لماذا أنضممت للحزب المصرى الليبرالى ؟

>> 20 January 2008


من حوالى 3 أسابيع كنت قاعد مع مجموعة من زملائى فى الحزب المصرى الليبرالى فى أسيوط ، و كنا بنتناقش عن فكرة متلازمة الحقوق و الواجبات جوا الحزب ، و للأسف الفكرة دى مش لاقية ناس كتير تقتنع بيها وسط أعضاء الحزب .... المهم أننا فى وسط الكلام سألونى " مش هو أحنا لما قعدنا 6 شهور نقنع فيك علشان تنضم للحزب ، دة مش يعتبر عمل سياسى ؟ " .... أنا النهاردة هجاوب على السؤال دة ، و نشوف أقناعى بالأنضمام للحزب المصرى الليبرالى كان عمل سياسى ولا لأ .... أنا أتعرفت على أعضاء الحزب المصرى الليبرالى فى فبراير 2006 ، و عملت توكيل رسمى للحزب فى أواخر نوفمبر 2006 ، و هى دى الأسباب اللى أنضميت للحزب بسببها

1- أعضاء الحزب كانوا قايلين أن المؤتمر التأسيسى للحزب ( عند أكتمال 1000 عضو ) سيتم عقدة فى رأس السنة المصرية فى سبتمبر 2006 .... أنا حسيت أنى شغال مع ناس سخنة و عايزة تشتغل ، و كلها كام شهر و ناخد ترخيص و ننافس فى الساحة السياسية ... اللى حصل بعد كدة أن معاد المؤتمر فضل يتأجل ، و لحد دلوقتى لم ينعقد
2- فى شهر يونيو 2006 ، كانوا بيقولولى أن الألف توكيل هايخلصوا فى خلال 3 شهور ، و أن عدد أعضاء الحزب الفعلى مش أقل من كدة بكتير ، و أنهم عندهم أعضاء من أسكندرية لأسوان ، و كمان ليهم ناس فى كندا و بعض الدول الأجنبية ( مصريين مقيمين بالخارج ) .... النهاردة بعد سنة و نص على الكلام دة أكتشفت أن عدد أعضاء الحزب الفعليين لا يزيد عن 30 عضو ، يضاف إليهم حوالى 70 عضو على الورق .... و اللى أسوأ من كدة أن وكلاء المؤسسين أكتشفنا أنهم حطوا فيهم واحد مش عضو فى الحزب ، و بعد كدة أتنين تانى من وكلاء المؤسسين سابوا الحزب ، و باقى الوكلاء مع باقى قيادات الحزب مافيهمش غير واحد بس بيقولوا أنة عمل توكيل .... تخيل أية مشاعرك لما تكتشف بعد ما طلعت توكيل ، أن القيادات اللى خلوك تعمل التوكيل لسة ماعملوش التوكيل بتاعهم ؟
3- كانوا بيقولوا برضة أن البرنامج و اللائحة الداخلية سيتم أعدادهم و التصويت عليهم فى خلال 3 شهور ، و ساعتها عملوا تصويت على أسم الحزب و طلبوا أقتراحاتنا فى البرنامج .... إلى الآن لم يتم كتابة برنامج أو لائحة داخلية للحزب ، فقط تم كتابة مقدمة للبرنامج و خط سياسى ( فى أقل من 20 صفحة ) و لم يتم التصويت عليهم ، و برضة تم كتابة لائحة داخلية مبسطة ( 3 صفحات ) و لم يتم التصويت عليها و لم تفعل ، و اللجان اللى بيتم أنتخابها فى الحزب غير منصوص عليها فى اللائحة
4- قالولى فى بداية نوفمبر 2006 أنهم بيخلصوا ترخيص جريدة للحزب ، و أن الجريدة هاتنزل فى خلال أسبوعين .... و قالوا أن فية رجل أعمال قبطى ( رفضوا ذكر أسمة بحجة حمايتة من الأمن ) سيتبرع بمبلغ ربع مليون جنية الأتاوة اللى بتطلبها منك الحكومة المصرية لما تحب تطلع ترخيص جريدة .... لحد دلوقتى ماشفناش جريدة طلعت بأسم الحزب ، و ماسمعناش عن رجل أعمال بالثقل دة بيؤيد الحزب أساسا
5- فى شهر فبراير 2007 واحد من أعضاء الحزب أبتدى يطلع جريدة خاصة بية ، و أعضاء الحزب قالولى أن هى دى جريدة الحزب اللى كانوا بيقولوا عليها ، و لما سألتهم لية الجريدة مش بتكتب أنها تابعة للحزب المصرى الليبرالى ، قالوا " علشان الأمن مايضايقناش " .... أتعاملت مع الجريدة من المنطلق دة ، و مع أول أختلاف مع أحد آراء الجريدة ، أكتشفت الحقيقة ، و عرفت أن الجريدة دى مالهاش أى دعوى بالحزب
