فضيحة بالصور : كيف يجمع الحزب الوطنى أعضاؤة ؟

>> 09 March 2008

" من الآخر ، هو الحزب الوطنى نصب على الجامعة ، و الجامعة نصبت على الطلبة " - موظف رعاية الشباب

يوم الأتنين اللى فات كان 3 مارس 2008 ، لقيت يافطة متعلقة عندنا فى الكلية ( مرفق صورتها ) و بتقول : " تعتزم الأدارة العامة لرعاية الشباب ( إدارة أعداد القادة و رعاية المتميزين ) الأشراف على البرنامج التدريبى فى ( الحاسب و اللغات ) و يتم ملئ الأستمارات الخاصة بالدورة فى أدارة رعاية الشباب فى موعد أقصاة 4 / 3 / 2008 - الرجاء أحضار صورة شخصية "

لحد كدة كلام حلو و كويس و مفيش مشكلة ، طلعت على موظف رعاية الشباب اللى مكتوب أسمة و سألتة ، فلقيتة غايب ، فرحتلة تانى يوم اللى هو آخر معاد للتقديم فلقيتة موجود .... صباح الخير ، صباح النور ، أية النظام ؟ قاللى دى دورة عاملها مركز أعداد القادة زى ما بيقول الأعلان ، طيب الدورة دى عليها رسوم ؟ لا دى مجانية على حساب الجامعة ، جميل جدا يا عم هات أستمارة .... أخدت أستمارة و أخترت رغباتى فى برامج الكومبيوتر و اللغات اللى عايز أتعلمها ، و عطيتة الصورة ... طيب يا سيدى الخطوة الجاية أية ؟ قاللى تيجى يوم الخميس فى مركز أعداد القادة الساعة 10 صباحا علشان فية أجتماع للمتدربين و هينظموا المواعيد ، طيب يا سيدى أنا عندى سكشن فى المعاد دة ، فالراجل طلع متعاون و قاللى خلاص خلص أنت سكشنك و بعدين تعلالى و أنا هظبطلك الدنيا و أقولك على اللى حصل ، طيب يا باشا كتر خيرك و هانتعبك معانا
يوم الخميس الصبح و أنا رايح السكشن ، فوجئت بالورقة دى متعلقة فى ستميت حتة عندنا فى الكلية ، و الكلام اللى فيها بيقول : " على الطلاب الذين سجلوا أسمائهم فى دورة ( الحاسب الآلى - اللغات ) التوجة إلى مقر الحزب الوطنى بأسيوط بشارع المنفذ يوم السبت الموافق 8 / 3 / 2008 م الساعة العاشرة صباحا . و ذلك لأستخراج كارنيهات الدورة و معرفة مواعيد و جداول الدورة "
أنا بقى خلصت السكشن بتاعى ، و قعدت مستنى فى الكلية لحد ما لقيت وقت مناسب أنى أصور الأعلانات دى فى عدم وجود العسس بتوعوت البوليس السياسى ، و على ما خلصت تصوير كان الموظفين كلهم مشيوا و ملحقتش أعدى على الراجل و أسألة على اللى حصل
يوم السبت كان عندى سكشن برضة ، و مكنش ينفع أسيب السكشن و أروحلهم فى المعاد .... قبل ما أدخل السكشن رحت معدى على رعاية الشباب ... صباح الخير صباح النور ، عملتم أية يوم الخميس ؟ قاللى : بص ، من الأخر هو الحزب الوطنى نصب على الجامعة و الجامعة نصبت على الطلبة .... لية أية اللى حصل ؟ أنتم عملتم أية يوم الخميس ؟ قاللى أنة راح مركز أعداد القادة فملقاش حاجة خالص و كل اللى عملوة أنهم أخدوا منة الورق و قالولة يبعت الناس على الحزب الوطنى يوم السبت .... طيب أية نظام الدورة ؟ قاللى دى طلعت بفلوس مش ببلاش زى ما كانوا قايلين .... طيب هما هايعملولنا كارنيهات عضوية فى الحزب الوطنى ؟ قاللى أنة مايعرفش أكتر من كدة و أنة قرفان منهم و أنى أبقى أتعامل معاهم بنفسى و منى ليهم .... طيب يا باشا ، أنا عندى سكشن دلوقتى و مش فاضيلهم ، قاللى روح فى أى وقت
خلصت السكشن على الساعة واحدة ، و رحت ساحب نفسى على الحزن الوطنى .... كانت أول مرة أدخلة من جوا ، و أتمنى تكون آخر مرة .... سألت فين البتاع بتاع البتاعة اللى بيقولوا عليها الجامعة ؟ قالولى فى الدور التانى .... طلعت الدور التانى لقيت أمانة الشباب ( محدش جاب سيرة أمانة السياسات ) ، و قدام أمانة الشباب كان فية طربيزة عليها أجتماع و كان بيرأس الأجتماع رجل دين مسلم ( محدش يسألنى بيعمل أية فى حزب غير الدستور مخصوص علشان يمنع أى نشاط سياسى على أساس دينى ) ، المهم كنت تاية فدلونى على الموظف اللى معاة أستمارات الجامعة
صباح الخير يا باشا ، أية النظام ؟ .... قاللى الدورات دى متقسمة مستويات ( حوالى عشرين مستوى ) ، و مش هتاخد شهادة غير لما تخلص المستويات كلها ، و كل مستوى ب 20 جنية بس .... هما كانوا طالبين 45 طالب من كل كلية ، يعنى واخدين حوالى ألف طالب من جامعة أسيوط ، و كل طالب هايدفع 20 جنية مضروبة فى 20 مستوى يعنى 400 جنية ، يعنى الحزب كسبان 400 ألف جنية من اللعبة دى .... طيب أية الأوراق المطلوبة منى علشان آخد الدورة دى ؟ قاللى ضرورى ترشحك جهتين الجامعة و الحزب الوطنى ، و طالما الجامعة بعتت أستمارتك يبقى هيا تعتبر رشحتك ، و ترشيح الحزب الوطنى تروح تاخدة من عند الموظفة اللى قاعدة هناك ( و طبعا بالفكاكة الحزب الوطنى مش هايرشح حد مش عضو فية ) .... طيب يا عمى ينفع آخد الدورة من غير ورقة ترشيح الحزب الوطنى ؟ فسألنى و هى هاتفرق معاك فى أية ؟ ..... طيب أقولة أية البارد دة ؟ أقولة أنتوا حزب مفترى و مطلع عينين الناس و مايشرفنيش أنى أبقى عضو عندكم ؟ المهم قلتلة أن دة مجرد سؤال ، فقالى عادى خالص ممكن ناخدك من غير أستمارة ترشيح الحزب ( و أكيد ماصدقتهوش ، لأنة أذا كان رئيس الحكومة مالهوش مصداقية و بيرجع فى كلامة ، يبقى أزاى أصدق موظف غلبان معندهوش سلطة ينفذ كلامة ) .... المهم قلتلة أنى خلاص صرفت نظر عن الدورة دى لأن عندى مذاكرة و عايز أسحب أستمارتى ، فقعد يتلكك و قاللى ممنوع و أحنا بنعمل أحصائيات و مش عارف أية ، كانى مانى مانفعش الكلام .... أمال يا عم الحج أنا آخدها أزاى ؟ فقاللى هى هاترجع على الكلية يوم الأتنين الجاى ، و بعدين رجع فى كلامة و قاللى يوم الجمعة بالليل يعنى آخدها من الكلية يوم السبت الصبح ( و لو أنى مش فاهم أزاى الكلية هاتبقى فاتحة يوم الجمعة و كمان بالليل ) .... المهم مع التحريات ، أكتشفت أن معظم الطلبة أكتشفوا اللعبة و سرقوا أستماراتهم فى الصبح ، فكانت النتيجة أنى لما رحت متأخر فى آخر اليوم كانوا بيستميتوا علشان مايطلعوش أى أستمارة من الفاضلين عندهم .... المهم سيبتة و مشيت و لحد دلوقتى محصلش حاجة تانية ، بس اللى أنا متوقعة أنى هلاقيهم عاملينلى كارنية عوضية فى الحزب الوطنى

المهم قبل ما أقفل كلام ليا كام كلمة فى السريع هوجههم للحزب الوطنى و أنا عارف أن العسس بتوعوتهم اللى ماليين النت أكيد هايخبصوا و يوصلوا الكلام
- يعنى هو الأستعباط المفروض ما يبقاش عينى عينك كدة ، يعنى لما واحد من أى حزب تانى بيعمل نشاط سياسى فى الجامعة بتطلعوا دينة ، و لما ييجى الحزب الوطنى يعمل حاجة تفرشوا الجامعة كلها يفط ؟ محدش قاللكم أن الحزب الوطنى أشترى الجامعة ؟ .... لأ و شاطرين كل شوية تقولوا قانون تنظيم الجامعات بيمنع النشاط السياسى فى الجامعة .... فعلا : أذا لم تستحى فأفعل ما شئت
- كمان يا بهوات أنا شايف الورق فى رعاية الشباب ، و كنتم طالبين أن الكلية ترشح أساسا طلبة أتحاد الطلبة و الطلبة الأوائل ، يعنى أنتم تيجوا تاخدوا أنضف طلبة و تاخدوهم على الجاهز كدة عينى عينك ، دة أية الأستعباط دة ؟ .... لأ و شاطرين قبل ما تعملوا أتحاد الطلبة حزفتم أسماء الطلبة الأعضاء فى أحزاب سياسية
- نيجى بقى للنقطة المهمة ، و خلى بالكم معايا .... أنا ماكتبتش أستمارة عضوية فى الحزب الوطنى ، أنا كتبت أستمارة تدريب جوا جامعة ، فلو فوجئت بأنى طلعلى عضوية فى الحزب الواطى ، فأنا معنديش مانع يبقى الحزب الوطنى هو السليوة ( مصدر التسلية ) بتاعتى فى الفترة الجاية .... يعنى أعتقد تلموا الدور و أستمارتى ترجع الكلية فى معادها ، و محدش فيكم يفكر يعملى عضوية فى حزبكم اللاوطنى و خلى الطابق مستور أحسن
- بالمناسبة كارنية الحزب الوطنى هو الكارنية الوحيد اللى ماتعرفش تخلص منة ، يعنى تمسك الكارنية كدة لا تلاقى لية تاريخ أنتهاء ولا مدة صلاحية ، ولا بيتلغى لو ماجددتش عضويتك ، يعنى لزقة بغرا من الآخر .... و ياما ناس طلعت كارنيهات فى الحزب الوطنى و مش عارفة تلغيها أزاى ، و اللى سألوا فى الموضوع دة قالولهم أن إلغاء عضوية الحزب الوطنى لية حد ردة ... و النقطة دى هاسيبها من غير تعليق احسن

على العموم ، أنا مستنى أشوف أية اللى هايحصل ، و على أساس اللى هايعملوة هبنى قراراتى فى المرحلة الجاية

7 comments:

Melad Hanna 11/03/2008, 10:23  

استاذى الفاضل صاحب الموضوع الحزب الوطنى لا يجبر احد على دخوله وعلى الرغم انه افضل حزب موجود ومش هقول بيقدم كل الخدمات للشباب ولكنه انشط حزب وبخصوص الغاء العضوية او انتهائها فمن الواضح انك لم ترى الكارنية فالكارنية يصدر علية تاريخ الاصدار ويعتبر ملغى بعد مرور سنة كالمة من تاريخة ولابد تأجديدة عن طريق تسليم الكارنية والتجديد فى الحزب الوطنى ليس واضح للجميع او بمعنى لا احد يعرفه غيره اعضاه فقط وهو عباره عن علامة بارزة يقومه بضغطها على احد المربعات الموجودة فى الكارنية حتى تنتهى المربعات مع السنين يتغير الكارنية
واظن ان عرض كورسات لغة او حاسب الى لم تراه فى باقية الذين يسمونه احزاب

DantY ElMasrY 11/03/2008, 14:26  

حصلت معايا الحكاية دى سنة 2001وطلعولى كارنيه مش عارف اخلص منه لحد الأن
بس انا تجاوبت معاهم على أساس إن فى مشروع
لقيت الحكاية ان مستر جيمى عاوز اعضاء جداد يبقو تبعه
وقت الحكاية ما ابتدت قدمتلهم ورقة عمل مليانة مشروعات
كلها استقرت بأمان فى درج أمين الشباب
ومش عارف استقيل

saher gad 31/05/2008, 22:31  

العزيز مايكل
ياريت نتواصل،،اريد الحديث معاك
012 464 2827
تحياتى
ساهر

ahmedwalymek 06/10/2010, 01:19  

الحزب الوطنى عضويتة لازم تكون بطلب وبطاقة انتخابية وصورة بطاقة شخصية وتعهد والحزب الوطنى مقدملك دورة ب 400 جنيه سعرها كذا الف جنيه وبالدولار في المعاهد الاجنبية وانت اذا عايز استمارتك هيدوهالك لانهم اصلا مدينك دورة مدعمة والعضوية في الحزب بمصاريف زي النقابة ورسم رمزى وانت اللي ليك الشرف انك تكون عضو اما هما ليسو في حاجة ليك وكلامهم واضح ان الصورة كانت لكارنيه الدورة مش الحزب وكمان اول ست شهور في عضوية الحزب مابتتمتعش بحقوقك الحزبية ترشيح وكده انا على فكرة عضو حزب وطنى جديد من شهرين وبارادتى الكاملة ومفتخر ومابخدش فلوس وللعلم استمارة الحزب مش بواسطة وسعر الاشتراك 7 جنيه بس وناس محترمين جدا في الحزب وبلاش تكذبو

Anonymous,  18/10/2010, 17:07  

على فكرة يا استاذ احمد يا صاحب اخر تعليق
كلام حضرتك مستفز جدا
وواضح انك مش عايش في مصر
ولو بتزورها اكيد مش اكتر من مرة في السنة
لان حضرتك لو بتزور مصر يومين كل سنة على مرتين اكيد كنت عرفت ايه هوه الحزب الوطني
وايه هيه اهدافه وايه هيه اساليبة
على فكرة
اقسم بالله العلي العظيم الذي لا اله الا هو
انا لست عضوا باي حزبا اخر وكلامي ليس له اي غرض
والجديد كمان ان انا عضو في هذا الحزب
واود ان الغي عضويتي ولا اعرف كيف
وشكرا

Naruto20007 29/11/2010, 17:43  

يا استاذ مايكل ده مش اجبار انك تنتسب للحزب
ده مجرد دوره مدعمه من قبل الحزب علشان دعايه للحزب
زى ما كا الناس بتعمل حاجه دعايه ليها وكمان هم
شروطهم واضحه

* أن يكون مصريا
* أن يكون مؤمنا بمبادئ الحزب
* ألا يكون عضوا فى حزب آخر
* أن يكون قد بلغ ثمانية عشر عاما عند تقديم طلب العضوية
* أن يكون متمتعا بحقوقه السياسية ولم تصدر ضده احكام مخله بالشرف او الاعتبار او تتخد ضده تدابير من محكمه القيم ، ما لم يكن قد رد اليه اعتباره
* ان يكون مقيدا فى الجداول الانتخابية

ثانيا بالنسبه للاعلان بتاع موقع
AdultFriendFinder

ده للعلم موقع تعارف اباحى
لو حضرتك متعرفش كده يعنى
وكمان بالنسبه للصوره الى انت عامل فيها حركه بصوبعك مش ولابود
يا ريت تشلها
علشان لما تتكلم فى حاجه زى كده
الناس يكون عنها ثقه فيك

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP