تضامنا مع شعب بورما

>> 06 October 2007


كل يوم بيعدى بيخلينى أحترم الديانة البوذية أكتر و أكتر ... أكتر من 30 ألف راهب و راهبة بوذية خرجوا الشهر دة فى مظاهرات كاسحة فى بورما معترضين على الحكم العسكرى .... للأسف بورما ظروفها زيينا فى مصر , و الحكومة بتاعتهم وصلت من خلال أنقلاب عسكرى و من غير أنتخابات ديموقراطية ... يمكن بيختلفوا عننا فى أن الشعب أيجابى و بيتحرك و مش سلبى زى شعبنا .... كمان بيختلفوا عننا فى أن حكومتنا أذكى ميت مرة من الحكومة العسكرية بتاعة بورما , لأن حكومتنا بتعمل تقريبا كل اللى بيحصل فى بورما , و مع ذلك بتقدر تخدع المجتمع الدولى و تخدع حتى المصريين و ماتحسسهمش بالكلام دة

المهم أنا عجبنى جدا موقف الرهبان البوذيين اللى ماتواطئوش مع الدكتاتورية العسكرية زى ما حاصل عندنا , ما باعوش ضميرهم و قالوا " نعم للريس " , ما أستغلوش مناصبهم الدينية علشان يروجوا لبضاعة الحزب الوطنى الفاسدة اللى خربت البلد , مباعوش دينهم و وصاياة علشان يمشوا على مزاج الحاكم الأوتوقراطى .... ضميرهم فضل رقم واحد فى حياتهم , و لما شافوا الغلط بعنيهم قاموا زى الأسود يدافعوا عن حقوق بلدهم .... ما أنسحبوش من الحياة و قعدوا يقولوا احنا رجال دين مالناش دعوة بالسياسة , ما أنطووش فى الجبال و الصحارى و نسيوا الحياة الأنسانية و مشاكلها , و لكن رهبنتهم رهبنة أيجابية غير أنسحابية بتخليهم يشاركوا فى الحياة العامة لصالح المواطنين و لصالح حقوق الأنسان .... معملوش زى رجال الدين اللى عندنا اللى بيحاولوا يأسلموا أو ينصروا الدولة و يحطوها تحت جناحهم و يدخلوا الدين فى الدستور و القوانين و فى كل شئ فى أجهزة الدولة , الرهبان البوذيين معملوش حاجة من الكلام دة , كل اللى طالبوا بية هوا حقوق المواطنين من غير ما يفرضوا توجهاتهم الدينية على حد , من غير ما يخلوا الدين سيف مفروض على رقاب البشر يدبح فيهم كل يوم و هما عايشين

أنا مش عارف المصريين مش راضيين يفوقوا لية ؟ الكهنة و الأساقفة الأرثوذكس فى اليونان شالوا السلاح على كتافهم علشان يحرروا اليونان من الأحتلال التركى , و فى أمريكا اللاتينية الرهبان و القسس الكاتوليك بيشتركوا فى الميليشيات الأشتراكية اللى بتدور على حقوق المواطنين , و فى لبنان كان الأساقفة الموارنة بيشاركوا فى الحروب علشان يحموا الشعب المارونى من الظلم العربى الأسلامى اللى مستمر على بلادهم من 14 قرن , و أهة فى بورما الرهبان البوذيين هما اللى طردوا الأستعمار الأجنبى فى بورما زمان و دلوقتى راجعيين من تانى يقفوا مع الشعب ضد الحاكم الدكتاتور العسكرى اللى فارض نفسة على الناس بالعافية ..... كل دة و أحنا فى مصر عندنا رجال الدين بياكلوا احسن أكل و الناس بتموت من الجوع , بايعين نفسهم للحزن الوطنى و فى كل أنتخابات يقفوا كلهم وراة يبايعوة و يباركولة و يحشدوا الأصوات وراة , عمرهم ما دوروا غير على مصلحتهم , بيسكتوا عن كل أنتهاكات فى مصر ( عمر حد فيكم شاف البابا ولا شيخ الأزهر أعترض على أعتقالات المعارضين و لا ضرب المتظاهرين و لا حتى طرد مواطنين من مصر مع نزع جنسيتهم زى ما حصل مع اليهود و زى ما بيحصل دلوقتى مع البهائيين ؟ ) , كل همهم أن الدولة تدستر و تقنن دورهم علشان يفضلوا ماسكين رقاب الناس فى ايديهم , و هما وحدهم اللى فى ايديهم يجوزوا و يطلقوا و يوافقوا على القوانين و هما اللى بيختاروا نواب البرلمان و حتى الرئيس .... كل دة و الشعب الغلبان لازال بيعبدهم , و كلامهم عند الناس كأنة منزل من السماء , كل الناس بتحترمهم و توقرهم و ياريتهم كانوا قد الأحترام دة


نرجع لموضوع بورما .... من حوالى أسبوع جاتنى دعوة أنى اتضامن مع رهبان بورما و ألبس قميص أحمر زييهم ... الدعوة كان هدفها أن العالم كلة يقول انة ضد الظلم اللى بيتعرض لية شعب بورما .... بصراحة على الرغم من انى متضامن مع شعب بورما و رهبانة حتى النخاع لكن مقدرتش اعمل كدة لأسباب كتيرة أهمها انى معنديش قميص احمر , و كمان الناس عندنا فى الصيعد ماتعرفش الفرق بين دولة بورما و البورمة اللى بيشربوا منها الفلاحين , و أنا بصراحة تعبت من وضعى الأجتماعى اللى مخلينى زى العالم المجنون ( عبقرينو بتاع أفلام الكارتون ) اللى الناس كلها بتخاف تتعامل معاة , دة غير ان الوضع عندنا فى مصر مايختلفش كتير عن الوضع فى بورما و مينفعش الواحد يسيب الميت اللى فى بيتة و يروح يدفن ولا يبكى على ميت جارة

المهم يا جماعة , ناس كتير من دول العالم متضامنين مع شعب بورما و عملوا موقع يجمعوا فية توقيعات الناس من كل حتة فى العالم اللى بيرفضوا اللى بيحصل لشعب بورما ... عدد التوقيعات النهاردة الصبح كان عدى ال 650 ألف , و هما عايزين يوصلوا عدد التوقيعات لمليون , و هما أتفقوا مع واحد محترم كان خد جايزة نوبل قبل كدة أنة هيسلملهم التوقيعات دى ل " بان كى مون " الأمين العام للأمم المتحدة , التوقيعات دى هايبقى ليها دور جامد جدا فى مساعدة شعب بورما و خصوصا أن الموضوع هايتعرض على مجلس الأمن .... توقيعك هيساعد على رفع معاناة شعب بورما , و هيساعد كمان على رفع مستوى حقوق الأنسان فى العالم و دة هيساعدنا فى مصر بطريقة غير مباشرة ..... يعنى أذا كنت أنسان و عندك دم و بتحس , أدخل هنا و سيب توقيعك

ملاحظة أخيرة يا جماعة .... ممكن واحد فيكم يفتح أطلس و ميلاقيش دولة أسمها بورما , و السبب فى دة هو أن الحاكم الدكتاتور المتخلف بتاعهم سنة 1989 راح مغير أسم البلد بالعافية غصب عن الشعب و خلاة " ميانمار " .... طبعا الشعب هناك مش موافق على التسمية الجديدة و بيعتبر اللى بيستخدموا الأسم الجديد خونة ... و طبعا احنا تضامنا مع شعب بورما هنفضل نستخدم الأسم الأصلى اللى متمسك بية شعب بورما , و العسكرى اللى قاعد على كرسى الحكم عندهم لو مش عاجبة الكلام دة ممكن ينقى أتخن حيطة فى بلدهم و يخبط راسة فيها

4 comments:

Anonymous,  06/10/2007, 23:42  

اذيك ياباشا
انا عماد رفعت منسق موقع شبابيك WWW.SHBABIK.NET
وعايزينك معانا في المجله وننشر كتاباتك الجميله دي
ياريت ترد علينا في اميل المجله
SHBABIK_NET@YAHOO.COM
تحياتي

حراج السيارات 17/07/2012, 10:08  

الله يفرج على إخواننا في بورما

Post a Comment

Every post represents my opinions when I wrote it, but not necessary now!
كل مقال يعبر عن آرائى فى تاريخ كتابته، و ليس بالضرورة عن أرائى حاليا

  © Blogger template Simple n' Sweet by Ourblogtemplates.com 2009

Back to TOP