6- كانوا بيقولوا أن الحزب هو أمتداد لحزب مصر الأم اللى رفضتة لجنة شئون الأحزاب و من بعدها القضاء بسبب أنة عالمانى .... النهاردة رجعوا يقولوا أن الحزب حزب جديد و أنة مش أمتداد لمصر الأم .... طبعا النقطة دى ممكن تبان تافهة ، لكن لما كانوا بيقولوا أنهم أمتداد لمصر الأم ، فأحنا كنا عارفين مبادئ مصر الأم و كانت منشورة فى كتاب ، لكن دلوقتى بقى حزب جديد بمبادئ جديدة ، يعنى المبادئ اللى أنضميت للحزب على أساسها أتغيرت ، و حتى المبادئ الجديدة مش مكتوبة و بالتالى الحزب بقى مليان فوضى و أختلافات فكرية كتير
7- قبل ما أنضم للحزب كان ليا تحفظات أربعة ، كان من بينها أنى مش هانضم لحزب ألا لما أتأكد أنة حزب بيمارس نشاط سياسى حقيقى مش حزب على الورق ، و النشاط الحزبى المنظم بيتطلب أن تكون فية لجان تقسم الشغل بينها .... فى الأول أتحججوا بأنهم عايزين يخلصوا التوكيلات فى الأول ، و بعد كدة قالولى أنهم هايعملوا لجان و لكن مش هاينفع أشارك فيها ألا لما أعمل توكيل ، و طلبوا منى أنى أعمل توكيل على أساس أن معاد أنتخابات اللجان هايتحدد فى زيارة قيادات الحزب لأسيوط فى نوفمبر 2006 .... عملت التوكيل وقتها ، و ماتمش عمل لجان ألا فى فبراير 2007 ، و بعد حوالى شهر تم حل اللجان بسبب أن محدش فى الحزب عايز يشتغل فى السياسة بما فيهم رؤساء اللجان المنتخبين .... و بعد كدة الحزب قعد من غير لجان لحد شهر ديسمبر 2007 اللى فية تم أنتخاب 3 لجان ، مافيهمش غير لجنة واحدة شغالة اللى هى اللجنة الأعلامية ، و كل شغلها عبارة عن مدونة و مجموعة ضيقة جدا من المراسلات و الدعاية
8- كان من بين التحفظات الأربعة ملف علاقة أعضاء أسيوط بأعضاء القاهرة ، و أفتكر أن أحد أعضاء الحزب و هو بيقنعنى أن العلاقة كلها سمن و عسل أنة قال أنة فية هيمنة أسيوطية جوا الحزب .... فى شهر يونيو 2007 تم ترشيحى ممثلا عن أعضاء الصعيد كلهم فى لجنة تسيير شئون الحزب ، و الهيمنة الأسيوطية اللى كانوا بيقولوا عليها كانت بالأضافة لباقى أعضاء الصعيد تمثل عضو من السبعة أعضاء اللجنة ( شفتم الهيمنة وصلت لحد فين ؟ ) .... طبعا اللى حصل جوا اللجنة بعد كدة يحطم أى فكرة لوجود و لو حتى أى نوع من الأحترام المتبادل بين أعضاء الحزب فى القاهرة و فى أسيوط ، و اللى عايز يعرف تفاصيل أكتر فى النقطة دى يبقى يقرا مقال : فضيحة الليبراليين
9- كانوا بيقولوا برضة أنهم جاهزين بمرشحين للمجالس النيابية و أنهم كانوا ناويين يدخلوا أنتخابات مجلس الشعب فى 2005 ، و أنهم لو كانوا أخدوا ترخيص حزب مصر الأم كانوا دخلوا أنتخابات رئاسة الجمهورية ضد الرئيس ( مبارك ) .... بعد كدة عدت علينا أنتخابات مجلس شعب و أنتخابات مجلس شورى و محليات ، و ماشفناش حد دخل فى أى أنتخابات ، لكن للأمانة فى ناس فى الحزب قبل كل أنتخابات لازم يعملوا شوية هيصة و يوهموا الناس أنهم هايدخلوا الأنتخابات علشان يضحكوا على الزباين الجداد ، على الرغم أنهم عارفين كويس أن الحزب مافيهوش الشخصية اللى تقدر تدخل أنتخابات و تنجح فيها .... بس علشان أبقى عادل ، أنا سمعت عن وجود مرشحة للحزب فى المنيا للمجلس المحلى ، و دى كلامى ماينطبقش عليها لأن معلوماتى عن أعضاء المنيا محدودة ، بعكس أعضاء القاهرة و أسيوط اللى أعرف معظمهم

دلوقتى أنا بعد سنتين عمل سياسى مع المجموعة دى ( منهم أكتر من سنة و نص عضو رسمى فى الحزب المصرى الليبرالى ) حاسس أنى أنضحك على ، أو بتعبير تانى أتنصب على ..... حاسس أنى أتورطت فى الأنضمام لحزب لو كنت أعرف اللى جواة مكنتش أنضميت لية أبدا .... و بعد دة كلة ييجوا أعضاء الحزب يقولوا أن أقناعهم ليا بالأنضمام للحزب كان عمل سياسى !!؟ ... طيب أذا كان دة عمل سياسى ، يبقى الغش و الخداع شكلة أية ؟ يبقى النصب و الأحتيال شكلة أية ؟ يبقى تضليل الرأى العام شكلة أية ؟ .... هى دى الليبرالية اللى بينادوا بيها ؟ هى دى الطريقة اللى هايعاملوا بيها الناس لو وصلوا للحكم ؟ .... أسئلة حائرة من شخص بيراجع نفسة

0 comments:

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP