجل وبعد أن أنهى صلاته مد يده للشاب وقال (حرما) فقال الشاب بضيق (كلمة حرما بدعة وهي لم ترد في السنة) فرد الرجل وهو لايزال مادا يده وقال (يعني قله الذوق هي اللي وردت في السنة!!!!!) طبعا كان من الممكن لذلك الشاب أن يصافح الرجل ويقول له (جمعا) ثم بأسلوب بسيط وبابتسامة جميلة يحاول أن يشرح له أن هذه الكلمة ليست من السنة
ثانيا كان الأستاذ عمرو خالد أيضا يتحدث عن المولد النبوي فقال(صحيح لم يرد أن أحد الصحابة الأجلاء أنهم احتفلوا بميلاد النبي محمد صلي الله عليه وسلم ولكن..إن كنا سنحتفل فلايجب أن يكون احتفالنا هو حلاوة المولد وكام أغنية دينية وفيلم الشيماء!!! بل علينا أن نجتمع ونذكر بعضنا البعض بقصة مولد الرسول ونتناول سيرته العطرة ونحاول تطبيق سنته في شتى مجالات حياتنا) كان هذا هو كلام الأستاذ عمرو خالد جزاه الله خيرا
وهو لم يقل إن من يحتفلون به هم كفرة أو خارجين عن الدين بل لا بأس إن فعلنا لكن لا يكون اساس الحتفال هو حلاوة المولد إلخ..خلاصة القول أن الرسول يجب أن يكون حاضرا في أذهاننا ووجداننا ولا نفرد فقط هذا اليوم لنحتفل بذكرى مولده وننساه باقي الأيام تماما كما يحدث في رمضان من قبل بعض الناس الذين يتوجهون للطاعات فيه ثم يفعلون مالاتحمد عقباه بعده
آسفة جدا على التطويل

Maikel Nabil Sanad مايكل نبيل سند 03/08/2008, 14:05  

عجبتنى أوى القصة اللى حكاها عمرو خالد
فعلا سعات الواحد يبقى عايز يدقق زيادة ، يلاقى نفسة بيغلط غلطات أكبر
شكرا على الأضافة
تحياتى

Anonymous,  25/03/2010, 17:01  

وحاطط الصورة دي ليه يا نصراني يا كداب؟؟حط صورة برسوم وهو عامل أوضاع مخلة مع النسوان النصرانيات في الكنيسة..هههه..ولا حط صورة شنودة الشاذ جنسيا

Anonymous,  11/11/2010, 20:51  

ما تخليك في كوزك لما نعوزك..
أقصد خليك في دينك المسيحي....ايوة صحيح نسيت...دا انت كنت ذكرت قبل كدة انك ملحد...
طيب طالما انت ملحد...مالك و مال الدين الإسلامي؟؟
بص... انا هاقول لك حاجة
الله - سبحانه و تعالى - اللي هو ربي اللي خلقنا كلنا و خلق الكون ده .. خلق آدم علشان يعمر الأرض...و بعدين آدم عصى ربه -لأن طبيعة البشر النسيان- و هنا ربنا عاقب عبده آدم...بس لما آدم استغفر ربه..ربه سامحه و غفر له..و لما تناسل آدم نسى أبناؤه فضل الله عليهم - زي أبوهم - و من هنا بعث الله منهم أنبياؤه لتذكير الناس بعباده الله الواحد الأحد .. و من الناس دول اللى تاب و رجع لعبادة الله...و منهم اللى استمر في عصيانه و تلقى عقابه..

اللي عايز أقوله ان الإنسان خطاء بطبعه و كثير النسيان..و دائما ما ينسى فضل الله عليه...و منقدرش نقول ان كل انسان أخطأ يبقى محكوم عليه بدخول جهنم..لأنه أمامه فرصة للتوبة و خير الخطائين التوابين..
كل ديانه انزلها الله على الناس عبدوا الله بها لفترة ثم حرفوها و نسوها فبعث الله بديانة تتممها و تمحو أخطاء البشر فيها .. حتى جاء الدين الإسلامي المتمم لجميع الديانات ...
الإنسان كما هي عادته كثير النسيان فنجد بعض الناس المسلمين يبتدعون بعض العادات و التقاليد ثم ينسبوها للدين..و هنا يأتي الخطأ..فنجد الإحتفال بالمولد النبوي أو بمولد الأولياء الصالحين بطرق لا تتعلق بالدين اللي هو الأساس..بس دي بنسميها بدعة..و الحمدلله الدين الإسلامي سما عن أي تحريف في أصوله .. و بالتالي تلك البدع التي تصدر عن بعض الناس ما هي إلا صورة من صور نسيان الإنسان و أخطاؤه التي هي في فطرته منذ بدء الخليقة.. و ليس لها ارتباط بتحريف أو تبديل في الإسلام...و الدليل ان أي حد عايز يقرأ عن الإسلام سيجد كل ما يشمل هذا الدين من أصول و خصائص في الكتب لم يتحرف و لم يتغير منذ أن شرعه الله و بعث به رسوله محمد صلى الله عليه و سلم..

أنا باقول الكلام الكتير ده كله مش لك لشخصك...و إنما لمن يقرأ مقالك و يتفكر بعقله..لذا أنا أيضا أفكر بصوت عالى و أجد أني مقتنع بهذا الدين و أحمد الله على انه خلقني مسلما...

أما إذا كنت تريد أن تفكر بعقلك..فلتقرأ أولا عن هذا الدين..و بلاش تتكلم كلام في الهوا..و إذا كان مش عاجبك عادات و تقاليد معينة في البد فبلاش تنسبها للدين...انسبها لجهل بعض الناس و حاول تناقش اساليب حلها و علاجها..بس لو كنت مش قادر تمسك نفسك عن إقحام الإسلام في انتقاداتك فأنصحك إنك تسكت أحسن..

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP